ନୂଆଦିଲ୍ଲୀ,୩୦।୧୨ : ଦିଲ୍ଲୀ ହାଇକୋର୍ଟ କହିଛନ୍ତି ଯଦି ସ୍ତ୍ରୀ ଶିକ୍ଷିତା ମାତ୍ର ସେ ଜାଣିଶୁଶି ରୋଜଗାର କରିବା ଲାଗି କୌଣସି ଚାକିରି କରୁ ନାହାନ୍ତି ତେବେ ଛାଡପତ୍ର ମାମଲାରେ ସ୍ବାମୀ ତାଙ୍କୁ ଭରଣପୋଷଣ ଦେବାକୁ ବାଧ୍ୟ ନୁହନ୍ତି। ସ୍ତ୍ରୀ ଜାଣିଶୁଣି ବେକାର ରହିବାକୁ ପସନ୍ଦ କରୁଥିଲେ ତାଙ୍କୁ ରକ୍ଷଣାବେକ୍ଷଣ ଆକାରରେ ଖର୍ଚ୍ଚ ଦେବାକୁ ସ୍ବାମୀଙ୍କୁ କୁହାଯାଇ ପାରିବ ନାହିଁ।
ଜଷ୍ଟିସ ଭି କାମେଶ୍ୱରା ରାଓ ଏବଂ ଅନୁପ କୁମାର ମେନ୍ଦିରତାଙ୍କ ଏକ ଡିଭିଜନ ବେଞ୍ଚ ଛାଡପତ୍ର ମାମଲାରେ ସ୍ବାମୀଙ୍କ ଦ୍ୱାରା ଦାଖଲ ହୋଇଥିବା ଛାଡପତ୍ର ପ୍ରକ୍ରିୟାରେ ସ୍ତ୍ରୀଙ୍କୁ ପ୍ରଦାନ କରାଯାଉଥିବା ରକ୍ଷଣାବେକ୍ଷଣ ଟଙ୍କା ପରିମାଣ ହ୍ରାସ କରିଛନ୍ତି।
ବେଞ୍ଚ କହିଛନ୍ତି, ଯେଉଁ ସ୍ତ୍ରୀଙ୍କର ରୋଜଗାର କ୍ଷମତା ଅଛି କିନ୍ତୁ ସେ ବେକାର ଏବଂ ନିଷ୍କ୍ରିୟ ରହିବାକୁ ପସନ୍ଦ କରନ୍ତି ସେଭଳି କ୍ଷେତ୍ରରେ ଭରଣପୋଷଣର ସମସ୍ତ ଖର୍ଚ୍ଚ ବହନ କରିବାକୂ ଅନ୍ୟ ପକ୍ଷକୁ ଅର୍ଥାତ୍ ସ୍ବାମୀଙ୍କୁ କୁହାଯାଇ ପାରିବ ନାହିଁ। ଏପରି କରିବା ପାଇଁ ଏକପାଖିଆ ବିଚାର ହୋଇପାରେବ। ଅଦାଲତ କହିଛନ୍ତ ରକ୍ଷଣାବେକ୍ଷଣର ପରିମାଣକୁ ଗାଣିତିକ ସଠିକତା ସହିତ ହିସାବ କରାଯିବା ଉଚିତ ନୁହେଁ ବରଂ ଏହାର ଉଦ୍ଦେଶ୍ୟ ହେଉଛି ସେହି ଖର୍ଚ୍ଚ ବହନ କରିବା ଅସମର୍ଥ କ୍ଷେତ୍ରରେ ସ୍ବାମୀଙ୍କୁ ଏହା ଦେବାକୁ ହୋଇଥାଏ।
ବେଞ୍ଚ ଏହା ମଧ୍ୟ କହିଛି ଯେ ହିନ୍ଦୁ ବିବାହ ଆଇନ (ଏଚଏମଏ) ଅନୁଯାୟୀ ପ୍ରକ୍ରିୟାର ରକ୍ଷଣାବେକ୍ଷଣ ବ୍ୟବସ୍ଥା ଲିଙ୍ଗ ନିରପେକ୍ଷ ଅଟେ। ଏଚଏମଏର ଧାରା ୨୪ ଏବଂ ୨୫ର ବ୍ୟବସ୍ଥା, ଏଚଏମଏ ଅଧୀନରେ ଥିବା ପକ୍ଷମାନଙ୍କ ମଧ୍ୟରେ ବିବାହରୁ ସୃଷ୍ଟି ହେଉଥିବା ଅଧିକାର, ଦାୟିତ୍ୱବୋଧ ବହନ କରିବାକୁ ହୋଇଥାଏ। ହାଇକୋର୍ଟରେ ହୋଇଥିବା ଆବେଦନରେ ସ୍ବାମୀ ଛାଡପତ୍ର ପ୍ରକ୍ରିୟାରରେ ତାଙ୍କ ସ୍ତ୍ରୀଙ୍କୁ ମାସିକ ୩୦ ହଜାର ଟଙ୍କା ଦେବାକୁ ଦିଆଯାଇଥିବା ନିର୍ଦ୍ଦେଶକୁ ଚ୍ୟାଲେଞ୍ଜ କରିଥିଲେ।
