କେନ୍ଦୁଝର,୧୮ା୧୨ (ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ତହସିଲ ଅନ୍ତର୍ଗତ କଣ୍ଟିଆପାଳ ମୌଜାରେ ବେଆଇନ ପଥର କ୍ୱାରୀକୁ ନେଇ ଏନ୍ଜିଟିରେ ତଦନ୍ତ ରିପୋର୍ଟ ଦାଖଲ ହୋଇଛି। ଇକୋ ସେନସିଟିଭ ଜୋନର ଚୂଡ଼ାନ୍ତ ବିଜ୍ଞପ୍ତି ନ ଆସିଲା ପର୍ଯ୍ୟନ୍ତ ଉକ୍ତ ଏରିଆରେ ଖଣି ଖନନ ରୋକିବା ପାଇଁ କମିଟି ପ୍ରସ୍ତାବ ଦେଇଛି। ଜିଲାପାଳଙ୍କ ନେଇ ଗଠିତ ଟିମ୍ ତଦନ୍ତ କରି ଗତ ବୁଧବାର ରିପୋର୍ଟ ଦାଖଲ କରିଥିଲା। ବିରକିଶୋର ଦାସ ଏବଂ ଅନ୍ୟମାନେ ଏହି ମାମଲା ରାଜ୍ୟ ସରକାର ଓ ଅନ୍ୟମାନଙ୍କ ବିରୋଧରେ ନୂଆଦିଲ୍ଲୀସ୍ଥିତ ଜାତୀୟ ଗ୍ରୀନ ଟ୍ରିବ୍ୟୁନାଲରେ କେସ କରିଥିଲେ।
ମାମଲା ରୁଜୁ କରି ଏନଜିଟି ଏହାର ଯୁଗ୍ମ ତଦନ୍ତ କରିବା ପାଇଁ ଜିଲାପାଳଙ୍କୁ ଆଦେଶ କରିଥିଲେ। ତଦନ୍ତ କମିଟିରେ ଜିଲାପାଳଙ୍କ ସମେତ ଆନନ୍ଦପୁର ବନ୍ୟପ୍ରାଣୀ ଡିଭିଜନର ଡିଏଫଓ, ଯୁଗ୍ମ ନିର୍ଦ୍ଦେଶକ, ଭୂତତ୍ତ୍ୱ ବିଭାଗ ଏବଂ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ଗତ ନଭେମ୍ବର ୧୪ରେ ଗସ୍ତ କରି ତଦନ୍ତ କରି ରିପୋର୍ଟ ପ୍ରଦାନ କରିଛନ୍ତି। ଓଏମ ନଂ. ୫୫୩/୨୦୨୨ରେ ଏହି ମାମଲା ହୋଇ ତଦନ୍ତ ବେଳେ ଖଣିର କଣ୍ଟିପାଳ ମୌଜାର ପ୍ଲଟ୍ ମୁଖ୍ୟ ପିଟ୍ ପ୍ଲଟ ନଂ .୨୪୨୫ ଖାତା ନଂ. ୮୬୩ରେ ସମୁଦାୟ ୪୧.୪୫ ଏକର ପରିମିତ ଜମିରେ ରହିଛି। ସମୁଦାୟ ୩ଟି ମାଇନିଂ ପିଟ ରହିଥିବାବେଳେ ସମୁଦାୟ ଏରିଆ ୦.୯୩ ହେକ୍ଟର ରହିଛି। ସେହିପରି ଉକ୍ତ ପ୍ଲଟ୍ରେ ଅନେକ ଛୋଟ ଛୋଟ କ୍ୱାରୀ ମଧ୍ୟ ରହିଛି। ମୁଖ୍ୟ ମାଇନିଂ ପିଟ୍ ଗୁଡ଼ିକ ହଦଗଡ଼ ବନ୍ୟପ୍ରାଣୀ ଅଭୟାରଣ୍ୟ ସୀମାରୁ ୧.୨୬ କିଲୋମିଟର ଦୂରରେ ରହିଥିବାବେଳେ ପ୍ରସ୍ତାବିତ ଇକୋ ସେନସିଟିଭ ଜୋନ ବା ପରିବେଶ ସମ୍ବେଦନଶୀଳ ଜୋନ୍ ସୀମାରୁ ୦.୭୬ କିଲୋମିଟର ଏବଂ ପ୍ରସ୍ତାବିତ ବ୍ୟାଘ୍ର କରିଡର ସୀମାଠାରୁ ପ୍ରାୟ ୧.୧୮ କିଲୋମିଟର ଦୂରରେ ରହିଛି। ଏହି ପଥର କ୍ୱାରୀ ୧୯୯୦ ରୁ ୨୦୧୪-୧୫ ପର୍ଯ୍ୟନ୍ତ ଲିଜ ରହିଥିବା ଉଲ୍ଲେଖ ରହିଛି। ଇକୋ ସେନସିଟିଭ ଜୋନର ଚୂଡ଼ାନ୍ତ ବିଜ୍ଞପ୍ତି ନ ଆସିଲା ପର୍ଯ୍ୟନ୍ତ ଉକ୍ତ ଏରିଆରେ ଖଣି ଖନନ ରୋକିବା ପାଇଁ କମିଟି ପ୍ରସ୍ତାବ ଦେଇଛି। ଅନ୍ୟପକ୍ଷରେ ସେଠାରେ କୌଣସି ବେଆଇନ ଖଣି କାର୍ଯ୍ୟ ହୋଇ ନ ଥିବା ଆନନ୍ଦପୁର ତହସିଲଦାର କମିଟି ଆଗରେ ଜଣାଇଥିଲେ। ବନ ବିଭାଗ ଉକ୍ତ ସ୍ଥାନର ମୂର୍ତ୍ତିକା ଏବଂ ଆଦ୍ରତା ସଂରକ୍ଷଣ ପାଇଁ ପଦକ୍ଷେପ ନେବାକୁ ପ୍ରସ୍ତାବ ଦେଇଛନ୍ତି।
