ଝରିଗାଁ,୧୩।୫(ସ୍ବ.ପ୍ର.): ନବରଙ୍ଗପୁର ଜିଲା ଝରିଗାଁ ବ୍ଲକ ଇଚ୍ଛାପୁର ପଞ୍ଚାୟତର ପ୍ରାୟ ୧୦ ଗ୍ରାମର ହିତାଧିକାରୀ ସାତ ମାସ ହେବ ପିଡ଼ିଏସ ଚାଉଳ ପାଇନଥିବା ନେଇ ଗୁରୁବାର ରାଜ୍ୟ ସ୍ବତନ୍ତ୍ର ବିକାଶ ପରିଷଦ ଉପଦେଷ୍ଟା ତଥା ନବରଙ୍ଗପୁର ପୂର୍ବତନ ଏମ୍ପି ପ୍ରଦୀପ ମାଝୀଙ୍କ ଦୃଷ୍ଟି ଆକର୍ଷଣ କରିଥିଲେ। ତୁରନ୍ତ ଚାଉଳ ଯୋଗାଇ ଦିଆଯିବ ନେଇ ସେ ପ୍ରତିଶ୍ରୁତି ଦେଇଥିଲେ। ଏହାପରେ ଶୁକ୍ରବାର ଝରିଗାଁ ବ୍ଲକ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା। ଚାଉଳ ନେଇ ନ ଥିବା ହିତାଧିକାରୀଙ୍କୁ ଇଚ୍ଛପୁର ପଞ୍ଚାୟତ କାର୍ଯ୍ୟାଳୟରେ ଚାଉଳ ବଣ୍ଟନ କରାଯାଇଥିବା ଜଣାପଡ଼ିଛି।
ଇଚ୍ଛାପୁର ପଞ୍ଚାୟତ କାର୍ଯ୍ୟାଳୟକୁ ନେଇ ଲାଗିରହିଥିବା ବିବାଦ ଯୋଗୁ ବ୍ଲକ ପ୍ରଶାସନ ପକ୍ଷରୁ ଚଚା ପଞ୍ଚାୟତଠାରେ ଇଚ୍ଛାପୁର ପଞ୍ଚାୟତ ହିତାଧିକାରୀଙ୍କୁ ଚାଉଳ ବଣ୍ଟନ କରାଯାଉଥିଲା। ହିତାଧିକାରୀମାନେ ଇଛାପୁର ପଞ୍ଚାୟୟତରେ ଚାଉଳ ପ୍ରଦାନ କରିବା ପାଇଁ ଦାବି କରି ଚଚା ପଞ୍ଚାୟତରୁ ଚାଉଳ ନେଉ ନ ଥିଲେ। ଚାଉଳ ନ ନେବାର ଚାରି ମାସ ବିତିଯାଇଥିଲେ ମଧ୍ୟ ବ୍ଲକ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇନଥିଲା। ହିତାଧିକାରୀମାନେ ଏ ନେଇ ଗୁରୁବାର ଘଟଣା ସମ୍ପର୍କରେ ପ୍ରଦୀପ ମାଝିଙ୍କୁ ଜଣାଇଥିଲେ। ତାଙ୍କ ହସ୍ତକ୍ଷେପ ପରେ ଇଚ୍ଛାପୁର ପଞ୍ଚାୟତରେ ଝରିଗାଁ ବ୍ଲକ ପ୍ରଶାସନ ପକ୍ଷରୁ ଚାରି ମାସର ଚାଉଳ ହିତାଧିକାରୀଙ୍କୁ ବଣ୍ଟନ କରାଯାଇଥିଲା। ଇଚ୍ଛାପୁର ପଞ୍ଚାୟତର କେତେକ ଗ୍ରାମର ୧୮୦ ଜଣ ହିତାଧିକାରୀ ଚାରି ମାସର ଚାଉଳ ନେଇ ନ ଥିଲେ। ଶୁକ୍ରବାର ଇଚ୍ଛାପୁର ପଞ୍ଚାୟତ କାର୍ଯ୍ୟାଳୟରେ ଚାଉଳ ବଣ୍ଟନ କରାଯାଇଛି ବୋଲି ଝରିଗାଁ ବ୍ଲକ ଯୋଗାଣ ନିରୀକ୍ଷକ ଦେବେନ୍ଦ୍ର ସେଠିଆ କହିଛନ୍ତି।
