ହିଞ୍ଜିଳିକାଟୁ ୪।୯(ଡି.ଏନ.ଏ.): ହିଞ୍ଜିଳିକାଟୁ ବସ ଟର୍ମିନାଲ ପରିସରରେ ରବିବାର ଜଣେ ବୟସ୍କ ବ୍ୟକ୍ତି ଶନିବାର ରାତିରୁ ସ୍ବାସ୍ଥ୍ୟ ଅବସ୍ଥା ବିଗିଡି ଯିବାରୁ ନିଶ୍ଚଳ ହୋଇ ପଡି ରହିଥିଲେ। ଏ ନେଇ ସୋସିଆଲ ମିଡିଆରେ ଫଟୋ ଭାଇରଲ ହେବା ସହ ଚିକିତ୍ସା ନିମନ୍ତେ ଦାବି ହୋଇଥିଲା। ସୋସିଆଲ ମିଡିଆରେ ପ୍ରଚାରିତ ଏହି ଖବର ପରେ ହିଞ୍ଜିଳି ପୋଲିସ ତତ୍ପର ଦେଖାଇଥିଲେ। ଉକ୍ତ ବୟସ୍କ ବ୍ୟକ୍ତିଙ୍କୁ ଥାନା ଅଧିକାରୀ ଅଭିମନ୍ୟୁ ଦାସଙ୍କ ନେତୃତ୍ୱରେ ସରୋଜ କୁମାର ରଣସିଂ ଓ ପୋଲିସ ଟିମ ଉଦ୍ଧାର କରି ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତି କରାଇଥିଲେ। ପରେ ଉକ୍ତ ବ୍ୟକ୍ତି ଜଣକ ଶେରଗଡ ବ୍ଳକ ଧନନ୍ତର ପଞ୍ଚାୟତ କେ. ନୂଆଗଡ ଗ୍ରାମର କାଶୀନାଥ ମଲ୍ଲିକ ବୋଲି ପରିଚୟ ମିଳିଥିଲା। ପରିବାର ଲୋକଙ୍କ ସହଯୋଗ ଅଭାବରୁ ସେ ଘର ଛାଡ଼ିଥିବା କହିଛନ୍ତି। ପୋଲିସ ପକ୍ଷରୁ ତାଙ୍କ ପରିବାରକୁ ଖବର ପଠାଯିବା ସହ ତାଙ୍କର ଚିକିତ୍ସା ନିମନ୍ତେ ସବୁ ପ୍ରକାର ସହଯୋଗ କରାଯାଇଥିଲା। ସାମାଜିକ କର୍ମୀଙ୍କ ସହଯୋଗ ଓ ପୋଲିସର ଏହି କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
