ପଟ୍ଟାମୁଣ୍ଡାଇ,୩ା୨(କଳ୍ପତରୁ ନାୟକ): ସୀମା ପୁନଃ ନିର୍ଦ୍ଧାରଣରେ ପଟ୍ଟାମୁଣ୍ଡାଇ ନିର୍ବାଚନମଣ୍ଡଳୀ ଉଚ୍ଛେଦ ପରେ ପଟ୍ଟାମୁଣ୍ଡାଇ ଅଞ୍ଚଳ ଅବହେଳିତ ହେବା ସହ ସ୍ବାଭିମାନ ନିଶ୍ଚିହ୍ନ ହେବାକୁ ବସିଛି । ପଟ୍ଟାମୁଣ୍ଡାଇର ସ୍ବାଭିମାନ ଫେରାଇ ଆଣିବା ପାଇଁ କେତେକ ସଙ୍ଗଠନ ଉଦ୍ୟମ ଜାରି ରଖିଥିବାବେଳେ ଶାସକ ଦଳର ପୃଷ୍ଠପୋଷକତା ଲାଭ କରିଥିବା କେତେଜଣ ରାଜନେତା ସୁନେଲି ସ୍ବପ୍ନ ଦେଖାଇ ଚାଲିଛନ୍ତି । ଅନ୍ୟପକ୍ଷେ ଅର୍ନ୍ତଦ୍ୱନ୍ଦ୍ୱରେ ବୁଡ଼ି ରହିଥିବା ମୁଖ୍ୟ ବିରୋଧୀ ଦଳମାନେ ନୀରବ ଦର୍ଶକ ସାଜିଛନ୍ତି ବୋଲି ଅଭିଯୋଗ ହୋଇଛି ।
ଏ ସଂକ୍ରାନ୍ତରେ ବୁଦ୍ଧିଜୀବୀ ପ୍ରମୋଦ ସାହୁ, ଅନନ୍ତ ଦାଶ, ପ୍ରବୀର ନାୟକ ପ୍ରମୁଖ କୁହନ୍ତି, କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ନିର୍ବାଚନ ମଣ୍ଡଳୀ ଆସନ ୧୯୬୭ ମସିହାରୁ ସଂରକ୍ଷିତ ହୋଇଥିଲା। ଏହା ପୂର୍ବରୁ ଯୁଗ୍ମ ନିର୍ବାଚନ ମଣ୍ଡଳୀ ଥିଲା। ସେବେଠାରୁ ସଂସ୍କୃତି, ପରମ୍ପରା, ଜୀବନଜୀବିକାର,ରାଜନୀତି ଓ ଚାଷ ଆଦି କ୍ଷେତ୍ରରେ ପଟ୍ଟାମୁଣ୍ଡାଇ ଭାଇଚାରା ଓ ସ୍ବାଭିମାନର ପ୍ରତୀକ ବୋଲି ଜିଲାବାସୀ କହୁଥିଲେ । ମାତ୍ର ୨୦୦୯ ସାଧାରଣ ନିର୍ବାଚନ ପୂର୍ବରୁ ପଟ୍ଟାମୁଣ୍ଡାଇକୁ ଭାଗଭାଗ କରିଦିଆ ଯିବାରୁ ପଟ୍ଟାମୁଣ୍ଡାଇର ସ୍ବାଭିମାନ ହାନୀ ହୋଇଥିଲା । ୨୦୧୪ ପରଠାରୁ ଏହି ସ୍ବାଭିମାନ ଲୋପ ପାଇବାରେ ଲାଗିଛି ।
୧୯୭୬ରେ ପ୍ରଥମ ବିଧାନସଭା ନିର୍ବାଚନରେ ପଟ୍ଟାମୁଣ୍ଡାଇ ନିର୍ବାଚନ ମଣ୍ଡଳୀରୁ ବିଶ୍ୱନାଥ ମଲିକ(ପ୍ରଜା ସମାଜବାଦୀ ପାର୍ଟି), ୧୯୭୧ରେ ପ୍ରହଲ୍ଲାଦ ମଲିକ (ଉତ୍କଳ କଂଗ୍ରେସ), ୧୯୭୪ରେ ବିଶ୍ୱନାଥ ମଲିକ (ଜାତୀୟ କଂଗ୍ରେସ), ୧୯୭୭ରେ ତାପସ ଦାସ (ଜନତା ଦଳ), ୧୯୮୦ରେ ବିଶ୍ୱନାଥ ମଲିକ (କଂଗ୍ରେସ), ୧୯୮୫ରେ ଗଣେଶ୍ୱର ବେହେରା (କଂଗ୍ରେସ), ୧୯୯୦ରେ ରାଧାକାନ୍ତ ସେଠୀ (ସିପିଏମ ) ୧୯୯୫ରେ ଗଣେଶ୍ୱର ବେହେରା (କଂଗ୍ରେସ), ୨୦୦୦ରେ ତାପସ ଦାସ (ବିଜେଡି), ୨୦୦୪ରେ କିଶୋର ତରାଇ ବିଜେଡିରୁ ବିଧାୟକ ଭାବେ ନିର୍ବାଚିତ ହୋଇ ପଟ୍ଟାମୁଣ୍ଡାଇ ସ୍ବାଭିମାନକୁ ବଞ୍ଚାଇ ରଖିଥିଲେ । ପଟ୍ଟାମୁଣ୍ଡାଇ ଅଞ୍ଚଳରେ ହେଉଥିବା ସଭା ସମିତିରେ ଦଳଗତ ମତ ନିର୍ବିଶେଷରେ ସମସ୍ତେ ଭାଇଭାଇ ହୋଇ ପଟ୍ଟାମୁଣ୍ଡାଇର ସ୍ବାଭିମାନର ଗାରିମାକୁ ବଜାଇ ରଖିଥିଲେ । ମାତ୍ର ୨୦୦୯ରେ ରାଜନଗର ନିର୍ବାଚନ ମଣ୍ଡଳୀ କରାଯିବା ସହିତ ଅଧିକାଂଶ ନିର୍ବାଚିତ ପ୍ରତିନିଧି ରାଜନଗରରୁ ହୋଇଥିବାରୁ ପଟ୍ଟାମୁଣ୍ଡାଇ ବିକାଶରେ ବ୍ରେକ୍ ଲାଗିବା ସହ ସ୍ବାଭିମାନକୁ ଦଳିମକଚି ଦେଇସାରିଲେଣି । ଖାଲି ବାଇପାସ ଠାରେ ମୋ ସ୍ବାଭିମାନ ମୋ ପଟ୍ଟାମୁଣ୍ଡାଇ ଲେଖି ପଟ୍ଟାମୁଣ୍ଡାଇବାସୀଙ୍କୁ ସୁନେଲି ସ୍ବପ୍ନ ଦେଖାଇଚାଲିଛନ୍ତି।
ପଟ୍ଟାମୁଣ୍ଡାଇ ନିର୍ବାଚନ ମଣ୍ଡଳୀକୁ ଭାଗ ଭାଗ କରି ପଟ୍ଟାମୁଣ୍ଡାଇର ୧୯ ପଞ୍ଚାୟତ ଓ ପୌରପାଳିକାର ୨୦ ୱାର୍ଡ ରାଜନଗର ନିର୍ବାଚନ ମଣ୍ଡଳୀରେ ଏବଂ ୧୨ଟା ପଞ୍ଚାୟତକୁ କେନ୍ଦ୍ରାପଡ଼ା ଆସନରେ ମିଶାଇ ଦିଆଯାଇଛି । ପଟ୍ଟାମୁଣ୍ଡାଇ ବ୍ଲକ ଓ ପୌରାଞ୍ଚଳରେ ଶିକ୍ଷା, ସ୍ବାସ୍ଥ୍ୟ, ପରିବହନ, ଗମନାଗମନ, ସହରୀକରଣ, ଆଇନସେବା, କୃଷି, ଜଳସେଚନ, ରିନୋଭେଶନ ଆଦି କ୍ଷେତ୍ରରେ ଅବହେଳିତ କରାଯାଇଥିବା ବେଳେ ପଟ୍ଟାମୁଣ୍ଡାଇର ସ୍ବାଭିମାନକୁ ଧିରେଧିରେ ଧୁଳିସାତ କରାଯାଉଥିବ ଅଭିଯୋଗ ହୋଇଛି । ଖାଲି ବଡବଡ ବୋର୍ଡରେ ମୋ ସ୍ବାଭିମାନ ମୋ ପଟ୍ଟାମୁଣ୍ଡାଇ ଲେଖି ପଟ୍ଟାମୁଣ୍ଡାଇବାସୀଙ୍କୁ ନିରାଶ କରାଯାଉଛି। ଏଥିନେଇ ପଟ୍ଟାମୁଣ୍ଡାଇର ନେତୃତ୍ୱ ନେଉଥିବା ଶାସକ କିମ୍ବା ବିରୋଧୀଙ୍କ କୌଣସି ସ୍ବତନ୍ତ୍ର ଦୃଷ୍ଟି ଭଙ୍ଗି ରହୁନାହିଁ ବୋଲି ବିଭିନ୍ନ ମହଲରୁ ମତ ପ୍ରକାଶ ପାଉଛି।
