ସମ୍ବଲପୁର,୨୮ା୩ (ବ୍ୟୁରୋ): ବିଜେଡି ସଭାପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ବଲପୁର ସମେତ ଅନ୍ୟ ୩ ଜିଲାରେ ଯାଜପୁର ବିଧାୟକ ତଥା ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କୁ ପର୍ଯ୍ୟବେକ୍ଷକ ଭାବେ ନିଯୁକ୍ତ କରିଛନ୍ତି। ପ୍ରଣବଙ୍କ ନିଯୁକ୍ତି ପରେ ସମ୍ବଲପୁର ଜିଲାରେ ବିଜେଡି ଶିବିରରେ ଖୁସିର ଲହରି ଦେଖିବାକୁ ମିଳିଛି। ଜିଲାର କେତେକ ସ୍ଥାନରେ ବିଜେଡି ସଂଗଠନ ଦୁର୍ବଳ ରହିଛି ତାହା ସୁଧୁରିଯିବ ବୋଲି ଦଳର ନେତାମାନେ ଆଶା କରିଛନ୍ତି।
ଅନ୍ୟପଟେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଗାମୀ ୨୦୨୪ ନିର୍ବାଚନରେ ପ୍ରତ୍ୟକ୍ଷ ଭାବେ ମଇଦାନକୁ ଓହ୍ଲାଇବେ ବୋଲି କୁହାଯାଉଛି। ସମ୍ବଲପୁର ଏମ୍ପି ନୀତେଶ ଗଙ୍ଗଦେବ ଚାହିଁଲେ ସମ୍ବଲପୁର ନିର୍ବାଚନ ମଣ୍ଡଳୀରୁ ଲଢିିବେ ବୋଲି ଜନସଭାରେ ଘୋଷଣା କରିଥିଲେ। କିଛିଦିନ ହେବ କେନ୍ଦ୍ରମନ୍ତ୍ରୀ ପ୍ରଧାନ ତୁହାକୁ ତୁହା ସମ୍ବଲପୁର ଲୋକ ସଭା ଅଧୀନ ବିଧାନସଭା ଅଞ୍ଚଳ ଗସ୍ତକରି ବିଭିନ୍ନ କାର୍ଯ୍ୟକ୍ରମରେ ଯୋଗଦାନ କରୁଛନ୍ତି। ଏଣୁ ସେ ସମ୍ବଲପୁର ଲୋକ ସଭା ନିର୍ବାଚନ ଲଢିବା ନେଇ ଏକପ୍ରକାର ସଙ୍କେତ ଦେଉଥିବା ଚର୍ଚ୍ଚା ହେଉଛି। ଧର୍ମେନ୍ଦ୍ରଙ୍କୁ ଟକ୍କର ଦେବା ପାଇଁ ବିଜେଡି ପ୍ରଣବଙ୍କୁ ସମ୍ବଲପୁର ଜିଲାର ପର୍ଯ୍ୟବେକ୍ଷକ ଭାବେ ନିଯୁକ୍ତି ଦେଇଥିବା ଆଲୋଚନା ହେଉଛି। ଅନ୍ୟପଟେ ଜିଲାରେ ବିଜେଡି ସଂଗଠନ କୌଣସି ଜଣେ ନେତାଙ୍କ ନିୟନ୍ତ୍ରଣରେ ପରିଚାଳିତ ହେଉ ନାହିଁ। ୨୦୧୯ ଲୋକ ସଭା ନିର୍ବାଚନକୁ ଦେଖିଲେ ଜିଲାରେ ୪ ବିଧାନସଭା ଭିତରୁ ରେଙ୍ଗାଲି ଓ ସମ୍ବଲପୁର ଭାଜପା ହାତକୁ ଯାଇଥିବା ବେଳେ ରେଢାଖୋଲ ଓ କୁଚିଣ୍ଡା ବିଜେଡି ହାତରେ ରହିଥିଲା। ୨୦୧୪ ନିର୍ବାଚନରେ ସମ୍ବଲପୁର