ଦିଗପହଣ୍ଡି,୨୭।୧୦(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଅଞ୍ଚଳରେ ଅବକାରୀ ବିଭାଗ ପକ୍ଷରୁ ଚୋରା ମଦ ଧରପକଡକୁ ଜୋରଦାର କରାଯାଇଛି। ଚିକିଟି ଅବକାରୀ ରେଞ୍ଜ ଇନ୍ସପେକ୍ଟର ସଞ୍ଜୟ କୁମାର ପଣ୍ଡା ସଦଳବଳେ ସୋମବାର ସକାଳେ ଦିଗପହଣ୍ଡି ଥାନା ଅନ୍ତର୍ଗତ କେରାଣ୍ଡିମାଳ ପାହାଡ଼ର ନୂଆଗାଁ, ଢେପାଗୁଡା ଗ୍ରାମ ନିକଟ ପାହାଡିଆ ଦୁର୍ଗମ ଜଙ୍ଗଲ ଓ ଝରଣା ନିକଟବର୍ତ୍ତୀ ଅଞ୍ଚଳରେ ଚଢ଼ାଉ କରି ଚୋରା ମଦ ଭାଟି ସମ୍ପୂର୍ଣ୍ଣ ନଷ୍ଟ କରିଥିବା ଜଣାପଡିଛି। ଜଙ୍ଗଲ ମଧ୍ୟରେ ଚାଲିଥିବା ବେଆଇନ ମଦ ଭାଟିରେ ଦେଶୀମଦ ପ୍ରସ୍ତୁତି ପାଇଁ ବ୍ୟବହୃତ ପ୍ରାୟ ୧୨ଶହ ଲିଟର ଗୁଡ଼ ପିଡ଼ିଆ ପୋଚ ଓ ୯୦ ଲିଟର ଅପମିଶ୍ରିତ ଦେଶୀମଦ ସହ ୬ ଟି ପ୍ଲାଷ୍ଟିକ ଡ୍ରମକୁ ଜବତ କରାଯାଇଛି। ଏହି ମଦ ପ୍ରସ୍ତୁତି ଓ ଚୋରାଚାଲାଣରେ ସମ୍ପୃକ୍ତ ବଡ଼ଡୁମ୍ବୁଳା ପଞ୍ଚାୟତ ନୂଆଗାଁର ମୁନା ମଲ୍ଲିକ ଏବଂ ଡେଙ୍ଗାପଦର ପଞ୍ଚାୟତ ଢେପାଗୁଡ଼ା ଗ୍ରାମର ବୁଦ୍ଧିଆ ମଲ୍ଲିକଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। ସେହିପରି ଦିଗପହଣ୍ଡି ଅବକାରୀ ଥାନା ଓଆଇସି ଅନିତା ପ୍ରଧାନ, ଏଏସଆଇ ଏନ. ତ୍ରିପତି, କନେଷ୍ଟବଳ ରାଜେଶ କୁମାର ଜେନା,ବଳରାମ ପାତ୍ର,ପୃଥ୍ବୀରାଜ ସ୍ବାଇଁ ପ୍ରମୁଖ ରବିବାର ସନ୍ଧ୍ୟାରେ ଆଦିବାସୀ ବହୁଳ ତେଲିଆପଲ୍ଲି, ନୂଆଗାଁ ପ୍ରଭୃତି ଗ୍ରାମରେ ଚଢ଼ାଉ କରି ୭୯ ଲିଟର ଦେଶୀମଦ ଜବତ କରିଥିଲେ। ମଦ ବିକ୍ରି ଓ ଚୋରାଚାଲାଣରେ ସମ୍ପୃକ୍ତ ଥିବା ଢେପାଗୁଡ଼ା ଗ୍ରାମର ରାକେଶ ମଲ୍ଲିକ,ବିରିବାଡ଼ିଆ ଗ୍ରାମର କୈଳାସ ମଲ୍ଲିକ ଏବଂ ନୂଆଗାଁର ବିଷ୍ଣୁ ମଲ୍ଲିକଙ୍କୁ ଗିରଫ କରାଯାଇ ସୋମବାର କୋର୍ଟଚାଲାଣ କରାଯାଇଥିବା ଅବକାରୀ ଓଆଇସି କହିଛନ୍ତି।
Dharitri – The Largest & Most Trusted Odia Daily
\
