ନାଉଗାଁ,୧୨ା୧୨(ସ୍ବ.ପ୍ର.): ନାଉଗାଁ ତହସିଲ ଅଞ୍ଚଳରେ ବେଆଇନ ଇଟାଭାଟି ସଂଖ୍ୟା ଦିନକୁ ଦିନ ବଢ଼ିଚାଲିଛି। ସରକାରୀ ଆଇନକୁ ଖୋଲା ଉଲ୍ଲଂଘନ କରି ଏସବୁ ଇଟାଭାଟି ଚାଲିଥିଲେ ମଧ୍ୟ ପ୍ରଶାସନ ପକ୍ଷରୁ ସେପରି କୌଣସି କାର୍ଯ୍ୟାନୁଷ୍ଠାନ ନିଆଯାଉନାହିଁ।
ସରକାରୀ ନିୟମାନୁସାରେ, ଇଟାଭାଟି ପୋଡ଼ିବା ପୂର୍ବରୁ ତହସିଲ ପକ୍ଷରୁ ଇଟା ପକାଇବା ପାଇଁ ଆବେଦନ କରିବେ। ଉକ୍ତ ଆବେଦନକୁ ବିଚାର କରାଯାଇ ତହସିଲ ପକ୍ଷରୁ ଇଟାଭାଟି ପାଇଁ ଅନୁମତି ପ୍ରଦାନ କରାଯିବ। କିନ୍ତୁ ବ୍ଲକରେ ବର୍ଷ ବର୍ଷ ଧରି ବିନା ଅନୁମତିରେ ଇଟା ପୋଡ଼ାଚାଲିଛି। ତହସିଲ ପ୍ରଶାସନ ପକ୍ଷରୁ କେବେ କେମିତି ଏସବୁ ବେଆଇନ ଇଟାଭାଟି ଉପରୁ ଜରିମାନା ଆଦାୟ କରାଯାଉଛି। ମାତ୍ର ଇଟା ବେପାରୀମାନେ ଜରିମାନାକୁ ଡରୁନାହାନ୍ତି। ଏହା ଦେବା ପରେ ମଧ୍ୟ ପୁନର୍ବାର ଇଟା ପୋଡ଼ି ଚାଲିଛନ୍ତି।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ଉକ୍ତ ତହସିଲ ଅଧୀନରେ ୫ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ରହିଛି। ମାତ୍ର ଅଧିକାଂଶ ସ୍ଥାନରେ ରାଜସ୍ବ ନିରୀକ୍ଷକମାନେ ବେଆଇନ ଇଟାପୋଡ଼ି ସମ୍ପର୍କରେ ଜାଣି ନ ଥିବାରୁ ସେମାନଙ୍କ କାର୍ଯ୍ୟକାରିତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ବିଶେଷକରି ଏହି ତହସିଲ ଅଧୀନରେ ଥିବା ଦେବୀନଦୀ ପଠା, କୋରୁଅ ପଞ୍ଚାୟତର ଡାହାଣିଖିଆ ଉଚ୍ଚ ପ୍ରାଥମିକ ବିଦ୍ୟାଳୟ ସମ୍ମୁଖ, ଡେରିକି ରାଜସ୍ବ କାର୍ଯ୍ୟାଳୟ ନିକଟ ଓ ବିଭିନ୍ନ ରାସ୍ତାପାର୍ଶ୍ୱରେ ବେଆଇନ ଇଟାଭାଟି ହୋଇ ପୋଡ଼ାଚାଲିଛି।
ଭାଟିରେ ଇଟା ପୋଡ଼ା ଯୋଗୁ ସ୍ଥାନୀୟ ଅଞ୍ଚଳ ଧୂଆଁମୟ ହୋଇଯାଉଛି। ଫଳରେ ବାୟୁ ପ୍ରଦୂଷଣ ହେବା ସହ ଛୋଟପିଲା,ବୃଦ୍ଧାବୃଦ୍ଧ ଧୂଆଁରେ ଅଣନିଃଶ୍ୱାସୀ ହୋଇଯାଉଛନ୍ତି। ବିଦ୍ୟାଳୟ, ଜନବସତି, ରାସ୍ତାପାର୍ଶ୍ୱ, ସରକାରୀ ସ୍ଥାନରେ ଇଟାଭାଟି ହୋଇପାରିବ ନାହିଁ ବୋଲି ସରକାରୀ ନିୟମ ରହିଛି। ମାତ୍ର ବ୍ଲକରେ ଏହି ନିୟମକୁ ଅଣଦେଖା କରାଯାଉଛି। ବର୍ତ୍ତମାନ ତାପମାତ୍ରା କମ୍ ରହିଥିବାବେଳେ ଶୀତର ପ୍ରକୋପ ଅଧିକ ରହିଛି। ଏହି ଋତୁରେ ଥଣ୍ଡା ଯୋଗୁ ଶ୍ୱାସରୋଗୀମାନେ ବିଭିନ୍ନ ସମସ୍ୟାର ସମ୍ମୁଖୀନ ହୋଇଥାନ୍ତି। ମାତ୍ର ଇଟାଭାଟି ଧୂଆଁ ସଂସ୍ପର୍ଶରେ ଆସି ଦୀର୍ଘଦିନ ଧରି କାଶ ହେଉଥିବା ନେଇ ଅନେକ ଶ୍ୱାସରୋଗୀ ମତବ୍ୟକ୍ତ କରିଛନ୍ତି। ଇଟା ପୋଡ଼ି ଯୋଗୁ ପରିବେଶ ପ୍ରଦୂଷିତ ହେଉଛି ବୋଲି ବୁଦ୍ଧିଜୀବୀମାନେ କହିଛନ୍ତି। ଏସବୁ ସମସ୍ୟାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ବେଆଇନ ଇଟାଭାଟି ଉପରେ ଚଢ଼ାଉ କରାଯାଇ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ତହସିଲଦାର ଜେ.କଳ୍ପନା କହିଛନ୍ତି, ଯେଉଁସବୁ ସ୍ଥାନରେ ଇଟାଭାଟି ରହିଛି, ସେଠାକୁ ସ୍ଥାନୀୟ ରାଜସ୍ବ ନିରୀକ୍ଷକଙ୍କୁ ପଠାଇ ତଦନ୍ତ କରାଯିବ। ବେଆଇନ ଇଟାଭାଟି ଚିହ୍ନଟ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
