ନୂଆଦିଲ୍ଲୀ,୧୯।୧:ପ୍ରୟାଗରାଜର ମହାକୁମ୍ଭମେଳାର ମୁଖ୍ୟ ଆକର୍ଷଣ ପାଲଟିଥିବା ଆଇଆଇଟି ବାବା ବା ଆଇଆଇଟି ବମ୍ବେର ପୂର୍ବତନ ଏରୋସ୍ପେସ ଇଞ୍ଜିନିୟର ଅଭୟ ସିଂହଙ୍କୁ ତାଙ୍କ ଆଖଡାରୁ ବହିଷ୍କାର କରାଯାଇଛି। ଗଣମାଧ୍ୟମ ରିପୋର୍ଟ ଅନୁସାରେ, ‘ଆଇଆଇଟିଆନ ବାବା’ ଭାବରେ ଜଣାଶୁଣା ଶ୍ରୀ ସିଂହଙ୍କୁ ତାଙ୍କ ଗୁରୁ ମହନ୍ତ ସୋମେଶ୍ୱର ପୁରୀଙ୍କ ବରୋଧରେ ଅପମାନଜନକ ଭାଷା ବ୍ୟବହାର କରିବାରୁ ଜୁନା ଆଖଡ଼ା ଶିବିର ଏବଂ ଏହାର ଆଖପାଖ ଅଞ୍ଚଳରେ ପ୍ରବେଶ କରିବାକୁ ବାରଣ କରାଯାଇଛି। ଏନେଇ, ଜୁନା ଆଖାରାର ଜଣେ ସଦସ୍ୟ କହିଛନ୍ତି ଯେ ସେ ସେମାନଙ୍କ ସହିତ ଜଡିତ ନୁହଁନ୍ତି।
ସେ ଆମକୁ ବଦନାମ କରୁଥିଲେ। ସେ ସାଧୁ ନ ଥିଲେ, ଜଣେ ଯାଯାବର ଥିଲେ। ସେ ଟିଭିରେ ଏଣୁତେଣୁ କହୁଥିଲେ। ତେଣୁ ତାଙ୍କୁ ବାହାର କରିଦିଆଗଲା। ସଦସ୍ୟ ଜଣକ ଏପରି ମଧ୍ୟ କହିଛନ୍ତି ଯେ ସେ କାହାର ଶିଷ୍ୟ ମଧ୍ୟ ନୁହଁନ୍ତି।
ତେବେ ଆଇଆଇଟିଆନ ବାବା ଏନେଇ ମୁହଁ ଖୋଲିଛନ୍ତି। ସେ କହିଛନ୍ତି, ତାଙ୍କୁ ଆଖଡାରୁ ବାହାର କରାଯାଇନି। ଆଖଡାର ସାଧୁମାନେ ଗୁଜବ ପ୍ରସାର କରୁଥିବା ଅଭିଯୋଗ ସେ କରିଥିଲେ। ଇନଷ୍ଟାଗ୍ରାମରେ ୩ଲକ୍ଷରୁ ଅଧିକ ଫଲୋଅର୍ସ ଥିବା ଶ୍ରୀ ସିଂହ କହିଛନ୍ତି, ଆଖଡାର ସାଧୁମାନେ ଭାବୁଛନ୍ତି କି, ମୁଁ ପ୍ରସିଦ୍ଧ ହୋଇଗଲିଣି ଏବଂ ମୁଁ ସେମାନଙ୍କ ବିଷୟରେ କିଛି ଖୁଲାସା କରିଦେବି। ସେମାନେ ବେକାର କଥା ଗପୁଛନ୍ତି।