ସ୍ବାମୀଙ୍କ ଆଇନଜୀବୀ ଯୁକ୍ତି କରିଥିଲେ ଘରୋଇ ହିଂସା ଆଇନରୁ ମହିଳାଙ୍କ ସୁରକ୍ଷା ଅନୁଯାୟୀ ତାଙ୍କ ସ୍ତ୍ରୀଙ୍କୁ ୨୧ ହଜାର ଟଙ୍କା ଦେବାକୁ ନିର୍ଦ୍ଦେଶ ଦିଆଯାଇଛି ଏବଂ ଏଚଏମଏ ପ୍ରକ୍ରିୟାରେ ଏହାକୁ ୩୦ ହଜାର ଟଙ୍କାକୁ ବୃଦ୍ଧି କରାଯାଇଛି।
ତାଙ୍କ ସ୍ତ୍ରୀ ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକ। ଏକ ଡାକ୍ତରଖାନାରେ ରିସେପ୍ସନିଷ୍ଟ ଭାବରେ କାର୍ଯ୍ୟ କରୁଥିବାବେଳେ ଏହା ପୂର୍ବରୁ ୨୫ ହଜାର ଟଙ୍କା ରୋଜଗାର କରୁଥିଲେ।
କୋର୍ଟ କହିଛନ୍ତି ଆବେଦନକାରୀ ସ୍ବାମୀଙ୍କୁ ତାଙ୍କ ଭଉଣୀ, ଭାଇ ଏବଂ ବୃଦ୍ଧ ମାତାପିତାଙ୍କୁ ସହାୟତା କରିବା ସହିତ ତାଙ୍କ ଭାଇଙ୍କ ବିବାହ ପାଇଁ ନେଇଥିବା ଋଣ ପରିଶୋଧ କରିବାକୁ ପଡିବ।
ଏହାର ଉତ୍ତରରେ ସ୍ତ୍ରୀଙ୍କ ଓକିଲ କହିଥିଲେ ସେ କେବଳ ଜଣେ ସାମାଜିକ କର୍ମୀ ଭାବରେ କାର୍ଯ୍ୟ କରୁଥିଲେ ଏବଂ ସେ ଯେଉଁ ଡାକ୍ତରଖାନାରେ କାମ କରୁଥିଲେ ସେଠାରୁ କୌଣସି ବେତନ ପାଉନାହାନ୍ତି। ଆବେଦନ ଏବଂ ରେକର୍ଡକୁ ବିଚାରକୁ ନେଇ କୋର୍ଟ ଜାଣିବାକୁ ପାଇଲେ ସ୍ବାମୀଙ୍କ ଦରମା ମାତ୍ର ୫୬,୪୯୨ ଟଙ୍କା। କୋର୍ଟ ଏହା ମଧ୍ୟ କହିଛନ୍ତି ତାଙ୍କ ସ୍ତ୍ରୀଙ୍କୁ ଦିଆଯାଇଥିବା ରକ୍ଷଣାବେକ୍ଷଣ ବୃଦ୍ଧି ପାଇଁ ପରିବାର କୋର୍ଟ କୌଣସି କାରଣ ଦେଇନାହାନ୍ତି।
କୋର୍ଟ କହିଛନ୍ତି ପରିବାରର ଅନ୍ୟ ସଦସ୍ୟଙ୍କ ପ୍ରତି ସ୍ବାମୀଙ୍କର ଥିବା କର୍ତ୍ତବ୍ୟକୁ ଅବହେଳା କରାଯାଇପାରିବ ନାହିଁ। ସ୍ତ୍ରୀଙ୍କ ରୋଜଗାର କ୍ଷମତା ସଂପର୍କରେ କୋର୍ଟ ଉଲ୍ଲେଖ କରିଛନ୍ତି ତାଙ୍କର ଦିଲ୍ଲୀ ବିଶ୍ୱବିଦ୍ୟାଳୟରୁ ଏକ ଉପଯୁକ୍ତ ଶିକ୍ଷାଗତ ପୃଷ୍ଠଭୂମି ଅଛି, କିନ୍ତୁ ଏହା ଜଣାପଡୁଛି ଯେ ସେ ସ୍ବେଚ୍ଛାକୃତ ଭାବେ ସାମାଜିକ କାର୍ଯ୍ୟ କରୁଛନ୍ତି, ଯେପରି ଅର୍ଥପୂର୍ଣ୍ଣ ଚାକିରି ନେବାରେ କୌଣସି ପ୍ରତିବନ୍ଧକ ସାମ୍ନା କରିନାହାନ୍ତି।
ସେହି ଅନୁଯାୟୀ କୋର୍ଟ ମଧ୍ୟବର୍ତ୍ତୀକାଳୀନ ରକ୍ଷଣାବେକ୍ଷଣ ଭତ୍ତାକୁ ୩୦ ହଜାରରୁ ୨୧ ହଜାର ଟଙ୍କାକୁ ହ୍ରାସ କରିଛନ୍ତି। ତେବେ ମୁଦ୍ରାସ୍ଫୀତି ଏବଂ ମୂଲ୍ୟ ବୃଦ୍ଧିକୁ ଦୃଷ୍ଟିରେ ରଖି ପ୍ରତ୍ୟେକ ପରବର୍ତ୍ତୀ ବର୍ଷରେ ସ୍ବୟଂଚାଳିତ ଭାବରେ ମାସକୁ ଏହା ୧,୫୦୦ ଟଙ୍କା ବୃଦ୍ଧି ପାଇବ ବୋଲି କୋର୍ଟ କହିଛନ୍ତି।
