ପୁରୀ ଅଫିସ ୧୨ା୧୨: ପୁରୀ ବଡ଼ଦାଣ୍ଡରୁ ଆରମ୍ଭକରି ବେଳାଭୂମି ପର୍ଯ୍ୟନ୍ତ ଅନେକ ବେଆଇନ କୋଠା ନିର୍ମାଣ ହୋଇଛି। କେଉଁଠି ପିକେଡିଏ ନିୟମ ତ ଆଉ କେଉଁଠାରେ ସିଆର୍ଜେଡ୍ ନିୟମକୁ ଖୋଲାଖୋଲି ଉଲ୍ଲଂଘନ କରାଯାଇ ବେଆଇନ କୋଠା ନିର୍ମାଣ ଚାଲିଛି। ଏହା ପ୍ରଶାସନ ପାଇଁ ଚିନ୍ତାର କାରଣ ପାଲଟିଛି। ତେଣୁ ବେଆଇନ ନିର୍ମାଣ ଉପରେ କାର୍ଯ୍ୟାନୁଷ୍ଠାନ ନେବା ପାଇଁ ପ୍ରଶାସନ ଅଣ୍ଟା ଭିଡ଼ିଛି। ଜିଲାପାଳଙ୍କ ନେତୃତ୍ୱରେ ପିକେଡିଏ, ପୁରୀ ପୌରସଂସ୍ଥା, ପୋଲିସ ଏବଂ ରାଜସ୍ବ ବିଭାଗକୁ ନେଇ ଏକ ଟିମ୍ ଗଠିତ ହୋଇଛି। ପ୍ରାଥମିକ ପର୍ଯ୍ୟାୟରେ ସହରରେ ଥିବା ହୋଟେଲ ଓ ଲଜ୍ଗୁଡ଼ିକରେ ଏହି କମିଟି ପକ୍ଷରୁ ଯାଞ୍ଚ ପକ୍ରିୟା ଆରମ୍ଭ ହେବ ବୋଲି ଜଣାପଡ଼ିଛି। ତେବେ ବେଳାଭୂମି ନିକଟରେ ଅନେକ ହୋଟେଲ ସିଆର୍ଜେଡ୍ ନିୟମ ଉଲ୍ଲଂଘନ କରିଥିଲେ ସୁଦ୍ଧା ପିକେଡିଏ ଅଧିକାରୀଙ୍କ ମଧୁଚନ୍ଦ୍ରିକା ଯୋଗୁ ବେଆଇନ ନିର୍ମାଣ ସଂଖ୍ୟା ବଢିବାରେ ଲାଗିଛି ବୋଲି ଅଭିଯୋଗ ହେଉଛି। ବିଳମ୍ବରେ ହେଲେ ମଧ୍ୟ ପ୍ରଶାସନ ଏହା ବିରୋଧରେ ପଦକ୍ଷେପ ନେବାକୁ ନିଷ୍ପତ୍ତି ନେଇଥିବାରୁ ଏହାକୁ ସାଧାରଣରେ ସ୍ବାଗତ କରାଯାଇଛି। ବିଶେଷକରି ପୁରୀ ବେଳାଭୂମିରେ ସିଆର୍ଜେଡ୍ ନିୟମ ଅନୁସାରେ କୂଳରୁ ୫୦୦ ମିଟର ଦୂରରେ ନିର୍ମାଣ ହେବା କଥା। ତେବେ ଏହା ଉଲ୍ଲଂଘନ କରାଯାଇ ୩୦୦ ମିଟର ଭିତରେ ଅନେକ ହୋଟେଲ ଓ ଲଜିଂ ନିର୍ମାଣ କରାଯାଇଥିବା ଜଣାପଡ଼ିଛି। ତେଣୁ ବଡ଼ଦାଣ୍ଡରୁ ଆରମ୍ଭ କରି ବେଳାଭୂମିରେ ହୋଟେଲ ଓ ଲଜ ଉପରେ ଚଢ଼ାଉ କରାଯିବ। ବେଳାଭୂମିରେ ସିଆର୍ଜେଡ୍ ଏବଂ ପିକେଡିଏ ନିୟମ ଉଲ୍ଲଂଘନକାରୀଙ୍କ ହୋଟେଲ ଯାଞ୍ଚ କରିବା ପରେ ତାଙ୍କର ତଥ୍ୟ ରଖାଯିବ। କେଉଁ ସବୁ ହୋଟେଲ କି’ କି ନିୟମ ଉଲ୍ଲଂଘନ କରିଛନ୍ତି ତାହାର ତଥ୍ୟ କମିଟି ପ୍ରସ୍ତୁତ କରାଯିବ। ଏହାପରେ ସେମାନଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ। ସେହିପରି ବଡ଼ଦାଣ୍ଡରେ ମଧ୍ୟ ପିକେଡିଏ ନିୟମ ଉଲଙ୍ଘନ କରି ହୋଟେଲ, କୋଠା ଓ ଶପିଙ୍ଗ ମଲ ନିର୍ମାଣ ହୋଇଛି। ତେଣୁ ଏହି ଟିମ୍ ସମ୍ପୃକ୍ତ ବେଆଇନ ନିର୍ମାଣ ଉପରେ ଯାଞ୍ଚ କରିବ। ତଥ୍ୟ ଆସିବା ପରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଜିଲାପାଳ ସମର୍ଥ ବର୍ମା କହିଛନ୍ତି।
