ଲଣ୍ଡନ, ୧୭।୬: ଆନ୍ତର୍ଜାତୀୟ କ୍ରିକେଟ କାଉନସିଲ (ICC) ୨୦୨୭-୨୯ ବିଶ୍ୱ ଟେଷ୍ଟ ଚାମ୍ପିୟନସିପ (WTC) ଚକ୍ରରେ ଛୋଟ କ୍ରିକେଟ ଖେଳୁଥିବା ଦେଶମାନଙ୍କ ପାଇଁ ୪ ଦିନିଆ ଟେଷ୍ଟ ମ୍ୟାଚ୍କୁ ଅନୁମୋଦନ ଦେବାକୁ ପ୍ରସ୍ତୁତ ହେଉଛି। ତେବେ, ଭାରତ, ଅଷ୍ଟ୍ରେଲିଆ ଓ ଇଂଲଣ୍ଡ ପାରମ୍ପରିକ ୫ ଦିନିଆ ଟେଷ୍ଟ ମ୍ୟାଚ ଖେଳିବେ ବୋଲି ରିପୋର୍ଟରୁ ଜଣାପଡ଼ିଛି। ଏହି ପରିବର୍ତ୍ତନ ଛୋଟ ଦେଶମାନଙ୍କୁ ଅଧିକ ଟେଷ୍ଟ ମ୍ୟାଚ ଓ ଲମ୍ବା ସିରିଜ ଖେଳିବାରେ ସାହାଯ୍ୟ କରିବ।
‘ଦି ଗାର୍ଡିଆନ’ ରିପୋର୍ଟ ଅନୁଯାୟୀ, ଗତ ସପ୍ତାହରେ ଲର୍ଡସରେ ଅନୁଷ୍ଠିତ WTC ଫାଇନାଲ ସମୟରେ ICC ଅଧ୍ୟକ୍ଷ ଜୟ ଶାହା ୪ ଦିନିଆ ଟେଷ୍ଟ ମ୍ୟାଚକୁ ସମର୍ଥନ କରିଥିବା ଜଣାପଡ଼ିଛି। ଏହି ନିୟମ ୨୦୨୭-୨୯ ଚକ୍ରରେ କାର୍ଯ୍ୟକାରୀ ହେବ। ତେବେ, ଆଶେସ, ବର୍ଡର-ଗାଭାସ୍କର ଟ୍ରଫି ଏବଂ ନୂଆ ନାମକରଣ ହୋଇଥିବା ଆଣ୍ଡରସନ-ତେନ୍ଦୁଲକର ଟ୍ରଫି ପାଇଁ ଭାରତ, ଅଷ୍ଟ୍ରେଲିଆ ଓ ଇଂଲଣ୍ଡ ୫ ଦିନିଆ ଟେଷ୍ଟ ସିରିଜ ଖେଳିବେ।
ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ ହେଉଛି ନିମ୍ନ-ସ୍ଥାନ ପାଉଥିବା ଓ ଆର୍ଥିକ ଦୃଷ୍ଟିରୁ ଦୁର୍ବଳ କ୍ରିକେଟ ବୋର୍ଡଗୁଡ଼ିକୁ ଟେଷ୍ଟ ମ୍ୟାଚ ଆୟୋଜନରେ ସହାୟତା କରିବା। ୫ ଦିନିଆ ଟେଷ୍ଟ ମ୍ୟାଚ ଆୟୋଜନ ପାଇଁ ଅଧିକ ସମୟ ଓ ଖର୍ଚ୍ଚ ଆବଶ୍ୟକ ହେଉଥିବାରୁ ଅନେକ ଛୋଟ ଦେଶ ଏହାକୁ ଏଡ଼ାଇ ଚାଲିଛନ୍ତି। ୪ ଦିନିଆ ଟେଷ୍ଟ ମ୍ୟାଚ ଏକ ତିନି ମ୍ୟାଚ ବିଶିଷ୍ଟ ସିରିଜକୁ ତିନି