ବରେଲି,୩ା୧୨- ଉତ୍ତରପ୍ରଦେଶର ବରେଲି ଡିଭିଜନରେ ଅନ୍ୟ ଜାତିରେ ପ୍ରେମ କରିବା ଅତ୍ୟନ୍ତ ଭୟଙ୍କର। ଗତ ଦୁଇ ବର୍ଷ ମଧ୍ୟରେ ଯାଇଛି ୫୮ ଜଣଙ୍କ ଜୀବନ। ଅନ୍ୟ ଜାତିରେ ପ୍ରେମ କରିବା ସାବ୍ୟସ୍ତ ହୋଇଥିଲା ସେମାନଙ୍କ ଅନ୍ତିମ ଭୁଲ। ଗତ ସୋମବାର ଶାହଜନପୁରଠାରେ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଥିଲା ଜଣେ ୧୮ ବର୍ଷୀୟା ଯୁବତୀ ଓ ୨୬ ବର୍ଷୀୟ ଯୁବକଙ୍କ ମୃତ ଦେହ। କେବଳ ବରେଲି ଡିଭିଜନରେ ଗତ ଦୁଇ ବର୍ଷ ମଧ୍ୟରେ ୪୨ ପ୍ରେମୀଯୁଗଳ ଜୀବନ ହରାଇଛନ୍ତି।
ମୁଁ ବରେଲି ଆସିଲା ପରେ ପ୍ରେମୀ ଯୁଗଳଙ୍କ ଆତ୍ମହତ୍ୟାରେ ଦେଖିବାକୁ ପାଇଥିଲି ଏକ ସମାନତା। ଏହାପରେ ମୁଁ ସଂଗ୍ରହ କରିଥିଲି ସମସ୍ତ ତଥ୍ୟ। ୨୦୧୯ ଜାନୁୟାରୀଠାରୁ ଅନ୍ୟ ଜାତିରେ ପ୍ରେମ କାରଣରୁ ୧୬ ଜଣଙ୍କୁ ହତ୍ୟା କରାଯାଇଛି। ଏଥିରେ ସାମିଲ ଥିଲା ୧୨ ହତ୍ୟା ଓ ୨ଟି ଡବଲ ମର୍ଡର ମାମଲା। ଏହି କାରଣରୁ ଅନ୍ୟ ଜାତିରେ ବିବାହ କରିବାକୁ ଡରୁଛନ୍ତି ପ୍ରେମୀ ଯୁଗଳ। ଆଉ ଚାପର ବଶବର୍ତ୍ତୀ ହୋଇ ୪୨ ପ୍ରେମୀ ଯୋଡ଼ା ବାଛି ନେଇଥିଲେ ଆତ୍ମହତ୍ୟାର ବାଟ ବୋଲି ଡିଆଇଜି ରାଜେଶ ପାଣ୍ଡେ କହିଛନ୍ତି।
ହତ୍ୟା ଘଟଣାରେ ମାମଲା ରୁଜୁ ହୁଏ। କିନ୍ତୁ ଆତ୍ମହତ୍ୟା ପରେ ସେଭଳି କିଛି ତଦନ୍ତ ହୁଏ ନାହିଁ। ଏଭଳି ଚରମ ନିଷ୍ପତ୍ତି ନେବାକୁ ଯେଉଁମାନେ ଚାପ ପକାଉଛନ୍ତି, ସେମାନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ପାରୁନାହିଁ। ଏଭଳି ପରିସ୍ଥିତିରେ ପୋଲିସର ତଦନ୍ତ ବାଧ୍ୟତାମୂଳକ ହେବା ଦରକାର। ପୋଲିସ ତଦନ୍ତକୁ ତଦାରଖ କରିବା ପାଇଁ ଡିଏମ୍, ଏସ୍ଏସ୍ପି ଓ ଜିଲା ଜଜ୍ଙ୍କ ନେତୃତ୍ୱରେ କମିଟି ଗଠନ କରାଯିବା ଦରକାର। କାରଣ ଏଠାରେ ନାଗରିକଙ୍କ ଜନ୍ମଗତ ଅଧିକାର ବିପଦରେ ଅଛି ବୋଲି ଡିଆଇଜି ପାଣ୍ଡେ କହିଛନ୍ତି।
