ନୂଆଦିଲ୍ଲୀ,୧୭।୧୦ : ହିନ୍ଦୁ ଜାତୀୟତାବାଦ କାରଣରୁ ଭାରତରେ ଚାଲିଥିବା ଉତ୍ତେଜନା ଧୀରେଧୀରେ ବ୍ରିଟେନ, ଆମେରିକା, କାନାଡା, ଅଷ୍ଟ୍ରେଲିଆର ଆଦି ସ୍ଥାନରେ ପହଞ୍ଚିଛି। ଧର୍ମ-ଜାତୀୟତାବାଦ ନେଇ ପ୍ରବାସୀ ଭାରତୀୟ ବିଭାଜିତ ହେବାରେ ଲାଗିଛନ୍ତି। ୟୁରୋପରୁ ଆମେରିକା ପର୍ଯ୍ୟନ୍ତ ଭାରତୀୟଙ୍କ ମଧ୍ୟରେ ମତଭେଦ ସ୍ପଷ୍ଟ ଦେଖାଯାଉଛି।
ଏନେଇ କେତେକ ଭାଜପା ନେତୃତ୍ୱାଧୀନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଏବଂ ଆରଏସଏସକୁ ଦାୟୀ କରିଛନ୍ତି। ଏନେଇ ବିଦେଶରେ ପ୍ରବାସୀଙ୍କ ଏଭଳି ବିଭାଜନ ନେଇ ବିରୋଧ ପ୍ରଦର୍ଶନ କରାଯାଉଛି। ଏହା ଭାରତର ଭାବମୂର୍ତ୍ତିକୁ କ୍ଷୁର୍ଣ୍ଣ କରୁଥିବା କେତେକ ବୁଦ୍ଧିଜୀବି ମତପୋଷଣ କରିଛନ୍ତି।
ନିକଟରେ, ଯେତେବେଳେ ଆମେରିକାର ନ୍ୟୁ ଜର୍ସିରେ ଭାରତର ସ୍ବାଧୀନତା ଦିବସ ପାଳିତ ହୋଇଥିଲା, ସେତେବେଳେ ଏଡିସନରେ ହୋଇଥିବା ପରେଡରେ ଏକ ବୁଲଡୋଜର ମଧ୍ୟ ଅଂଶଗ୍ରହଣ କରିଥିଲା। ଉତ୍ତରପ୍ରଦେଶ ସମେତ ଅନେକ ରାଜ୍ୟରେ ବୁଲଡୋଜର ଚାଲୁଥିବା ଘଟଣାକୁ ଦୃଷ୍ଟିରେ ରଖି ଏହାକୁ ଏକ ପ୍ରତୀକ ଭାବରେ ଅନ୍ତର୍ଭୁକ୍ତ କରାଯାଇଥିଲା। କାଲିଫର୍ନିଆର ଆନାହାଇମରେ ହୋଇଥିବା ଏକ କାର୍ଯ୍ୟକ୍ରମରେ କିଛି ଲୋକ ଭାରତରେ ମୁସଲମାନମାନଙ୍କ ଦମନକୁ ବିରୋଧ କରିଥିବା ବେଳେ ଦୁଇ ପକ୍ଷ ସ୍ଲୋଗାନ ଦେବା ଆରମ୍ଭ କରିଥିଲେ।
