କେସିଙ୍ଗା,୨୬ା୧୨(ତୁମେଶ୍ୱର ସାହୁ): କଳାହାଣ୍ଡି ଜିଲାର କେସିଙ୍ଗା ବ୍ଲକ ଅଞ୍ଚଳରେ ଚଳିତବର୍ଷ ଭଲ ଧାନ ଫସଲ ହୋଇଥିବା ବେଳେ ଫସଲ ପାକଳ ହେବା ବେଳକୁ ବର୍ଷାର ଅଭାବ ଯୋଗୁ
କିଛି ଧାନ ଫସଲ ନଷ୍ଟ ହୋଇଥିଲା। ଏବେ ଅମଳ ବେଳକୁ ଅଦିନିଆ ବର୍ଷା ଯୋଗୁ ପାଚିଲା ଧାନ ଫସଲ ନଷ୍ଟ ହେବା ସହ ଗଜା ହେବାକୁ ବସିଛି। ବିଲରେ କଟାଧାନ ବର୍ଷାରେ ଭିଜି ଗଜା ହେବାକୁ ବସିଛି। ଧାନ ଖରାରେ ନ ଶୁଖିଲା ପର୍ଯ୍ୟନ୍ତ ଚାଷୀ ଖଳାକୁ ନେଇ ପାରିବ ନାହିଁ। ଏଭଳି ପରିସ୍ଥିତିରେ କିଭଳି ମଣ୍ଡିକୁ ନେଇ ଧାନ ବିକ୍ରି କରିବେ ସେ ନେଇ ଚାଷୀ ଚିନ୍ତାରେ ଅଛନ୍ତି।
କେସିଙ୍ଗା ବ୍ଲକରେ ଖରିଫ ଋତୁରେ ୯ ହଜାରରୁ ଅଧିକ ହେକ୍ଟରରେ ଧାନଚାଷ ହୋଇଥିବା ଜଣାପଡିଛି। ବର୍ଷାରେ ଧାନ ନଷ୍ଟ ହୋଇ ଯାଇଥିବାରୁ ପ୍ରଶାସନ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦେବା ସହ ମଣ୍ଡିରେ କୋହଳ କରିବାକୁ ଚାଷୀ ମହଲରେ ଦାବି ହେଉଛି। କଣ୍ଡେଲା ପ୍ୟକ୍ସ ଅଧୀନରେ ୪ଟି ଧାନମଣ୍ଡି ଖୋଲା ଯାଇଛି। କାଣ୍ଡେଲ,ବାଲସି ଉପ ମଣ୍ଡି, ଶିରୋଲ ଓ ମଶାଣିବନ୍ଧଠାରେ ସର୍ବମୋଟ୍ ୪ଟି ଧାନମଣ୍ଡି ଖୋଲାଯାଇଛି। ଗତ ମଙ୍ଗଳବାରଠାରୁ ଗୁରୁବାର ଯାଏ ଲଗାତର ଲଘୁଚାପଜନିତ ବର୍ଷା ହେବାରୁ ମଣ୍ଡିରେ ଖୋଲା ଆକାଶ ତଳେ ଶହ ଶହ କ୍ୱିଣ୍ଟାଲ ଧାନ ପଡ଼ିରହିଛି। କାଣ୍ଡେଲ ମଣ୍ଡିରେ ୪୦୨ ଜଣ ଚାଷୀ ପଞ୍ଜୀକୃତ ହୋଇଛନ୍ତି। ସେଥି ମଧ୍ୟରୁ ୮୬ଜଣ ଙ୍କ ଚାଷୀଙ୍କ ଠାରୁ ୩ ହଜାର ୩୪୨କ୍ୱିଣ୍ଟାଲ ଧାନ ମିଲର କ୍ରୟ କରିଛନ୍ତି। ଶିରୋଲ ଧାନ ମଣ୍ଡିରେ ୩୩୪ ଜଣ ପଞ୍ଜୀକୃତ ଚାଷୀଙ୍କ ମଧ୍ୟରୁ ୩୧ଜଣ ଚାଷୀଙ୍କଠାରୁ ଆଜି ଯାଏ ୧ହଜାର୧୩୭ କ୍ୱିଣ୍ଟାଲ ଧାନ ମିଲର କ୍ରୟ କରିଛନ୍ତି। ସେହିପରି ବାଲସି ଉପ ମଣ୍ଡି ଓ ମଶାଣିବନ୍ଧ ଧାନ ମଣ୍ଡିରେ ଆରମ୍ଭ ଦିନ ଠାରୁ ୫୦ ଜଣ ଚାଷୀଙ୍କଠାରୁ ୨ ହଜାର ୩୦୦ କ୍ୱିଣ୍ଟାଲ ଧାନ ମିଲର କ୍ରୟ କରିଛନ୍ତି। ଧାନ କ୍ୱିଣ୍ଟାଲ ପ୍ରତି ୨୩୦୦ ଟଙ୍କାରେ ମିଲର କ୍ରୟ କରୁଛନ୍ତି। ବୋନସ ବାବଦକୁ ୮୦୦ଟଙ୍କା ଏହି ପରି ୩ହଜାର ଏକ ଶହ ଟଙ୍କା ଚାଷୀ ପାଉଛି। କିନ୍ତୁ ଏହି ମଣ୍ଡି ଗୁଡ଼ିକରେ ଧାନ କ୍ରୟ କରିବା ପାଇଁ ୪ ମିଲରଙ୍କୁ ଦାୟିତ୍ୱ ଦିଆଯାଇଛି। କେସିଙ୍ଗାସ୍ଥିତ ଜେ. ଏ.ଆଇ.ଏନ. ରାଇସ ମିଲ୍ ,ବିଟ ରାଜ, ଜିନ ମାତାଦୀ ଏଗ୍ରୋ ଡୁମେର ମୁଣ୍ଡା ,କଳିଙ୍ଗ ରାଇସ ମିଲ୍ ବଗାଡ଼କୁ ଦାୟିତ୍ୱ ଦିଆ ଯାଇଛି। ଚାଷୀଙ୍କ ଧାନ କ୍ୱିଣ୍ଟାଲ ପ୍ରତି ୫ରୁ ୭କେଜି ଧାନ କାଟୁ ଥିବାରୁ ଚାଷୀମାନେ ଅଭିଯୋଗ କରିଛନ୍ତି। ଅସନ୍ତୋଷ ଚାଷୀ ବୃନ୍ଦ ଜିଲାପାଳ, ଖାଦ୍ୟ ଯୋଗାଣ ବିଭାଗକୁ ଅଭିଯୋଗ କରିବା ସତ୍ତ୍ୱେ କିଛି ବି ସୁଫଳ ମିଳୁ ନାହିଁ। ଶୀତ, ବର୍ଷାରେ ଖୋଲା ଆକାଶ ତଳେ ଚାଷୀ ମଣ୍ଡିରେ ଧାନ ଦିନରାତି ଜଗି ରହୁଛି।
ଏ ସଂକ୍ରାନ୍ତରେ କେସିଙ୍ଗା ଖାଦ୍ୟ ଯୋଗାଣ ଅଧିକାରୀ ସୁଶାନ୍ତ କୁମାର ସ୍ବାଇଁଙ୍କୁ ପଚାରିବାରୁ ମୋତେ ଲିଖିତ ଆକାରରେ ଅଭିଯୋଗ କଲେ କାର୍ଯ୍ୟାନୁଷ୍ଠାନ ନେବି ବୋଲି ପ୍ରକାଶ କରିଛନ୍ତି।