ସପ୍ତାହରୁ କମ ସମୟରେ ସମ୍ପୂର୍ଣ୍ଣ କରିବାରେ ସାହାଯ୍ୟ କରିବ। ଏହା ଦ୍ୱାରା ଦେଶମାନେ ଯେପରିକି ଶ୍ରୀଲଙ୍କା, ବାଂଲାଦେଶ, ପାକିସ୍ତାନ, ୱେଷ୍ଟଇଣ୍ଡିଜ୍, ନ୍ୟୁଜିଲାଣ୍ଡ ଓ ଦକ୍ଷିଣ ଆଫ୍ରିକା ଅଧିକ ଟେଷ୍ଟ ମ୍ୟାଚ ଖେଳିପାରିବେ।
୪ ଦିନିଆ ଟେଷ୍ଟ ମ୍ୟାଚରେ ସମୟ ହ୍ରାସକୁ ପୂରଣ କରିବା ପାଇଁ ଦୈନିକ ନ୍ୟୂନତମ ୯୮ ଓଭର ଖେଳାଯିବ, ଯାହା ୫ ଦିନିଆ ଟେଷ୍ଟରେ ୯୦ ଓଭର ଥାଏ। ଏହା ପୂର୍ବରୁ ୨୦୧୭ରେ ICC ଦ୍ୱାରା ଦ୍ୱିପାକ୍ଷିକ ମ୍ୟାଚ ପାଇଁ ୪ ଦିନିଆ ଟେଷ୍ଟକୁ ଅନୁମୋଦନ ଦିଆଯାଇଥିଲା। ଇଂଲଣ୍ଡ ୨୦୧୯ ଓ ୨୦୨୩ରେ ଆୟରଲାଣ୍ଡ ବିପକ୍ଷରେ ଏବଂ ଗତ ମାସରେ ଜିମ୍ବାୱେ ବିପକ୍ଷରେ ଟ୍ରେଣ୍ଟ ବ୍ରିଜରେ ୪ ଦିନିଆ ଟେଷ୍ଟ ଖେଳିଥିଲା।
ଦକ୍ଷିଣ ଆଫ୍ରିକା ଗତ ସପ୍ତାହରେ ଲର୍ଡସରେ ଅଷ୍ଟ୍ରେଲିଆକୁ ହରାଇ ୨୦୨୩-୨୫ WTC ଚାମ୍ପିୟନ ହୋଇଥିଲେ। ତେବେ, ସେମାନଙ୍କର ସୀମିତ ଟେଷ୍ଟ ସିରିଜ ସୂଚୀ ଟେଷ୍ଟ କ୍ରିକେଟରେ ଛୋଟ ଦେଶମାନଙ୍କ ଆଗ୍ରହ ଓ ସାମର୍ଥ୍ୟ ଉପରେ ପ୍ରଶ୍ନ ଉଠାଇଛି। ଏହି ୪ ଦିନିଆ ଟେଷ୍ଟ ପ୍ରସ୍ତାବ ଏହି ସମସ୍ୟାର ସମାଧାନ କରିବାକୁ ଲକ୍ଷ୍ୟ ରଖିଛି।
୨୦୨୫-୨୭ WTC ଚକ୍ରରେ ସମସ୍ତ ୨୭ଟି ସିରିଜ ୫ ଦିନିଆ ଫର୍ମାଟରେ ହିଁ ଖେଳାଯିବ, ଯେଉଁଥିରେ ୧୭ଟି ସିରିଜରେ ୨ଟି ମ୍ୟାଚ ଓ ୬ଟି ସିରିଜରେ ୩ଟି ମ୍ୟାଚ ରହିବ। ଭାରତ, ଅଷ୍ଟ୍ରେଲିଆ ଓ ଇଂଲଣ୍ଡ ପରସ୍ପର ବିପକ୍ଷରେ ୫ ମ୍ୟାଚ ବିଶିଷ୍ଟ ସିରିଜ ଖେଳିବେ। ଏହି ଚକ୍ର ଶ୍ରୀଲଙ୍କା ଓ ବାଂଲାଦେଶ ମଧ୍ୟରେ ଗାଲେରେ ଆରମ୍ଭ ହୋଇଛି।
