ନୂଆଦିଲ୍ଲୀ,୨୩।୮: ରୁଷୀୟ ତୈଳ କିଣିବା ପାଇଁ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିବା ପାଇଁ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଟାର୍ଗେଟ କରିଥିଲେ। ଶନିବାର (୨୩ ଅଗଷ୍ଟ, ୨୦୨୫) ବୈଦେଶିକ ମନ୍ତ୍ରୀ ଜୋର ଦେଇ କହିଥିଲେ ଯେ ଭାରତ ଶକ୍ତି କ୍ଷେତ୍ରରେ ସ୍ବାଧୀନ ନିଷ୍ପତ୍ତି ନେବା ଜାରି ରଖିବ। ବୈଦେଶିକ ମନ୍ତ୍ରୀ କହିଛନ୍ତି ଯେ ବାଣିଜ୍ୟ ସମର୍ଥନକାରୀ ଆମେରିକା ପ୍ରଶାସନ ପାଇଁ କାମ କରୁଥିବା ଲୋକମାନେ ଅନ୍ୟମାନଙ୍କୁ ବ୍ୟବସାୟ କରୁଥିବାର ଅଭିଯୋଗ କରିବା ହାସ୍ୟାସ୍ପଦ।
ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଧ୍ୟ କହିଛନ୍ତି ଯେ ୱାଶିଂଟନ ସହିତ ବାଣିଜ୍ୟ ଆଲୋଚନା ଚାଲିଛି, କିନ୍ତୁ କିଛି ସୀମା ଅଛି ଯାହାକୁ ଆମକୁ ରକ୍ଷା କରିବାକୁ ପଡିବ। ବୈଦେଶିକ ମନ୍ତ୍ରୀଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ଭାରତ ଉପରେ ଲାଗୁ ହୋଇଥିବା ଅତିରିକ୍ତ ଶୁଳ୍କ ଅଗଷ୍ଟ ୨୭ ତାରିଖରୁ କାର୍ଯ୍ୟକାରୀ ହେବାକୁ ଯାଉଛି। ସେ କହିଛନ୍ତି ଯେ ୟୁରୋପ ଭାରତ ଅପେକ୍ଷା ରୁଷିଆ ସହିତ ବହୁତ ଅଧିକ ବାଣିଜ୍ୟ କରେ।
ଇକୋନୋମିକ ଟାଇମ୍ସ ୱାଲର୍ଡ ଲିଡର୍ସ ଫୋରମ ୨୦୨୫ରେ ବୈଦେଶିକ ମନ୍ତ୍ରୀ କହିଥିଲେ, ‘ଯଦି ଆପଣଙ୍କର ଭାରତରୁ ତେଲ କିମ୍ବା ରିଫାଇନ ଉତ୍ପାଦ କିଣିବାରେ ସମସ୍ୟା ଅଛି, ତେବେ ଏହାକୁ କିଣନ୍ତୁ ନାହିଁ। କେହି ଆପଣଙ୍କୁ ଏହାକୁ କିଣିବାକୁ ବାଧ୍ୟ କରୁନାହାଁନ୍ତି। ୟୁରୋପ ଏବଂ ଆମେରିକା ଏହାକୁ କିଣନ୍ତି, ତେଣୁ ଯଦି ଆପଣ ଏହାକୁ ପସନ୍ଦ କରନ୍ତି ନାହିଁ, ତେବେ ଏହାକୁ କିଣନ୍ତୁ ନାହିଁ। ୨୦୨୨ରେ ତୈଳ ମୂଲ୍ୟ ବୃଦ୍ଧି ନେଇ ଅନ୍ତର୍ଜାତୀୟ ସ୍ତରରେ ଗଭୀର ଚିନ୍ତା ଥିଲା। ସେତେବେଳେ କୁହାଯାଇଥିଲା ଯେ ଯଦି ଭାରତ ରୁଷିଆରୁ ତେଲ କିଣିବାକୁ ଚାହୁଁଛି, ତେବେ ଏହାକୁ କିଣିବାକୁ ଦିଅ, କାରଣ ଏହା ମୂଲ୍ୟକୁ ସ୍ଥିର କରିବ।’
ଟ୍ରମ୍ଫ ପ୍ରଶାସନ ସହିତ ବାଣିଜ୍ୟ ଚୁକ୍ତି ଆଲୋଚନାରେ ସମସ୍ୟାଗୁଡ଼ିକୁ ଗ୍ରହଣ କରି ଏସ ଜୟଶଙ୍କର କହିଛନ୍ତି ଯେ ଭାରତର ନିଜସ୍ବ ‘ରେଡ ଲାଇନ୍’ ଅଛି। ସେ ଗୁରୁତ୍ୱାରୋପ କରିଥିଲେ ଯେ ଭାରତ ସ୍ବାଧୀନ ନିଷ୍ପତ୍ତି ନେବାର କ୍ଷମତା ରଖିଛି। ଏସ ଜୟଶଙ୍କର କହିଛନ୍ତି, ‘ଭାରତୀୟ ତେଲ ଘରୋଇ ଏବଂ ଅନ୍ତର୍ଜାତୀୟ ବଜାରରେ ସ୍ଥିରତା ଆଣିବାରେ ସାହାଯ୍ୟ କରେ। ଆମେ ମୂଲ୍ୟ ସ୍ଥିର ରଖିବା ପାଇଁ ତେଲ କିଣୁଛୁ। ଏହା ନିଶ୍ଚିତ ଭାବରେ ଆମର ଜାତୀୟ ସ୍ବାର୍ଥରେ, କିନ୍ତୁ ଏହା ବିଶ୍ୱ ସ୍ବାର୍ଥରେ ମଧ୍ୟ ରହିଛି।’
