ନୂଆଦିଲ୍ଲୀ,୧୧ା୫: ଭାରତୀୟ ସଶସ୍ତ୍ର ବାହିନୀ ପାକିସ୍ତାନକୁ ଆଜି କିମ୍ବା ଭବିଷ୍ୟତରେ ଯେକୌଣସି ଅସ୍ତ୍ରବିରତି ଉଲ୍ଲଂଘନ ସମ୍ବନ୍ଧରେ କଡ଼ା ଚେତାବନୀ ଦେଇଛି।
ଭାରତ ଓ ପାକିସ୍ତାନ ସୀମାରେ ଉତ୍ତେଜନା କମାଇବା ସମ୍ବନ୍ଧରେ ଦୁଇ ଦେଶ ଏକ ବୁଝାମଣାରେ ପହଞ୍ଚିବା ପରେ ସେନା ଏହି ଚେତାବନୀ ଦେଇଛି। ଶନିବାର ଘୋଷଣାର କିଛି ଘଣ୍ଟା ପରେ ପାକିସ୍ତାନ ଏହି ବୁଝାମଣାର ଉଲ୍ଲଂଘନ କରିଥିଲା।
“ଆଜି ରାତିରେ, ପରବର୍ତୀ ସମୟରେ କିମ୍ବା ପରେ ଯଦି ଏହା ପୁନରାବୃତ୍ତି ହୁଏ, ମୁଁ ଆପଣ ସମସ୍ତଙ୍କୁ ସୂଚନା ଦେଉଛି ଯେ ସେନାଧ୍ୟକ୍ଷ ଆଜି ପୂର୍ବରୁ ଏକ ସୁରକ୍ଷା ସମୀକ୍ଷା କରିଛନ୍ତି ଏବଂ ପାକିସ୍ତାନ ପକ୍ଷରୁ ଯେକୌଣସି ଉଲ୍ଲଂଘନ ହେଲେ ଆମ ସେନା କମାଣ୍ଡରମାନଙ୍କୁ କାଇନେଟିକ ଡୋମେନରେ ପ୍ରତିକାରାତ୍ମକ କାର୍ଯ୍ୟ ପାଇଁ ପୂର୍ଣ୍ଣ କ୍ଷମତା ପ୍ରଦାନ କରିଛନ୍ତି,” ଲେଫ୍ଟେନାଣ୍ଟ ଜେନେରାଲ ରାଜୀବ ଘାଇ, ଡିଜିଏମଓ, ରବିବାର ଏକ ଖବରଦାତା ସମ୍ମିଳନୀରେ କହିଛନ୍ତି।
ନୌସେନା ଅପରେସନର ନିର୍ଦ୍ଦେଶକ ଜେନେରାଲ (ଡିଜିଏନଓ), କହିଛନ୍ତି “ଏଥର, ଯଦି ପାକିସ୍ତାନ କୌଣସି ପଦକ୍ଷେପ ନେବାକୁ ସାହସ କରେ, ପାକିସ୍ତାନ ଜାଣିଛି ଆମେ କ’ଣ କରିବୁ,”।
ଖବରଦାତା ସମ୍ମିଳନୀରେ ଭାରତୀୟ ସାମରିକ ବିଭାଗ ସୂଚନା ଦେଇଛି ଯେ ଅପରେସନ ସିନ୍ଦୁର ସମୟରେ ପାକିସ୍ତାନ ଏବଂ ପାକିସ୍ତାନ ଅଧିକୃତ କାଶ୍ମୀରରେ ନଅଟି ଆତଙ୍କବାଦୀ ଲକ୍ଷ୍ୟସ୍ଥଳରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଛନ୍ତି।
“ଅପରେସନ ସିନ୍ଦୁର ଅଧୀନରେ ସତର୍କତାର ସହ ବିଚାର କରି ନଅଟି ଆତଙ୍କବାଦୀ ଲକ୍ଷ୍ୟସ୍ଥଳ ଚିହ୍ନଟ କରାଯାଇଥିଲା। ମେ ୭ ତାରିଖରେ ପ୍ରାରମ୍ଭିକ ଅପରେସନରେ ନଅଟି ଆତଙ୍କବାଦୀ ଲକ୍ଷ୍ୟସ୍ଥଳରେ ୧୦୦ରୁ ଅଧିକ ଆତଙ୍କବାଦୀ ନିହତ ହୋଇଛନ୍ତି,” ଲେଫ୍ଟେନାଣ୍ଟ ଜେନେରାଲ ରାଜୀବ ଘାଇ, ଡିଜିଏମଓ, ରବିବାର କହିଛନ୍ତି।
ସେ ଆହୁରି କହିଛନ୍ତି ଯେ ନିହତ ଆତଙ୍କବାଦୀଙ୍କ ମଧ୍ୟରେ ହାଇ-ଭାଲ୍ୟୁ ଲକ୍ଷ୍ୟ ଯେପରିକି ଯୁସୁଫ ଆଜହାର, ଅବଦୁଲ ମଲିକ ରଉଫ, ଏବଂ ମୁଦାସିର ଅହମଦ ମଧ୍ୟ ସାମିଲ ଥିଲେ।
