ଛତ୍ରପୁର,୧୦।୩(ଡି.ଏନ୍.ଏ.): ଗଞ୍ଜାମ ଜିଲାରେ ସମୁଦ୍ରରୁ ବେଆଇନ ଭାବରେ ମାଛଧରାକୁ ବନ୍ଦ କରିବା ନେଇ ଅତିରିକ୍ତ ଜିଲାପାଳ କବିନ୍ଦ୍ର କୁମାର ସାହୁଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ମା’ ଗଙ୍ଗା ଦେବୀ ସାମୁଦ୍ରିକ ମତ୍ସ୍ୟଜୀବୀ ସଂଘ ପକ୍ଷରୁ ବଡ଼ନୋଳିଆନୂଆଗାଁ, ସାନନୋଳିଆନୂଆଗାଁ, ଗୋଖରକୁଦା, ପୋଡମପେଟା, ନୂଆଁପୋଡମପେଟା, କଲରାବାଡି, ପ୍ରୟାଗୀ ଓ ରାମଲେଙ୍କା ଗ୍ରାମର ସାମୁଦ୍ରିକ ମତ୍ସ୍ୟଜୀବୀମାନେ ରିଙ୍ଗଜାଲ, ଘାଘରାଜାଲ, ଟେଙ୍କଜାଲକୁ ସମୁଦ୍ରରେ ଚାଲିଥିବା ଏହି ବେଆଇନ ମାଛଧରାକୁ ବନ୍ଦ କରିବାକୁ ଦାବିପତ୍ର ପ୍ରଦାନ କରିଛନ୍ତି। ଏ ନେଇ ଦୀର୍ଘ ୧୫ ବର୍ଷ ହେଲା ସେମାନେ ବେଆଇନ ଭାବେ ମାଛ ଧରିବା ବନ୍ଦ କରିବା ପାଇଁ ଦାବି କରି ଆସୁଛନ୍ତି। ସମୁଦ୍ରରେ ଅଲିଭ ରିଡଲେ କଇଁଛଙ୍କ ସୁରକ୍ଷା ପାଇଁ ଓଡ଼ିଶା ସରକାର ବହୁ ପଦକ୍ଷେପ ମାନ ଗ୍ରହଣ କରୁଛନ୍ତି। କିନ୍ତୁ ଏହି ଜାଲ ଦ୍ବାରା ମାଛ ଧରିଲେ କଇଁଛ ମାନଙ୍କ ଅଣ୍ଡାଦାନ ପ୍ରକ୍ରିୟା ବାଧାପ୍ରାପ୍ତ ହେବା ସହ ମୃତ୍ୟୁ ଘଟୁଛି। ଏହି ଜାଲ ମାଧ୍ୟମରେ ମାଛ ଧରିବାକୁ ରାଜ୍ୟ ସରକାର ନିଷେଧାଦେଶ ଜାରି କରିଛନ୍ତି। ସାନଆର୍ଯ୍ୟପଲ୍ଲି ଓ ବଡଆର୍ଯ୍ୟପଲ୍ଲି ଗ୍ରାମର ସାମୁଦ୍ରିକ ମତ୍ସ୍ୟଜୀବୀମାନେ ଉକ୍ତ ଜାଲ ବ୍ୟବହାର କରୁଛନ୍ତି ବୋଲି ଦର୍ଶାଇଛନ୍ତି। ଯାହା ସରକାରଙ୍କ ନିର୍ଦ୍ଦେଶନାମାକୁ ଅବମାନନା କରୁଛନ୍ତି। ଏହି ୮ ଖଣ୍ଡ ଗ୍ରାମର ମତ୍ସ୍ୟଜୀବୀମାନେ ସେମାନଙ୍କ ଜୀବନଜୀବିକା ଉପରେ ଘୋର ପ୍ରଭାବ ପଡୁଛି ବୋଲି ଅଭିଯୋଗ କରିଛନ୍ତି। ଦାବି ପତ୍ର ପ୍ରଦାନ ବେଳେ ସଂଘ ସଭାପତି ଏ. ବାଲମେୟା, ସମ୍ପାଦକ ବି. ବାବାଜୀ, ଉପସଭାପତି ସିମାଦ୍ରି, କୋଷାଧ୍ୟକ୍ଷ କେ. ରାମଚନ୍ଦ୍ର ବେହେରା, ବି. ଗୋରେୟା, ବି. କେଦାର, ଡି. କାଲେୟା, ପି. କାମେୟାଙ୍କ ସମେତ ବହୁ ମତ୍ସ୍ୟଜୀବୀ ଉପସ୍ଥିତ ଥିଲେ।
