କଟକ ଅଫିସ,୧୩ା୫:ରାଜ୍ୟରେ କୋଭିଡ୍ ସ୍ଥିତିକୁ ନେଇ କଟକସ୍ଥିତ ପୋଲିସ ମୁଖ୍ୟାଳୟରେ ଭିଡିଓ କନ୍ଫରେନ୍ସିଂ ଜରିଆରେ ବୁଧବାର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ରାଜ୍ୟରେ ବର୍ତ୍ତମାନ କୋଭିଡ୍ ସ୍ଥିତି କିଭଳି ରହିଛି, ସୀମାନ୍ତବର୍ତ୍ତୀ ଅଞ୍ଚଳରେ ଚେକ୍ ପୋଷ୍ଟ, ଟିକାକରଣ କେନ୍ଦ୍ରରେ ଜନଗହଳିକୁ ନିୟନ୍ତ୍ରଣ, କୋଭିଡ୍ ଔଷଧ ଓ ଅକ୍ସିଜେନ୍ ସିଲିଣ୍ଡର କଳାବଜାରକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ, କରୋନା ସମୟରେ ପୋଲିସର ସ୍ବାସ୍ଥ୍ୟ ପରୀକ୍ଷା ଓ ଟିକାକରଣ ଏବଂ ପୋଲିସ କର୍ମଚାରୀଙ୍କ ଦ୍ୱାରା ପ୍ଲାଜ୍ମା ଦାନ ଆଦିର ସମୀକ୍ଷା କରାଯାଇଥିଲା। ଏଥିରେ ଡିଜିପି ଅଭୟ ଯୋଗଦେଇ ରାଜ୍ୟର ସମସ୍ତ ଏସ୍ପି, ଡିଆଇଜି, ଆଇଜିଙ୍କ ସହ ଉପରୋକ୍ତ ବିଷୟ ଉପରେ ଆଲୋଚନା କରିଥିଲେ। କୋଭିଡ୍ ନିୟମ ଉଲ୍ଲଂଘନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିବା କଟକ ଓ ଭୁବନେଶ୍ୱର ୟୁପିଡି, ସମ୍ବଲପୁର, ବାଲେଶ୍ୱର, ପୁରୀ ପୋଲିସକୁ ପ୍ରଶଂସା କରିଥିଲେ। ସେହିପରି ଗଞ୍ଜାମ, ବାଲେଶ୍ୱର, ମୟୂରଭଞ୍ଜ, ସମ୍ବଲପୁର ଓ ଭଦ୍ରକ ଜିଲାରୁ କୋଭିଡ୍ ନିୟମ ଉଲଂଘନକାରୀଙ୍କଠାରୁ ସର୍ବାଧିକ ଜରିମାନା ଆଦାୟ କରାଯାଇଥିବାରୁ ସମ୍ପୃକ୍ତ ଜିଲାର ଏସ୍ପିଙ୍କୁ ଡିଜିପି ପ୍ରଶଂସା କରିଥିଲେ। ଏଥିସହ କୋଭିଡ୍ ଆକ୍ରାନ୍ତଙ୍କୁ ଅଧିକ ସଂଖ୍ୟାରେ ପ୍ଲାଜ୍ମା ଦାନ କରିବାକୁ ପୋଲିସ ଅଧିକାରୀ ଓ କର୍ମଚାରୀଙ୍କୁ ଡିଜିପି ପରାମର୍ଶ ଦେଇଥିଲେ ା ହେଲ୍ପ ଲାଇନ୍ ନମ୍ବର ଯୋଗେ ଲୋକଙ୍କ ଅଭିଯୋଗକୁ ଗ୍ରହଣ କରିବା ଉପରେ ଡିଜିପି ଗୁରୁତ୍ୱାରୋପ ଦେଇଛନ୍ତି। ବିଶେଷକରି ଲକ୍ଡାଉନ୍ ଓ ଶଟ୍ଡାଉନ୍ ସମୟରେ ହେଲ୍ପ ଲାଇନ୍ ନମ୍ବର ଯୋଗେ ଲୋକଙ୍କ ଅଭିଯୋଗକୁ ଗ୍ରହଣ କରି କାର୍ଯ୍ୟାନୁଷ୍ଠାନ ନେବାକୁ ସମସ୍ତ ଜିଲାର ଏସ୍ପି, ଭୁବନେଶ୍ୱର ଓ କଟକ ଡିସିପିଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ବୈଠକରେ ଏଡିଜିପି (ହେଡ୍କ୍ୱାର୍ଟର୍ସ) ଲଳିତ ଦାସ, ଏଡିଜିପି (କ୍ରାଇମ୍ବ୍ରାଞ୍ଚ) ଯଶୋୱନ୍ତ ଜେଠୱା, ଆଇଜି (ପ୍ରୋଭିଜନିଂ) ଯତୀନ୍ଦ୍ର କୋଏଲ୍, ଆଇଜି (ପର୍ସନେଲ୍) ଏସ୍.ପ୍ରବୀଣ କୁମାର, ଆଇଜି (କ୍ରାଇମ୍ବ୍ରାଞ୍ଚ) ଅମିତେନ୍ଦ୍ର ନାଥ ସିହ୍ନା, ଡିଆଇଜି (କେନ୍ଦ୍ରାଞ୍ଚଳ) ଜୟନାରାୟଣ ପଙ୍କଜ, ଏଆଇଜି (ହେଡ୍କ୍ୱାର୍ଟର୍ସ) ପ୍ରତ୍ୟୁଷ ଦିବାକର ପ୍ରମୁଖ ଉପସ୍ଥିତ ଥିଲେ।
ସୂଚନାଥାଉ କି, ଗତ ଏପ୍ରିଲ ପହିଲାରୁ ବର୍ତ୍ତମାନ ପର୍ଯ୍ୟନ୍ତ ମାସ୍କ ପିନ୍ଧି ନ ଥିବା ଏବଂ ସାମାଜିକ ଦୂରତା ଉଲ୍ଲଂଘନ କରିଥିବା ଲୋକଙ୍କ ବିରୋଧରେ ଓଡ଼ିଶା ପୋଲିସ ପକ୍ଷରୁ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏପର୍ଯ୍ୟନ୍ତ ୨,୫୯,୨୪୬ ଜଣଙ୍କଠାରୁ ୮,୦୭,୭୨,୬୩୦ ଟଙ୍କା ଜରିମାନା ଆଦାୟ କରାଯାଇଛି। ଏହାବ୍ୟତୀତ କୋଭିଡ୍ ନିୟମ ଉଲ୍ଲଂଘନ କରିବା ଅଭିଯୋଗରେ ପୋଲିସ ୧୩୬ ରୁଜୁ କରି ୬୬୨ ଜଣଙ୍କୁ ଗିରଫ କରିଛି। ୨୦୨୬ ଅବକାରୀ ମାମଲା ପଞ୍ଜୀକରଣ କରାଯାଇ ୩୮,୨୬୬.୬୬ ଲିଟର ମଦ ଜବତ କରାଯାଇଥିବା ପୋଲିସ ମୁଖ୍ୟାଳୟ ପକ୍ଷରୁ ଜଣାପଡିଛି।
