ନୂଆଦିଲ୍ଲୀ,୨।୯: ମହିଳା କ୍ରିକେଟ୍କୁ ନେଇ ICC ବଡ଼ ଘୋଷଣା କରିଛି । ପ୍ରଥମ ମହିଳା ଚାମ୍ପିଅନ୍ସ ଟ୍ରଫିର ଆୟୋଜନ କରିବ ଭାରତ । ପୂର୍ବରୁ ଏହି ଟୁର୍ଣ୍ଣାମେଣ୍ଟ ଶ୍ରୀଲଙ୍କାରେ ଆୟୋଜିତ ହେବାର ଥିଲା। କିନ୍ତୁ ଶ୍ରୀଲଙ୍କା କ୍ରିକେଟ୍ ବୋର୍ଡରେ ରାଜନୈତିକ ହସ୍ତକ୍ଷେପକୁ ନେଇ ICC ଅସନ୍ତୁଷ୍ଟ ଥିବାରୁ ଏହି ଦାୟିତ୍ବ ଭାରତକୁ ଦିଆଯାଇଛି । ICC ପକ୍ଷରୁ ଟୁର୍ଣ୍ଣାମେଣ୍ଟରେ ଭାଗ ନେବାକୁ ଥିବା ୬ଟି ଦଳ ଏବଂ ମ୍ୟାଚ୍ ଆୟୋଜନ ହେବାକୁ ଥିବା ସହର ସମ୍ପର୍କରେ ମଧ୍ୟ ଘୋଷଣା କରାଯାଇଛି।
ଶ୍ରୀଲଙ୍କା କ୍ରିକେଟ୍ ବୋର୍ଡରେ ସରକାରଙ୍କ ପକ୍ଷରୁ ଗଠିତ ଟ୍ରାନ୍ସଫର୍ମେସନ୍ କମିଟିର ହସ୍ତକ୍ଷେପକୁ ନେଇ ICC ଅସନ୍ତୋଷ ପ୍ରକାଶ କରିଥିଲା। ବୋର୍ଡରେ ନିର୍ବାଚନ କରାଇବାକୁ ମଧ୍ୟ ICC ପକ୍ଷରୁ କୁହାଯାଇଥିଲା। କିନ୍ତୁ ଏପର୍ଯ୍ୟନ୍ତ ବୋର୍ଡରେ ନିର୍ବାଚନ ହୋଇନାହିଁ। ICCର ନିୟମ ଅନୁସାରେ ସଦସ୍ୟ ଦେଶର କ୍ରିକେଟ୍ ବୋର୍ଡରେ ରାଜନୈତିକ ହସ୍ତକ୍ଷେପ ଗ୍ରହଣୀୟ ନୁହେଁ । ଏହି କାରଣରୁ ଶ୍ରୀଲଙ୍କାଠାରୁ ମହିଳା ଚାମ୍ପିଅନ୍ସ ଟ୍ରଫିର ଆୟୋଜନ ଅଧିକାର ଛଡ଼ାଇ ନିଆଯାଇଛି।
୨୦୨୭ ମହିଳା ଚାମ୍ପିଅନ୍ସ ଟ୍ରଫିର ସମସ୍ତ ମ୍ୟାଚ୍ ବଦୋଦରା ଏବଂ ମୁମ୍ବାଇରେ ଖେଳାଯିବ। ମୁମ୍ବାଇର ବ୍ରାବୋର୍ନ ଷ୍ଟାଡିୟମ୍ରେ ମଧ୍ୟ ମ୍ୟାଚ୍ ଆୟୋଜିତ ହେବ। ଟୁର୍ଣ୍ଣାମେଣ୍ଟଟି ରାଉଣ୍ଡ-ରବିନ୍ ଫର୍ମାଟ୍ରେ ଖେଳାଯିବ। ଫେବ୍ରୁଆରୀ ୧୪ରୁ ୨୮ ତାରିଖ ମଧ୍ୟରେ ଏହି ପ୍ରତିଯୋଗିତା ଆୟୋଜିତ ହେବ। ICC ରାଙ୍କିଙ୍ଗ୍ ଆଧାରରେ ୬ଟି ଦଳକୁ ଚୟନ କରାଯାଇଛି। ଏଥିରେ ରହିଛନ୍ତି—
ଭାରତ
ଅଷ୍ଟ୍ରେଲିଆ
ଇଂଲଣ୍ଡ
ଶ୍ରୀଲଙ୍କା
ନ୍ୟୁଜିଲାଣ୍ଡ
ଦକ୍ଷିଣ ଆଫ୍ରିକା