ଭୋପାଳ: ଲୋକଙ୍କଠୁ ବକେୟା ବିଦ୍ୟୁତ୍ ବିଲ୍ ଆଦାୟ କରିବା ଲାଗି ମଧ୍ୟପ୍ରଦେଶ ବିଦ୍ୟୁତ୍ ବିଭାଗ ପକ୍ଷରୁ ଏକ ସ୍ବତନ୍ତ୍ର ପ୍ରକାର ଅଭିଯାନ ଆରମ୍ଭ ହୋଇଛି। ଯେଉଁ ବ୍ୟକ୍ତି ବିଜୁଳି ବିଲ୍ ପୈଠ କରିବାକୁ ସକ୍ଷମ ହେଉନାହାନ୍ତି ବିଭାଗୀୟ ଅଧିକାରୀ ସେମାନଙ୍କ ଘରୁ ମୋଟର ସାଇକେଲ, ପାଳିତ ପଶୁ, ଟ୍ରାକ୍ଟର ଆଦି ଜୋର ଜବରଦସ୍ତ ନେଇଯାଉଛନ୍ତି, ଯାହା ଲୋକଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିଛି। ଏ ନେଇ ଅଭିଯୋଗ ହେବା ପରେ ଉଚ୍ଚଅଧିକାରୀ ୨ ଠିକା କର୍ମଚାରୀଙ୍କୁ ଚାକିରିରୁ ବହିଷ୍କାର କରିଛନ୍ତି।
ଚଳିତ ଆର୍ଥିକ ବର୍ଷ ଶେଷସୁଦ୍ଧା ମଧ୍ୟପ୍ରଦେଶ ପୂର୍ବାଞ୍ଚଳ ଶକ୍ତି ବିତରଣ କମ୍ପାନୀ ୫୧୮ କୋଟି ଟଙ୍କାର ବକେୟା ବିଦ୍ୟୁତ୍ ବିଲ୍ ଆଦାୟ କରିବା ନେଇ ଯୋଜନା କରିଥିବାରୁ ଏହି ଅଭିଯାନ ଆରମ୍ଭ କରିଥିବା କୁହାଯାଉଛି। ସ୍ଥାନୀୟ ଅଞ୍ଚଳରେ ଯେଉଁମାନେ ଦୀର୍ଘଦିନ ଧରି ବିଦ୍ୟୁତ୍ ବିଲ୍ ଟଙ୍କା ଜମା କରିନାହାନ୍ତି ସେମାନଙ୍କୁ ଏହି ଅଭିଯାନର ଶିକାର ହେବାକୁ ପଡ଼ିଛି। ଏ ନେଇ ସାଗର, ଦାମୋହ, ଛତରପୁର, ପାନ୍ନା, ଗ୍ବାଲିଅର ଆଦି ଜିଲାର ଶତାଧିକ ଗ୍ରାମକୁ ରିକୋଭରି ନୋଟିସ ଜାରି କରାଯାଇଛି। ଅନେକ ଗ୍ରାମର ଲୋକଙ୍କଠାରୁ ଟ୍ରାକ୍ଟର, ମୋଟର ସାଇକେଲ୍, ପାଣି ପମ୍ପ ଆଦି ଜବତ୍ କରାଯାଇଛି। ସାଗର ଜିଲା ଦେଓରି ଗ୍ରାମରେ ବିଭାଗୀୟ ଅଧିକାରୀ ବିଦ୍ୟୁତ୍ ବିଲ୍ ଆଦାୟ ପାଇଁ ରେଖା ଅହିରଓ୍ବାରଙ୍କ ଘରେ ପହଞ୍ଚିଥିଲେ। ରେଖା ଘରେ ନ ଥିବାବେଳେ ତାଙ୍କ ବଡ଼ ଶାଶୁ ଗାଧୋଇବାକୁ ଯାଇଥିଲେ। ବିଦ୍ୟୁତ୍ ବିଭାଗର ଅଫିସରମାନେ ତାଙ୍କ ଘରେ ଜବରଦସ୍ତ ପଶି ଘରକରଣା ଜିନିଷ ସବୁ ଗାଡ଼ିରେ ଲୋଡ୍ କରି ନେଇଯାଇଥିବା ରେଖା ଅଭିଯୋଗ କରିଛନ୍ତି। ଏ ପରି ନ କରିବାକୁ ଅଫିସରମାନଙ୍କୁ ରେଖା ନେହୁରା ହୋଇ ଥିଲେ ମଧ୍ୟ ତାଙ୍କ କଥା କେହି ଶୁଣି ନ ଥିଲେ। ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବା ପରେ ରାଜ୍ୟ ସରକାର ଦୁଇ ଠିକା କର୍ମଚାରୀଙ୍କୁ ବହିଷ୍କାର କରି ଯାଞ୍ଚ ନିର୍ଦ୍ଦେଶ ଦେଇଛନ୍ତି।
