ନୂଆଦିଲ୍ଲୀ,୧।୨: ଭାରତୀୟ ଜୀବନ ବୀମା ନିଗମ (ଏଲ୍ଆଇସି)ର ଲକ୍ଷାଧିକ ଟଙ୍କା ଆଦାନୀ ଗ୍ରୁପ୍ରେ ଲାଗିଥିବା(ନିବେଶ ହୋଇଥିବା)କୁ ନେଇ ବିଭିନ୍ନ ଗଣମାଧ୍ୟମରେ ଭିନ୍ନ ଭିନ୍ନ ରିପୋର୍ଟ ପ୍ରକାଶ ପାଉଛି। ଏହି ପରିପ୍ରେକ୍ଷୀରେ ଏଲ୍ଆଇସି ପକ୍ଷରୁ ନିକଟରେ ଏକ ପ୍ରେସ୍ ବିବୃତି ଜାରି କରାଯାଇ ଆଦାନୀ ଓ ନିବେଶ ଏବଂ ନିବେଶକଙ୍କ ସମ୍ପର୍କରେ ବିସ୍ତୃତ ପ୍ରତିକ୍ରୟା ପ୍ରକାଶ କରାଯାଇଛି। ଏପରିକି ଏଲ୍ଆଇସି ପକ୍ଷରୁ ମିଳିଥିବା ସୂଚନା ଅନୁସାରେ ୨୦୨୨ ଡିସେମ୍ବର ଶେଷ ସୁଦ୍ଧା ଆଦାନୀ ଗ୍ରୁପ୍ର ଉଭୟ ଇକ୍ୱିଟ ଏବଂ ଡେବିଟ ବାବଦରେ ନିଗମର ମୋଟ ୩୫,୯୧୭,୩୧ କୋଟି ରହିଥିଲା। ସେହିଭଳି ୨୦୨୩ ଜାନୁୟାରୀ ୨୭ ମଧ୍ୟରେ ଏହାର ମାର୍କେଟ ଭାଲ୍ୟୁ ୫୬,୧୪୨ କୋଟି ଟଙ୍କାରେ ପହଞ୍ଚତ୍ଛି ବୋଲି ଏଲ୍ଆଇସି ପକ୍ଷରୁ କୁହାଯାଇଛି। ଅପରପକ୍ଷରେ ଆଦାନୀ ଗ୍ରୁପ୍ କମ୍ପାନୀରେ ଅଦ୍ୟାବଧି ଏଲ୍ଆଇସିର ମୋଟ ୩୬,୪୭୪.୭୮ କୋଟି ଟଙ୍କା ନିବେଶ ହୋଇଥିବା ଜଣାପଡ଼ିଛି। ଏପରିକି ଆଦାନୀ ଗ୍ରୁପ୍ରେ ଏଲ୍ଆଇସିର ସମସ୍ତ ଡେବିଟ ସିକ୍ୟୁରିଟ କ୍ରେଡିଟ ରେଟିଂ ଏଏ ଲାଭ କରିଥିଲା। ବିଶେଷକରି ବୀମା ନିୟାମକ ଆଇଆର୍ଡିଏଆଇର ନିବେଶ ଅନୁପାଳନ ଅନୁସାରେ ସମସ୍ତ କାର୍ଯ୍ୟ କରାଯାଇଛି। ସେହିପରି ୨୦୨୨ସେପ୍ଟେମ୍ବର ଶେଷ ସୁଦ୍ଧା ଏଲ୍ଆଇସିର ପରିଚାଳନା ପୁଞ୍ଜି ମୋଟ ୪୧.୬୬ ଲକ୍ଷ କୋଟିରେ ରହିଥିଲାବେଳେ ସେଥିମଧ୍ୟରୁ ଆଦାନୀ ଗ୍ରୁପ୍ରେ ଏଲ୍ଆଇସିର ନିବେଶ ମାତ୍ର ୦.୯୭୫% ରହିଛି। ଫଳରେ ଆର୍ଥିକ ସ୍ଥିରତା ବଜାୟ ରଖିବା ଲାଗି ଲାଏବିଲିଟିର ଉଚିତ ଭାଲ୍ୟୁ ନିର୍ଦ୍ଧାରଣକୁ ନିଗମ ସବୁ ସମୟରେ ଗୁରୁତ୍ୱ ଦେବା ସହ ନିବେଶକଙ୍କ ସ୍ବାର୍ଥକୁ ସର୍ବୋପରି ବୋଲି ନିଗମ ମତପ୍ରକାଶ କରିଛି।
