ଧାମନଗର, ୩।୫(ସ୍ବ.ପ୍ର.) ଭଦ୍ରକ ଜିଲା ଧାମନଗର ବ୍ଲକର ବିଭିନ୍ନ ଅଞ୍ଚଳରେ ବେଆଇନ ଇଟାଭାଟି ଗଢ଼ିଉଠିଛି। ବର୍ତ୍ତମାନ ପ୍ରବଳ ଗ୍ରୀଷ୍ମପ୍ରବାହ ଯୋଗୁ ଅସହ୍ୟ ଗରମ ସାଙ୍ଗକୁ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିପକାଉଛି। ଏଭଳି ସ୍ଥିତିରେ ଜନବସତି ନିକଟରେ ଗଢ଼ି ଉଠିଥିବା ଇଟାଭାଟି ଉତ୍ତାପରେ ସ୍ଥାନୀୟ ଲୋକେ ଅତିଷ୍ଠ ହୋଇପଡୁଛନ୍ତି। ଅନ୍ୟପଟେ ସରକାରଙ୍କ ଅନୁମତି ନ ନେଇ ଇଟାଭାଟି ଚାଲୁଥିବା ବେଳେ ବହୁ ପରିମାଣର ରାଜସ୍ବ ହରାଇବା ସହ ପରିବେଶ ନଷ୍ଟ ହେଉଥିବା ସାଧାରଣରେ ଅଭିଯୋଗ ହେଉଛି।
ତହସିଲ ଅଧୀନ ରାଧାବଲ୍ଲଭପୁର, ମୁସ୍ତଫାପୁର, ଦୋବଲ, ଖଡ଼ିପଦା, ସୋହଡ଼ା, ପଧାନୀ ଓ ଆନନ୍ଦପୁର ପଞ୍ଚାୟତର ଅନେକ ସ୍ଥାନରେ ଇଟା ପଡୁଛି। ଆନନ୍ଦପୁର ପଞ୍ଚାୟତର କାଶିଆ ଛକ, ବୁଢ଼ା ମହାଦେବପାଖ, ସଠଗଁା ଆଦି ଅଞ୍ଚଳରେ ଇଟାଭାଟି ମାଲିକମାନେ ବେପରୁଆ ହୋଇ ଇଟା ପକାଉଛନ୍ତି। ସେହିପରି କାଞ୍ଜିଆପାଳ, ଶୁକଦେବ ହୋସେନ, ମୁସ୍ତଫାପୁର ପଞ୍ଚାୟତ ସ୍ଥିତ ଗେଙ୍ଗୁଟି ନଦୀ କୂଳରେ ଇଟା ପଡୁଛି। କାଞ୍ଜିଆପାଳ ଶୁକଦେବପୁରଠାରେ ମାହାରାକୁ ଲାଗି ଖାଲ ଜମିରୁ ମାଟି ଉଠାଇ ଇଟା ପକାଯାଉଥିବାରୁ ସମଗ୍ର ଅଞ୍ଚଳ ଗଢ଼ିଆ ହୋଇଗଲାଣି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ୨୦୧୩ ଜୁନ୍ ୨୪ରେ ଜାରି କରାଯାଇଥିବା କେନ୍ଦ୍ର ପରିବେଶ ଓ ଜଙ୍ଗଲ ବିଭାଗ ନିୟମାବଳୀ ଅନୁସାରେ ଜନବସତିଠାରୁ ଦେଢ଼ କି.ମି. ଭିତରେ ଇଟାଭାଟି କରାଯିବ ନାହିଁ। ଇଟାଭାଟି ପାଇଁ ୨ ମିଟରରୁ ଅଧିକ ଗଭୀରର ମାଟି ଖୋଳାଯିବ ନାହିଁ। ଏସବୁ ବ୍ୟତୀତ ଇଟା ପକାଇବା ଲାଗି ରାଜ୍ୟ ପରିବେଶ ଏବଂ ପ୍ରଦୂଷଣ ନିୟନ୍ତ୍ରଣ ବିଭାଗଠାରୁ ଏନ୍ଓସି ଆଣିବାକୁ ହେବ। ଠିକ୍ ସେମିତି ରାଜ୍ୟ ସରକାରଙ୍କ ପରିବେଶ ଆଇନ ଅନୁସାରେ ଚାଷଜମିରେ ଇଟା ପକାଯାଇପାରିବ ନାହିଁ। ଅନୁଷ୍ଠାନ ଓ ସରକାରୀ କାର୍ଯ୍ୟାଳୟ ନିକଟରେ ଇଟା ପଡ଼ିପାରିବ ନାହିଁ। ଇଟାଭାଟିରୁ ଆଉ ଗୋଟିଏ ଇଟାଭାଟି ମଧ୍ୟରେ ଅତିକମ୍ରେ ୧ କିଲୋମିଟର ଦୂରତା ରହିବା କଥା। ହେଲେ ଏ ସମସ୍ତ ନିୟମକୁ ଉଲ୍ଲଂଘନ କରାଯାଇ ଇଟା ପକାଯାଉଛି। ଧାମନଗର ତହସିଲ କି ପରିବେଶ ବିଭାଗ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ଅଭିଯୋଗ ହେଉଛି। ଏ ସମ୍ପର୍କରେ ତହସିଲଦାର କ୍ଷୀରୋଦ ପଣ୍ଡା କହିଛନ୍ତି, ଯେଉଁଠି ଇଟା ପଡ଼ୁଛି, ଖବର ମିଳିବା କ୍ଷଣି ଚଢ଼ାଉ କରାଯିବା ସହ ଫାଇନ ଆଦାୟ ହେଉଛି। ବେଆଇନ ଇଟାଭାଟି ବନ୍ଦ କରିବାକୁ ପ୍ରୟାସ କରାଯାଉଛି।
