ଯାଜପୁର ଅଫିସ,୫।୧୦: ଯାଜପୁର ଜିଲା ସୀମାନ୍ତବର୍ତ୍ତୀ ଢେଙ୍କାନାଳ ଜିଲା କଙ୍କଡ଼ାହାଡ଼ ତହସିଲ ଅନ୍ତର୍ଗତ ଝିଲି ପାହାଡରେ ବେଆଇନ ପଥରକ୍ବାରି ଉପରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସ୍ପିସିବି) ପକ୍ଷରୁ କାରଣ ଦର୍ଶାଅ ନୋଟିସ ଜାରି କରାଯାଇଛି। ଉକ୍ତ ପଥରକ୍ବାରିରେ ପ୍ରଭାବିତ ସୁକାନ୍ତି ପ୍ରଧାନ, ସିପ୍ରା ପ୍ରଧାନ, ଶୈଳା ପ୍ରଧାନ, ପ୍ରେମାନନ୍ଦ ପ୍ରଧାନ, ସାନ୍ତନୁ କୁମାର ସାହୁ ଓ ସାନ୍ତନୁ ଭୁକ୍ତା ଗତ ୨୫ ତାରିଖରେ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନ୍ଜିଟି)ଙ୍କ ଦ୍ୱାରସ୍ଥ ହେବା ପରେ ଏସ୍ପିସିବି ପକ୍ଷରୁ ଏଭଳି ପଦକ୍ଷେପ ଗ୍ରହଣ କରାଯାଇଛି। ଏସ୍ପିସିବିର ଅନୁଗୋଳ ଆଞ୍ଚଳିକ ଅଧିକାରୀ ଝିଲି ପଥର କ୍ବାରିର ଲିଜ୍ଧାରୀ ଓ ତହସିଲଦାରଙ୍କୁ ଦେଇଥିବା କାରଣ ଦର୍ଶାଅ ନୋଟିସରେ ଦର୍ଶାଯାଇଛି ଯେ, ବାୟୁ ଓ ଜଳ ପ୍ରଦୂଷଣ ନିୟନ୍ତ୍ରଣ ଆଇନର ଉଲ୍ଲଂଘନ କରି ପଥରକ୍ବାରି ଚାଲିଛି। ତେଣୁ ୧୫ ଦିନ ମଧ୍ୟରେ ସନ୍ତୋଷଜନକ ଉତ୍ତର ଦେଇ ନ ପାରିଲେ ଆଇନ ଅନୁସାରେ ପଥରକ୍ୱାରିକୁ ବନ୍ଦ କରିବାକୁ ତାଙ୍କ ପତ୍ରସଂଖ୍ୟା ୨୨୧୦/୧ା୧୦ା୨୦୨୦ରେ ଉଲ୍ଲେଖ କରିଛନ୍ତି। ଅନ୍ୟପକ୍ଷେ ଅଭିଯୋଗକାରୀମାନେ ଏନଜିଟିରେ ଦେଇଥିବା ଆବେଦନ ପତ୍ର (ସଂଖ୍ୟା ୮୩/୨୦୨୦)ରେ ଅଭିଯୋଗ କରିଛନ୍ତି ଯେ, ଉକ୍ତ କ୍ୱାରି ଏବଂ କ୍ରଶର ପାଇଁ ଚତୁଃପାର୍ଶ୍ୱରେ ମୂଲ୍ୟବାନ ଶାଳ ଗଛ କଟାଯାଇଛି। ଏପରି କି ଉକ୍ତ କ୍ୱାରିର ପରିବେଶ ମଞ୍ଜୁରୀ ବୈଧତା ୩୧ା୩ା୨୦୨୦ରେ ଶେଷ ହୋଇସାରିଛି। ତଥାପି ସ୍ଥାନୀୟ ପ୍ରଶାସନିକ ଅଧିକାରୀଙ୍କ ସହଯୋଗରେ ବ୍ଲାଷ୍ଟିଂ କରି ବେଆଇନ ଭାବେ ପଥର ଉତ୍ତୋଳନ କାର୍ଯ୍ୟ ଜାରି ରହିଛି। ଏଥିଯୋଗୁ ନିକଟସ୍ଥ ଘରଗୁଡିକରେ ବଡ଼ ବଡ଼ ଫାଟ ସୃଷ୍ଟି ହେଉଛି। ଏଭଳି ଅନେକ ଅଭିଯୋଗ ନେଇ ଅଭିଯୋଗକାରୀମାନେ ଏନଜିଟିଙ୍କ ଦ୍ୱାରସ୍ଥ ହେବା ପରେ ଏସ୍ପିସିବି ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି ବୋଲି ମତପ୍ରକାଶ ପାଇଛି।
