କେନ୍ଦୁଝର,୧୭ା୨(ସ୍ବ.ପ୍ର.)-ଜଙ୍ଗଲ ଜମିରେ ଚାଲିଛି ବେଆଇନ ମାଟି ଉଠାଣ। ବାଂଶପାଳ ତହସିଲ ଶୁଆକାଟୀ ରାଜସ୍ବ ନିରୀକ୍ଷକ ଅନ୍ତର୍ଗତ ଉପର ସୁମଠ ଠାରେ ବେଆଇନ ଭାବେ ଜୁଆଙ୍ଗ ଲୋକ ପାଇଥିବା ଜଙ୍ଗଲ ପଟ୍ଟା ଜମିରୁ ମାଟି ଓ ମୋରମ ଉତ୍ତୋଳନ କରାଯାଇ ରାସ୍ତା ନିର୍ମାଣ କାମରେ ବ୍ୟବହାର ହେଉଥିବା ଗ୍ରାମବାସୀ ଅଭିଯୋଗ ହେଉଛି। ଜଙ୍ଗଲ ଜମି ପଟ୍ଟା ଜମି ପାଇଥିବା ଲୋକ କେବଳ ଚାଷ କରିପାରିବେ ବୋଲି ନିୟମ ଥିବା ବେଳେ ରାସ୍ତା କାମ କରୁଥିବା ଠିକା ସଂସ୍ଥା ଆଦିବାସୀଙ୍କୁ ପ୍ରଲୋଭିତ କରି ମାଟି ଓ ମୋରମ ଉଠାଉଥିବା ଅଭିଯୋଗ ହେଉଛି। ଏହାଛଡା ଜଙ୍ଗଲ ଓ ପରିବେଶ କ୍ଷତିଗ୍ରସ୍ତ ହେଉଥିବାରୁ ବନ୍ୟ ପ୍ରାଣୀ, ଗୃହପାଳିତ ପଶୁଙ୍କ ପାଇଁ ବିପଦ ସୃଷ୍ଟି ହେଉଥିବାରୁ ପରିବେଶବିତ୍ମାନେ ଚିନ୍ତା ପ୍ରକଟ କରୁଛନ୍ତି।
ପ୍ରକାଶ ଯେ, ଆଦିବାସୀ ଅଞ୍ଚଳରେ ରାସ୍ତାର ସୁଦୃଢ଼କରଣ ପାଇଁ ଜିଲା ଖଣିଜ ପାଣ୍ଠିରୁ ସୁମଠ ଠାରୁ ରଢୁଆଁ ଗ୍ରାମ ପର୍ଯ୍ୟନ୍ତ ପ୍ରାୟ ୭ କୋଟି ଟଙ୍କା ବ୍ୟୟରେ ରାସ୍ତା ନିର୍ମାଣ ଚାଲିଛି। ତେବେ ରାସ୍ତା ପାଇଁ ୪ କି.ମି. ଦୂରରୁ ମାଟି ଓ ମୋରମ ଆଣିବା ପାଇଁ ବ୍ୟୟ ଅଟକଳ କରାଯାଇଥିବା ବେଳେ ପାଖରୁ ଜଙ୍ଗଲ ଜମି ତଥା ସ୍ଥାନୀୟ ଲୋକଙ୍କୁ ଜଙ୍ଗଲ ଜମି ଅଧିକାର ଆଇନ ବଳରେ ମିଳିଥିବା ପଟ୍ଟା ଜମିରୁ ବେଆଇନ ଭାବରେ ମୋରମ ଉତ୍ତୋଳନ କରି ବିଲ ଫାଙ୍କୁଥିବା ଅଭିଯୋଗ ହେଉଛି । ବର୍ଷା ଦିନେ ଏଠାରେ ପୋଖରୀ ଭଳି ପାଣି ଜମି ରହିବ। ଜଙ୍ଗଲକୁ ଲାଗି ବଡ଼ ବଡ଼ ଖାଲଖମା ସୃଷ୍ଟି ହୋଇଥିବାରୁ ଜୀବଜନ୍ତୁ ଏବଂ ପାଖରେ ଥିବା ସ୍କୁଲ ପିଲାଙ୍କ ପ୍ରତି ବିପଦ ଆଶଙ୍କା ରହିଛି। ଦୈନିକ ଟ୍ରିପ ଟ୍ରିପ ମାଟି ଉତ୍ତୋଳନ ଯୋଗୁ ଜଙ୍ଗଲ ଜମି ପଟ୍ଟା ପାଇଥିବା ଲୋକଙ୍କ ଜମି ଚାଷ ଅନୁପଯୋଗୀ ହୋଇପଡିବ। ଅଭିଯୋଗ ସତ୍ତ୍ୱେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବାରୁ ଅସନ୍ତୋଷ ବଢୁଛି। ଏନେଇ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ମୂରଲୀ ପ୍ରସାଦ କହିଛନ୍ତି ଯେ ୪ କି.ମି. ଦୂରରୁ ମାଟି ବ୍ୟବହାର ପାଇଁ ଏଗ୍ରିମେଣ୍ଟରେ ରହିଛି। ତେବେ ସେ ଏହାର ଯାଞ୍ଚ କରି କାମ ବନ୍ଦ କରିଦେବେ। ତେବେ ଏବାବଦରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ସେବାବଦକୁ ଅର୍ଥ ଆଦାୟ କରିବାକୁ ଦାବି ହେଉଛି । ସେହିପରି ଭୂୟାଁ ଓ ଜୁଆଙ୍ଗ ପୀଢ ରେଞ୍ଜ୍ର ବନାଞ୍ଚଳ ଅଧୀକାରୀ ମାନସ ମୁର୍ମୁ କହିଛନ୍ତି, ଏନେଇ ସେ ବାଂଶପାଳ ତହସିଲଦାରଙ୍କ ସହିତ ଯାଇ ଘଟଣାର ଅନୁସନ୍ଧାନ କରି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବେ। ଅତିରିକ୍ତ ଜିଲାପାଳ ସନ୍ତୋଷ ନାୟକଙ୍କୁ ପଚାରିବାରୁ ବେଆଇନ ହୋଇଥିଲେ ସମ୍ପୃକ୍ତ ଠିକାସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
