ନୂଆଦିଲ୍ଲୀ,୧।୮ : ଦେଶର ବିଭିନ୍ନ ରାଜ୍ୟର ବିଧାନସଭାରେ ୨୦୨୧ରେହାରାହାର କେବଳ ୨୧ ଦିନର କାର୍ଯ୍ୟ ଦିବସ ରହିଥିଲା। ଏହି ସମୟ ମଧ୍ୟରେ ୫୦୦ରୁ ଅଧିକ ବିଧେୟକ ପାରିତ ହୋଇଛି। ସେଥି ମଧ୍ୟରେ ଉଚ୍ଚଶିକ୍ଷାର ନିୟନ୍ତ୍ରଣ, ଅନଲାଇନ ଖେଳ, ଧାର୍ମିକ ରୂପାନ୍ତର, ଗୋ ସୁରକ୍ଷା ସହିତ ଜଡିତ ବିଲ ଅନ୍ତର୍ଭୁକ୍ତ ରହିଛି। ଏହି ବିଲ ଗୁଡିକର ପ୍ରାୟ ଅଧା ସର୍ବନିମ୍ନ ବିଧାନସଭା ଯାଞ୍ଚ ବିନା ପାରିତ ହୋଇଛି। ଅର୍ଥାତ ଯେଉଁ ଦିନ ଏହାକୁ ଆଗତ କରାଯାଇଥିଲା ସେହି ଦିନ ଏସବୁ ପାରିତ ହୋଇଛି। ୮ଟି ରାଜ୍ୟରେ ବିଲ ଆଗତ ହୋଇଥିବା ଦିନ ହିଁ ପାରିତ ହୋଇଛି। ଏକ ଥିଙ୍କ ଟ୍ୟାଙ୍କର ପିଆରଏସ୍ ଲେଜିସଲେଟିଭ୍ ଅଧ୍ୟୟନରେ ଏହା ପ୍ରକାଶ ପାଇଛି ।
ଏହି ରିପୋର୍ଟ ଅନୁଯାୟୀ, ଗତ ବର୍ଷ କର୍ନାଟକ ବିଧାନସଭାରେ ସର୍ବାଧିକ ୪୮ ଟି ବିଲ ପାରିତ ହୋଇଥିଲା। ଏହାପୂର୍ବରୁ ୨୦୨୦ରେ ମଧ୍ୟ କର୍ନାଟକ ସର୍ବାଧିକ ୫୫ ବିଲ ପାରିତ କରିଥିଲା। ଗତ ବର୍ଷ ଦିଲ୍ଲୀ ବିଧାନସଭା ଦ୍ୱାରା ସବୁଠାରୁ କମରେ ଦୁଇଟି ବିଲ ପାରିତ ହୋଇଥିଲା। ସେହିପରି ପୁଡୁଚେରୀରେ ୩ ଏବଂ ମିଜୋରାମରେ ୫ ବିଲ୍ ପାରିତ ହୋଇଥିବା ରିପୋର୍ଟରେ ଦର୍ଶାଯାଇଛି।
କର୍ନାଟକ, କେରଳ, ମେଘାଳୟ, ଓଡିଶା ଏବଂ ରାଜସ୍ଥାନ ବିଧାନସଭା ୫୦ ପ୍ରତିଶତ ବିଲ ପାରିତ କରିବାକୁ ୫ ଦିନରୁ ଅଧିକ ସମୟ ନେଇଛି। କେରଳରେ ୯୪ ପ୍ରତିଶତ ବିଲ ବିତର୍କ ଏବଂ ବିଚାର ବିମର୍ଷ ପରେ ଅତି କମରେ ପାଞ୍ଚ ଦିନ ପରେ ପାରିତ ହୋଇଛି। ଏହି ପ୍ରତିଶତ କର୍ନାଟକରେ ୭୦ ଏବଂ ମେଘାଳୟରେ ୮୦ ରହିଥିବା ରିପୋର୍ଟରେ ଉଲ୍ଲେଖ କରାଯାଇଛି।