ଓ ରେଙ୍ଗାଲି ବିଧାନସଭା ବିଜେଡି ହାତରେ ଥିବା ବେଳେ ଭାଜପାକୁ ହାତକୁ ଚାଲିଯିବା ଘଟଣା ଦଳପାଇଁ ଅଡୁଆ ପରିସ୍ଥିତି ସୃଷ୍ଟି ହୋଇଥିଲା। ଏପରି କି ବିଜେଡି ହାତରୁ ସମ୍ବଲପୁର ଲୋକ ସଭା ଆସନ ମଧ୍ୟ ଭାଜପା ଛଡାଇ ନେଇଥିଲା। ଦଳୀୟ ଗୋଷ୍ଠୀକନ୍ଦଳ ଭାଜପାକୁ ସୁହାଇଥିଲା ବୋଲି ସେ ସମୟରେ ଆଲୋଚନା ହୋଇଥିଲା। ହେଲେ ଗତ ପଞ୍ଚାୟତ ନିର୍ବାନରେ ଭଟ୍ଲି ବିଧାୟକ ସୁଶାନ୍ତ ସିଂଙ୍କ ପ୍ରତ୍ୟକ୍ଷ ହସ୍ତକ୍ଷେପ ଓ ବବି ପରିଚାଳନା କରି ଜିଲାପରିଷଦ ନିର୍ବାଚନ ଦଳର ସ୍ଥିତି ଫେରାଇ ଆଣିଥିଲେ। ଜିଲାରେ ମୋଟ ୧୮ ଜିଲାପରିଷଦ ଆସନରୁ ବିଜେଡି ୧୬ ଆସନରେ ବିଜୟୀ ହୋଇଥିଲା। ହେଲେ କୁଚିଣ୍ଡା ଓ ରେଢାଖୋଲ ବ୍ଲକରେ ଗୋଟିଏ େ ଲଖାଏ ଜିଲାପରିଷଦ ଆସନ ହାରିଯାଇଥିଲା। ଏପରି କି ରେଢାଖୋଲ ଏନ୍ଏସି ନିର୍ବାଚନରେ ମଧ୍ୟ ବିିଜେଡି ପରାଜିତ ହୋଇଥିଲା। ଅନ୍ୟପଟେ ସମ୍ବଲପୁର ବିଧାୟକ ଜୟନାରାୟଣ ମିଶ୍ର ବିରୋଧୀ ଦଳ ନେତା ହେବା ପରେ ଆହୁରି ଆକ୍ରମଣାନ୍ତକ ହୋଇପଡିଛନ୍ତି। ବିଭିନ୍ନ ପ୍ରସଙ୍ଗରେ ରାଜ୍ୟ ସରକାରଙ୍କ ଦୁର୍ବଳତା ପଦାକୁ ଆଣି ସରକାରଙ୍କୁ କାଠଗଡାକୁ ଟାଣୁଛନ୍ତି। ବିଧାୟକ ମିଶ୍ରଙ୍କ ଅଭିଜ୍ଞତା ଓ କେନ୍ଦ୍ରମନ୍ତ୍ରୀ ପ୍ରଧାନ ଲୋକ ସଭା ଆସନରେ ଛିଡା ହେଲେ ଭାଜପା ଶକ୍ତିଶାଳୀ ହୋଇଯିବ। ତେଣୁ ସେ ନେଇ ବିଜେଡି ରଣନୀତି କରୁଛି ବୋଲି ରାଜନୈତିକ ବିଶେଷଜ୍ଞମାନେ ମତ ଦେଉଛନ୍ତି। ଏ ସମ୍ପର୍କରେ ବିଜେଡି ଜିଲା ସଭାପତି ସିଦ୍ଧାର୍ଥ ଦାସ କହିଛନ୍ତି, ଏହା ଜିଲା ବିଜେଡି ପାଇଁ ଶୁଭଙ୍କର। ବିଗତ ନିର୍ବାଚନରେ କାରଣ ଯାହା ହେଉନା କାହିଁକି ଦଳ ୨ ଗୋଟି ବିଧାନସଭା ଓ ଲୋକ ସଭା, ୨ ଗୋଟି ଜିଲାପରିଷଦ ଓ ୧ ଏନ୍ଏସି ପଦ ହରାଇଥିଲା। ଆଗାମୀ ନିର୍ବାଚନରେ ଦଳ ନିଶ୍ଚିତ ଭାବେ ଏହାକୁ ନିଜ ହାତକୁ ନେବ ବୋଲି ସେ କହିଥିଲେ।
