ସିଂହପୁର,୨୫।୭ (ଅନଙ୍ଗ ଉଦୟ ବେଉରିଆ) ବିଂଝାରପୁର ଥାନା ତଥା ବରୀ ତହସିଲ ଅନ୍ତର୍ଗତ ମଧୁସୁଦନପୁର ରାଜସ୍ବ ନିରିକ୍ଷକଙ୍କ କାର୍ଯ୍ୟାଳୟ ନିକଟ ସୁନ୍ଦରପୁର ଗ୍ରାମରେ ବେଆଇନ ଗୃହ ନିର୍ମାଣକୁ ଗ୍ରାମବାସୀ ମାନେ ବିରୋଧ କରିଛନ୍ତି।
ସୂଚନାଯୋଗ୍ୟ, ସୁନ୍ଦରପୁର ଗ୍ରାମର ଭରତ ଚନ୍ଦ୍ର ମଲିକ ସରକାରୀ ଜମିକୁ ଜବରଦଖଲ କରି ବେଆଇନ ଗୃହ ନିର୍ମାଣ କରୁଛନ୍ତି। ଏହି ଗୃହ ନିର୍ମାଣ ସ୍ଥାନରେ ଗ୍ରାମର ଅଙ୍ଗନବାଡି ଗୃହ ନ ଥିବାରୁ ଏଠାରେ ଅଙ୍ଗନବାଡି କେନ୍ଦ୍ର ଖୋଲିବାକୁ ଗ୍ରାମବାସୀ ନିଷ୍ପତ୍ତି ନେଇଥିଲେ ଓ ଅନ୍ୟାନ୍ୟ ସରକାରୀ ଗୃହ କରିବାକୁ ଯୋଜନା କରିଥିଲେ। ଅଥଚ ସଂପୃକ୍ତ ବ୍ୟକ୍ତି ବେଆଇନ ଭାବେ ଗୃହ ନିର୍ମାଣ କରୁଛନ୍ତି। ଏହି ନିର୍ମାଣ ସ୍ଥାନରେ ଏପ୍ରିଲ ୨୯ରେ ୧୪୪ଧାରା ଜାରି ହେବା ସହ ବରୀ ତହସିଲଦାର ଓ ବିଂଝାରପୁର ଥାନା ଅଧିକାରୀଙ୍କୁ ତଦନ୍ତ କରି କାର୍ଯ୍ୟାନୁଷ୍ଠାନ ପାଇଁ ଯାଜପୁର ଅତିରିକ୍ତ ଜିଲ୍ଲାପାଳ ଓ ରାଜସ୍ବ ବିଭାଗ ନିର୍ଦ୍ଦେଶ ଦେଇଛନ୍ତି। ଅଥଚ ଏ ପର୍ଯ୍ୟନ୍ତ କାର୍ଯ୍ୟାନୁଷ୍ଠାନ ନିଆଯାଇ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ବାଧ୍ୟ ହୋଇ ଗ୍ରାମବାସୀ ଆଜି ୫ଟି ସଚିବ, ଜିଲ୍ଲା ଅରକ୍ଷୀ ଅଧିକ୍ଷକ, ଉପ ଜିଲ୍ଲାପାଳ, ବିଂଝାରପୁର ଥାନା ଅଧିକାରୀ, ବରୀ ତହସିଲଦାରଙ୍କୁ ଲିଖିତ ଭାବେ ଜଣାଇଛନ୍ତି। ବେଆଇନ ଗୃହ ଉଚ୍ଛେଦ ନ ହେଲେ ଗ୍ରାମବାସୀ ମଧୁସୁଦନପୁର ରାଜସ୍ବ ନିରିକ୍ଷକଙ୍କ କାର୍ଯ୍ୟାଳୟ ସମ୍ମୁଖରେ ଅନଶନ କରିବାକୁ ଚେତାବନୀ ଦେଇଛନ୍ତି।