ସମ୍ପ୍ରତି ବ୍ରିଟେନରେ ହିନ୍ଦୁ ଏବଂ ମୁସଲମାନ ଭାରତୀୟଙ୍କ ମଧ୍ୟରେ ବିବାଦ ଏତେ ବଢ଼ିଯାଇଥିଲା ଯେ ଏହି ମାମଲା ମାରପିଟରେ ପହଞ୍ଚିଥିଲା ଏବଂ ପୋଲିସକୁ କଡା ପଦକ୍ଷେପ ନେବାକୁ ପଡିଥିଲା। ଗତ ବର୍ଷ କୃଷକଙ୍କ ଆନ୍ଦୋଳନ ସମୟରେ କିଛି ଲୋକ ଅଷ୍ଟ୍ରେଲିଆରେ ସେମାନଙ୍କୁ ସମର୍ଥନ ଜଣାଇ ପ୍ରଦର୍ଶନ କରିଥିବାବେଳେ କିଛି ଯୁବକ ତ୍ରିରଙ୍ଗା ପତାକା ଧରି ଏହି ପ୍ରଦର୍ଶନକୁ ବିରୋଧ କରି ସ୍ଲୋଗାନ ଦେବା ଆରମ୍ଭ କରିଥିଲେ। କାନାଡାରେ ମଧ୍ୟ ସମାନ ପରିବେଶ ଦେଖିବାକୁ ମିଳିଛି। ଭାରତ ଦିବସ ପରେଡରେ ଆକ୍ରମଣ ଘଟଣା ଘଟିଥିଲା। ଏହା ବ୍ୟତୀତ ମନ୍ଦିର ଉପରେ ଆକ୍ରମଣର ଘଟଣା ମଧ୍ୟ ସାମ୍ନାକୁ ଆସିଛି। ଏଗୁଡ଼ିକ କେବଳ କିଛି ଉଦାହରଣ ଯାହା ଦର୍ଶାଏ ଯେ ଭାରତର ରାଜନୈତିକ ବିଭେଦ କିପରି ପ୍ରବାସୀଙ୍କୁ ବିଭାଜନ କରୁଛି।
ବିଦେଶରେ ରହୁଥିବା ପ୍ରାୟ ୩ କୋଟି ଭାରତୀୟ ହେଉଛନ୍ତି ବିଶ୍ୱର ସବୁଠାରୁ ବଡ ବିଦେଶୀ ସମ୍ପ୍ରଦାୟ । ଏଥିରେ ସମସ୍ତ ଧର୍ମ ଏବଂ ଜାତିର ଲୋକ ଅନ୍ତର୍ଭୁକ୍ତ। ଆମେରିକା ଏବଂ ବ୍ରିଟେନ ପରି ଦେଶରେ ସେମାନଙ୍କର ସଂଖ୍ୟା ବହୁତ ଅଧିକ ଏବଂ ସେମାନେ ଦଶନ୍ଧି ଧରି ଶାନ୍ତିପୂର୍ଣ୍ଣ ଭାବରେ ଜୀବନ ଅତିବାହିତ କରୁଥିଲେ। ତେବେ ସାମ୍ପ୍ରତିକ ଘଟଣାଗୁଡ଼ିକ ଚିନ୍ତା ବଢ଼ାଇ ଦେଇଛି ଯେ ଭାରତୀୟ ସମାଜର ଧାର୍ମିକ ତଥା ରାଜନୈତିକ ବିଭାଜନ ମଧ୍ୟ ପ୍ରବାସୀ ସମ୍ପ୍ରଦାୟଙ୍କ ମଧ୍ୟରେ ଫାଟ ସୃଷ୍ଟି କରୁଛି। ବହୁ ବିଶେଷଜ୍ଞ କହିଛନ୍ତି ଯେ ଏହା ୨୦୧୪ ରେ ଆରମ୍ଭ ହୋଇଥିଲା ଯେତେବେଳେ ଭାରତୀୟ ଜନତା ପାର୍ଟି ସାଧାରଣ ନିର୍ବାଚନରେ ଜିତି ନରେନ୍ଦ୍ର ମୋଦିଙ୍କ ନେତୃତ୍ୱରେ ସରକାର ଗଠନ କରିଥିଲା। କ୍ଷମତାକୁ ଆସିବା ପରଠାରୁ ଭାଜପା ମୁସଲମାନ ତଥା ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟ ଉପରେ ଅତ୍ୟାଚାର କରୁଥିବା ଅଭିଯୋଗ ହୋଇଛି।
