ନୂଆଦିଲ୍ଲୀ, ୨୧।୨: ଚାଷୀ ଆନ୍ଦୋଳନକୁ ସମର୍ଥନ କରିବା ଯଦି ଦେଶଦ୍ରୋହ ହୁଏ, ତେବେ ଜେଲରେ ରହିବା ଭଲ ବୋଲି ଜଳବାୟୁ କର୍ମୀ ଦିଶା ରବିଙ୍କ ଓକିଲ ସିଦ୍ଧାର୍ଥ ଅଗ୍ରଓ୍ବାଲ କହିଛନ୍ତି। ଶନିବାର ଦିଲ୍ଲୀର ଏକ ଅଦାଲତରେ ଦିଶାଙ୍କ ଜାମିନ ଆବେଦନର ଶୁଣାଣି ବେଳେ ସିଦ୍ଧାର୍ଥ ଏହା କହିଥିଲେ। ପଟିଆଲା ହାଉସ୍ କୋର୍ଟ ଉଭୟ ପକ୍ଷର ଯୁକ୍ତି ଶୁଣିବା ପରେ ରାୟ ସଂରକ୍ଷିତ ରଖିଛନ୍ତି।
ଦିଲ୍ଲୀରେ ସାଧାରଣତନ୍ତ୍ର ଦିବସରେ କୃଷକମାନଙ୍କ ଟ୍ରାକ୍ଟର ରାଲି ହିଂସାର ରୂପ ନେଇଥିଲା। ଏହା ପଛରେ ଚାଷୀ ଆନ୍ଦୋଳନ ଟୁଲ୍କିଟ୍ର ସମ୍ପର୍କ ଥିବା ଅଭିଯୋଗରେ ୨୨ ବର୍ଷୀୟ ଜଳବାୟୁ କର୍ମୀ ଦିଶାଙ୍କୁ ଗତ ସପ୍ତାହରେ ବେଙ୍ଗାଲୁରୁରୁ ଗିରଫ କରାଯାଇଥିଲା। ତାଙ୍କ ବିରୋଧରେ ଷଡ଼ଯନ୍ତ୍ର ଓ ଦେଶଦ୍ରୋହ ଅଭିଯୋଗରେ ମାମଲା ରୁଜୁ ହୋଇଛି। ବେଆଇନ ସଂଗଠନ ‘ଶିଖ୍ସ୍ ଫର
ଜଷ୍ଟିସ’ ସହ ଜଳବାୟୁ କର୍ମୀ ଦିଶାଙ୍କ ସମ୍ପର୍କ ଥିବାର କୌଣସି ପ୍ରମାଣ ନାହିଁ ବୋଲି ତାଙ୍କ ଓକିଲ କୋର୍ଟକୁ ଦର୍ଶାଇଥିଲେ। ଅନ୍ୟପକ୍ଷରେ ଦିଲ୍ଲୀ ପୋଲିସ ଯୁକ୍ତି ବାଢ଼ିଥିଲା, ଦିଶା ନିଜ କାର୍ଯ୍ୟର ଆପରାଧିକତା ସମ୍ପର୍କରେ ସଚେତନ ଥିଲେ, ଏହାର ଅଧିକ ତଦନ୍ତ ଆବଶ୍ୟକ। ଭାରତକୁ ବଦ୍ନାମ କରାଇବା ଲାଗି ଯୋଜନା ହୋଇଥିଲା କି ନାହିଁ ତାହା ତଦନ୍ତ ପରେ ଜଣାପଡ଼ିବ ବୋଲି ପୋଲିସ କହିବା ପରେ ଅଦାଲତ ଜାମିନ ଆବେଦନର ରାୟ ଫେବୃୟାରୀ ୨୩କୁ ସଂରକ୍ଷିତ ରଖିଥିଲେ।
ଜଳବାୟୁ କର୍ମୀ ଗ୍ରେଟା ଥନ୍ବର୍ଗ ଟୁଲ୍କିଟ୍ ମାମଲାରେ ସମ୍ପୃକ୍ତି ଅଭିଯୋଗରେ ଗିରଫ ଦିଶା ରବିଙ୍କୁ ଶୁକ୍ରବାର ୩ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିଲା। ତାଙ୍କ ଓକିଲ କୋର୍ଟକୁ କହିଥିଲେ, ବିନା କାରଣରେ ଦିଶା ବିରୋଧ କରିନାହାନ୍ତି। ଏଠାରେ ପରିବେଶ ଓ କୃଷି ପ୍ରସଙ୍ଗ ରହିଛି। ପରିବେଶ ଓ କୃଷି ପରସ୍ପର ସହ ଜଡ଼ିତ ବୋଲି ଦିଶାଙ୍କ ଓକିଲ ଯୁକ୍ତି ବାଢ଼ିଥିଲେ। ଦିଶା ଯୋଗ ଏବଂ ଚା’କୁ ଟାର୍ଗେଟ କରିଥିବା ଏତଲାରେ ଦର୍ଶାଯାଇଥିବାବେଳେ ଏହା କ’ଣ ଅପରାଧ କି ବୋଲି ତାଙ୍କ ଓକିଲ ପ୍ରଶ୍ନ କରିଥିଲେ। ଲାଲ୍କିଲ୍ଲା ହିଂସା ମାମଲାରେ କାହାକୁ ଗିରଫ କରାଯାଇନାହିଁ। କାରଣ ବିକ୍ଷୋଭକାରୀ ଟୁଲ୍କିଟ୍ ଦ୍ୱାରା ପ୍ରଭାବିତ ହୋଇଥିଲେ ବୋଲି କୁହାଯାଉଛି। ତେବେ ଜାନୁୟାରୀ ୨୬ ଟ୍ରାକ୍ଟର ରାଲି ବେଳେ ଦଙ୍ଗା ପାଇଁ ଟୁଲ୍କିଟ୍ ଦାୟୀ, ସେଭଳି କୌଣସି ପ୍ରମାଣ ନାହିଁ। ଅତିରିକ୍ତ ସେସନ୍ସ ଜଜ୍ ଧର୍ମେନ୍ଦ୍ର ରାଣା ଜାମିନ ଆବେଦନର ଶୁଣାଣି କରୁଥିବାବେଳେ ଦିଲ୍ଲୀ ପୋଲିସ ପାଇଁ ପ୍ରତିନିଧିତ୍ୱ କରୁଥିବା ଅତିରିକ୍ତ ସଲିସିଟର ଜେନେରାଲ ଏସ୍.ଭି. ରାଜୁ କହିଥିଲେ, ଦିଶା ଅନ୍ୟ ଦୁଇ ଅଭିଯୁକ୍ତଙ୍କ ଉପରକୁ ଦୋଷ ଖସାଇବାକୁ ଉଦ୍ୟମ କରୁଥିବାରୁ ସେମାନଙ୍କୁ ମୁହାଁମୁହିଁ ଜେରା କରାଯିବା ଆବଶ୍ୟକ। ତେଣୁ ଜଳବାୟୁ କର୍ମୀଙ୍କୁ ଜାମିନରେ ଛଡ଼ାଗଲେ ହାଜତ ଜେରାର ଉଦ୍ଦେଶ୍ୟ ପୂରଣ ହେବନାହିଁ ବୋଲି ସେ ଦର୍ଶାଇଥିଲେ।
