ବରଗଡ଼,୨୮।୧୨(ପ୍ରେମାନନ୍ଦ ଖମାରୀ): ବରଗଡ଼ ସହର ଲେଙ୍ଗୁ ମିଶ୍ର ଛକଠାରୁ ଜିରା ବ୍ରିଜ୍ ରାସ୍ତାପାର୍ଶ୍ୱ ଜବରଦଖଲ ହଟାଇବାକୁ ଦୀର୍ଘଦିନରୁ ଦାବି ହୋଇଆସୁଛି। ଉଚ୍ଚ ନ୍ୟାୟାଳୟ ମଧ୍ୟ ଉଚ୍ଛେଦ ସପକ୍ଷରେ ରାୟ ଦେଇଛନ୍ତି। ଏଭଳି ସ୍ଥଳେ ପ୍ରଶାସନ ସମ୍ପୃକ୍ତ ଜବରଦଖଲକୁ ଉଚ୍ଛେଦ କରିବା ବଦଳରେ ହାତ ବାନ୍ଧି ବସିଛି। ଅନ୍ୟପଟେ ଉକ୍ତ ରାସ୍ତାରେ ଗାଡ଼ି ମୋଟର ବେଆଇନ ପାର୍କିଂ ହେଉଛି। ଫଳରେ ଟ୍ରାଫିକ୍ ସମସ୍ୟା ଦ୍ୱିଗୁଣିତ ହୋଇପଡ଼ୁଛି। ଏହାର ପ୍ରତିବାଦରେ ସ୍ଥାନୀୟ ସଚେତନ ଯୁବକମାନେ ଶୁକ୍ରବାର ବାଇକ୍ ରଖି ରାସ୍ତା ଅବରୋଧ କରିଥିଲେ। ପରେ ପୋଲିସ ଆନ୍ଦୋଳନସ୍ଥଳରେ ପହଞ୍ଚତ୍ ଏଣିକି ବେଆଇନ ପାର୍କିଂ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଥିଲା। ଏହାପରେ ଯୁବକମାନେ ରାସ୍ତା ଅବରୋଧରୁ ହଟିଥିଲେ।
ପ୍ରକାଶ ଯେ, ବରଗଡ଼ ସହର ଲେଙ୍ଗୁ ମିଶ୍ର-ଜିରା ବ୍ରିଜ୍ ଦେଇ ଯାଇଥିବା ରାସ୍ତା ଅମ୍ବାପାଲି ଏବଂ ବଲାଙ୍ଗୀର ରାସ୍ତାକୁ ସଂଯୋଗ କରୁଛି। ଫଳରେ ଏହି ରାସ୍ତା ଉପରେ ଅନେକ ଲୋକ ନିର୍ଭର କରୁଛନ୍ତି। ତେବେ ଉକ୍ତ ରାସ୍ତା ଜବରଦଖଲ ଯୋଗୁ ଦିନକୁ ଦିନ ସଙ୍କୁଚିତ ହୋଇ ପଡ଼ୁଛି ଏବଂ ଟ୍ରାଫିକ ସମସ୍ୟା ନିତିଦିନିଆଁ ଘଟଣାରେ ପରିଣତ ହୋଇଛି। ଫଳରେ ଉକ୍ତ ରାସ୍ତାରୁ ଜବରଦଖଲ ଉଚ୍ଛେଦ ସହରବାସୀଙ୍କ ଦୀର୍ଘଦିନର ଦାବି ରହିଛି। କିନ୍ତୁ ପ୍ରଶାସନ ଏହି ରାସ୍ତାରୁ ଜବରଦଖଲ ଉଚ୍ଛେଦ କରୁନାହିଁ। ଗତ ସାଧାରଣ ନିର୍ବାଚନ ପୂର୍ବରୁ ସହରବାସୀଙ୍କ ଦୃଢ଼ ଦାବି ପରେ ପ୍ରଶାସନ ଉଚ୍ଛେଦ ଅଭିଯାନ ଆରମ୍ଭ କରିଥିଲା। କିନ୍ତୁ ଘଟଣାଟି ଉଚ୍ଚ ନ୍ୟାୟାଳୟକୁ ଯାଇଥିଲା। ଉଚ୍ଚ ନ୍ୟାୟାଳୟ ମଧ୍ୟ ବର୍ଷକ ମଧ୍ୟରେ ୨ଥର ଉଚ୍ଛେଦ ସପକ୍ଷରେ ରାୟ ଦେଇସାରିଛନ୍ତି। ତଥାପି ପ୍ରଶାସନ ହାତ ବାନ୍ଧି ବସିଥିବାବେଳେ ରାସ୍ତା ଉପରେ ବେଆଇନ ପାର୍କିଂ ଜନ ଅସନ୍ତୋଷକୁ ତୀବ୍ର କରିବାରେ ଲାଗିଛି।
ଲେଙ୍ଗୁ ମିଶ୍ର ଛକ-ଜିରା ବ୍ରିଜ୍ ରାସ୍ତା ଜବରଦଖଲ ଉଚ୍ଛେଦକୁ ନେଇ ନୀରବ ଦ୍ରଷ୍ଟା ସାଜିଥିବା ପ୍ରଶାସନ ଗୁରୁବାର ଜିରା ନଦୀ କୂଳ ଅମ୍ବାପାଲିର ସରକାରୀ ଜମିରେ ନିର୍ମିତ ୨ବୃଦ୍ଧାଙ୍କ ଘର ଉଚ୍ଛେଦ ପ୍ରକ୍ରିୟା ଆରମ୍ଭ କରିଥିଲା। ଲେଙ୍ଗୁ ମିଶ୍ର ଛକ-ଜିରା ବ୍ରିଜ୍ ରାସ୍ତା ଜବରଦଖଲରେ ବହୁ ପ୍ରତିପତ୍ତିଶାଳୀ ବ୍ୟକ୍ତି ସମ୍ପୃକ୍ତ ଥିବାରୁ ପ୍ରଶାସନ ସେଠାରେ ନିର୍ମିତ କୋଠାବାଡ଼ିକୁ ଉଚ୍ଛେଦ କରୁନାହିଁ। ଅନ୍ୟପଟେ ଗରିବ ବୃଦ୍ଧାଙ୍କ ଘରକୁ ବୁଲଡୋଜର ଲଗାଇ ଭାଙ୍ଗିବା ପାଇଁ ଆଗେଇ ଆସିବା ଘଟଣାକୁ ମଧ୍ୟ ସହରବାସୀଙ୍କୁ ଚକିତ କରିଛି। ଉଚ୍ଛେଦ ପ୍ରକ୍ରିୟାରେ ଏଭଳି ଆଭିମୁଖ୍ୟ ନେଇ ବରଗଡ଼ ପ୍ରଶାସନକୁ ସୋସିଆଲ ମିଡ଼ିଆରେ ସମାଲୋଚନା କରାଯିବା ଘଟଣା ମଧ୍ୟ ଚର୍ଚ୍ଚାର ବିଷୟ ହୋଇଛି।
