କେନ୍ଦୁଝର, ୧୭ା୯ (ସ୍ବ.ପ୍ର.): ଖଣି ଲିଜ୍ ସୀମା ଭିତରେ ବା ଏହାଠାରୁ ୫ କିଲୋମିଟର ବ୍ୟାସାର୍ଦ୍ଧରେ କୌଣସି କ୍ରସର ପ୍ରତିଷ୍ଠା ହୋଇପାରିବ ନାହିଁ ବୋଲି ଷ୍ଟେଟ ଏନ୍ଭାଇରନ୍ମେଣ୍ଟ ଇମ୍ପାକ୍ଟ ଆସେସ୍ମେଣ୍ଟ ଅଥରିଟି (ଏସ୍ଇଆଇଏଏ)ର କଡ଼ା ନିର୍ଦ୍ଦେଶ ରହିଛି। ମାତ୍ର ଏହାର ନିୟମ ଉଲ୍ଲଙ୍ଘନ କରି ଘଟଗାଁ ତହସିଲ ଢେଙ୍କିକୋଟ ରାଜସ୍ବ ସର୍କଲ ଅନ୍ତର୍ଗତ ଖଣ୍ଟଘରଠାରେ ଏକ ପଥର ଖଣି ନିକଟରେ ଆଦିବାସୀ ଜମିରେ ଏଆରଏସ୍ଏସ୍ କମ୍ପାନୀ ଅଧୀନ ଶିବମ କନଡେଭ ନାମକ ସଂସ୍ଥା କ୍ରଶର ପ୍ରତିଷ୍ଠା କରିବା ଘଟଣା ଚର୍ଚ୍ଚାର ବିଷୟ ହୋଇଛି । ଏହାର ତଦନ୍ତ କରିବାକୁ ସ୍ଥାନୀୟ ଲୋକେ ଦାବି କରିଥିତ୍ବା ବେଳେ ରାଜ୍ୟ ପ୍ରଦୂଷଣ ବୋର୍ଡ ଚିଠି ନଂ ୧୫୨୭, ତା ୧୨.୯.୨୦୨୨ରେ ସଂପୃକ୍ତ ସଂସ୍ଥାକୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି।
ଯେ, ଖଣ୍ଟଘର ନିକଟ ଖଜୁରିଜୁଆଣୀଠାରେ ଏନ୍ଏଚ ୨୦ର ବକେୟା କାମ ପାଇଁ ଏକ ପଥର ଖଣି ଲିଜ ଦିଆଯାଇଛି । ତେବେ ଏହା ପରିସରରେ ଶିବମ କନଡେଭ ସଂସ୍ଥାର ଏକ କ୍ରଶର ଦୀର୍ଘ ବର୍ଷ ଧରି ଚାଲିଆସୁଥିବାରୁ ଅସନ୍ତୋଷ ପ୍ରକାଶ ପାଉଛି । ଜିଲା ପ୍ରଶାସନଠାରୁ ସାଇଟିଂ କ୍ରାଇଟେରିଆ ସାର୍ଟିଫିକେଟ ମିଳି ନ ଥିବାବେଳେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ନିକଟରୁ ମଧ୍ୟ ସିଟିଓ ବା କନସେଣ୍ଟ ଟୁ ଅପରେଟ ନ ପାଇ ବେଆଇନ ଭାବେ କ୍ରଶରଟି ଚାଲିଥିବା ଅଭିଯୋଗ ହୋଇଛି। ଏହି କ୍ରଶରଟି ଖଣ୍ଟଘର ମୌଜାର ଖାତା ନଂ ୫୦, ପ୍ଲଟ ନଂ ୩୬୮ର ଏକ ଘରବାଡି କିସମରେ ୨ ଏକର ୯୦ ଡିସିମିଲ ଆଦିବାସୀ ଜମିରେ ପ୍ରତିଷ୍ଠା ହୋଇଥିବା ସ୍ଥାନୀୟ ଲୋକ ସୂଚନା ଦେଇଛନ୍ତି। ତେବେ ଏସ୍ଇଆଇଏଏ ନିୟମ ଉଲ୍ଲଙ୍ଘନ କରି ଶିବମ କନଡେଭ କରିଥିବା କ୍ରଶରକୁ ପ୍ରଶାସନ କିପରି ଅନୁମତି ଦେଇଛି ତାହାକୁ ନେଇ ପରିବବେଶବିତମାନେ ଚିନ୍ତାବ୍ୟକ୍ତ କରିଛନ୍ତି। ଖଜୁରିଜୁଆଣୀ ପ୍ରଥମ କ୍ୱାରୀରୁ କେତେ ପଥର ଖନନ ହେଲା ଏବଂ ଖଣ୍ଟଘର କ୍ରଶରରେ କେତେ କ୍ରସିଂ କରି ବ୍ୟବହାର କରାଗଲା ତାହାର ମାପଚୁପ କରାଯାଉନାହିଁ। ସଂରକ୍ଷିତ ଜଙ୍ଗଲ ନିକଟରେ କ୍ରଶର ହୋଇଥିବାରୁ ଜଳ ଓ ବାୟୁ ପ୍ରଦୂଷଣ ଯୋଗୁ ଜଙ୍ଗଲ ଜୀବଜନ୍ତୁ ପ୍ରଭାବିତ ହେଉଛନ୍ତି। କ୍ରଶର ଧୂଳିଧୂଆଁ ଉକ୍ତ ଅଞ୍ଚଳର ପରିବେଶ ପ୍ରଦୂଷିତ କରୁଛି। ଖଣି ଖନନ ସମୟରେ ୧୮ ଫୁଟରୁ କମ ଖନନ ହେବାର ନିୟମ ଥିଲେ ହେଁ ଉକ୍ତ ଖଣିରେ ୫୦ ଫୁଟରୁ ଅଧିକ ଖାଲ କରି ପଥର ଖୋଳାଯାଇଛି। ଏହାଫଳରେ ଗୃହପାଳିତ ପ୍ରାଣୀଙ୍କ ସହ ବନ୍ୟପ୍ରାଣୀ ସଙ୍କଟରେ ପଡିଛନ୍ତି। ଲଘୁ ଖଣିଜ ସମ୍ପଦ ଚୋରି ରୋକିବାକୁ ରାଜସ୍ବ ବିଭାଗର ଉପରିସ୍ଥ ଅଧିକାରୀ ନିୟମିତ ଯାଞ୍ଚ କରିବାର ନିର୍ଦ୍ଦେଶ ରହିଥିଲେ ହେଁ ଏହା କରାଯାଉ ନ ଥିବାରୁ ବ୍ୟାପକ ରାଜସ୍ବ ହାନୀ ହେଉଛି। ବିନା ଅନୁମତିରେ କ୍ରଶର ପ୍ରତିଷ୍ଠା ହୋଇଥିବାରୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଏହାକୁ ବନ୍ଦ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
ଏନେଇ ଏଆର୍ଏସ୍ଏସ୍ ସଂସ୍ଥାର ପରିଚାଳକ ନିହାର ଦାସ କହିଛନ୍ତି ଯେ କ୍ରଶର ପ୍ରତିଷ୍ଠାରେ କାୈଣସି ଅନିୟମତତା ହୋଇନାହିଁ । କେନ୍ଦୁଝର ସ୍ଥିତ ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ପ୍ରଶାନ୍ତ କର କହିଛନ୍ତି ଏନେଇ ଅଭିଯୋଗ ମିଳିଛି। ଯାଞ୍ଚ କରାଯାଇ ଆଇନଗତ ଭାବରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ।
