ହରାରେ,୬।୨: ଭାରତ ପୁଣି ଥରେ ୧୯ ବର୍ଷରୁ କମ୍ ବିଶ୍ୱକପରେ ଇତିହାସ ରଚିଲା। ଟିମ ଇଣ୍ଡିଆ ହରାରେ ସ୍ପୋଟର୍ସ କ୍ଲବ୍ରେ ଇଂଲଣ୍ଡ ବିପକ୍ଷରେ ଖେଳାଯାଇଥିବା ଫାଇନାଲରେ ବିଜୟୀ ହୋଇ ଷଷ୍ଠ ଥର ପାଇଁ ଟାଇଟଲ ଜିତିଛି। ଷଷ୍ଠ ଥର ପାଇଁ ଟୁର୍ନାମେଣ୍ଟ ଜିତି ଭାରତ ଇତିହାସ ରଚିଛି। ଭାରତୀୟ ଦଳ ସମଗ୍ର ଟୁର୍ନାମେଣ୍ଟରେ ଚମତ୍କାର ପ୍ରଦର୍ଶନ କରିଥିଲା।
ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ଭାରତ ମାତ୍ର ୨୦ ରନରେ ଓପନର ଆରୋନ ଜର୍ଜ (୯)ଙ୍କ ଉଇକେଟ ହରାଇ ଯଦିଓ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ତେବେ ଦ୍ୱିତୀୟ ଉଇକେଟରେ ବୈଭବ ସୂର୍ଯ୍ୟବଂଶୀ ଓ ଅଧିନାୟକ ଆୟୁଷ ମାହାତ୍ରେଙ୍କ ଦ୍ରୁତ ଶତକୀୟ ଭାଗୀଦାରି ବଳରେ ବଡ଼ ସ୍କୋର ପାଇଁ ପ୍ଲାଟ୍ଫର୍ମ ପ୍ରସ୍ତୁତ କରିଥିଲା। ଭାରତୀୟ ବ୍ୟାଟିଂର ମେରୁଦଣ୍ଡ ସାଜିଥିଲେ ବୈଭବ। ସେ ୧୭୫ ରନ ସ୍କୋର କରି ଏକାଧିକ ରେକର୍ଡର ଅଧିକାରୀ ହୋଇଯାଇଥିଲେ। ଫଳରେ ଭାରତୀୟ ସ୍କୋର ମଧ୍ୟ ସର୍ବୋଚ୍ଚ (୪୧୧) ହୋଇଥିଲା। ୪୧୨ ରନର ଟାର୍ଗେଟ ପାଇଥିବା ଇଂଲଣ୍ଡ କେବେହେଲେ ଭାରତ ସମକକ୍ଷ ପ୍ରଦର୍ଶନ କରିପାରି ନ ଥିଲା। ଟପ୍ ଅର୍ଡରରେ ବେନ୍ ଡକିନ୍ସ ୬୬, ବେନ୍ ମାୟେସ ୪୫ ଓ ଥୋମାସ ରିଉ ୩୧ ରନକରି ଯଦିଓ କିଛିଟା ଚ୍ୟାଲେଞ୍ଜ ଦେଇଥିଲେ ତେବେ ତାହା ପର୍ଯ୍ୟାପ୍ତ ହୋଇ ନ ଥିଲା। ୧୭୭ ରନ ମଧ୍ୟରେ ଦଳ ୭ ଉଇକେଟ ହରାଇ ବଡ଼ ପରାଜୟ ମୁହାଁ ହୋଇଥଲା। ଭାରତ ପକ୍ଷରୁ ଆର.ଏସ. ଆମ୍ବ୍ରିସ ୩ଟି, ଦୀପେଶ ଦେବେନ୍ଦ୍ରନ ଓ କନିଷ୍କ ଚୌହାନ ୨ଟି ଲେଖାଏ ଏବଂ ଖିଲାନ ପଟେଲ ଓ ଆୟୁଷ ମାହାତ୍ରେ ଗୋଟିଏ ଲେଖାଏ ଉଇକେଟ ନେଇଥିଲେ।
ଏହି ଐତିହାସିକ ବିଜୟ ସତ୍ତ୍ୱେ, ଟିମ ଇଣ୍ଡିଆ ICC ଠାରୁ କୌଣସି ସରକାରୀ ପୁରସ୍କାର ଟଙ୍କା ପାଇବ ନାହିଁ। କାରଣ ୧୯ ବର୍ଷରୁ କମ ପୁରୁଷ କ୍ରିକେଟ ବିଶ୍ୱକପରେ ICC କୌଣସି ନଗଦ ପୁରସ୍କାର ପ୍ରଦାନ କରେ ନାହିଁ। ଏହି ଟୁର୍ନାମେଣ୍ଟ ଏକ ବିକାଶମୂଳକ ଟୁର୍ଣ୍ଣାମେଣ୍ଟ ଯାହା ଯୁବ କ୍ରିକେଟରଙ୍କ ଦକ୍ଷତା ବିକାଶ, ଅଭିଜ୍ଞତା ଏବଂ ଉନ୍ନତି ପାଇଁ ଡିଜାଇନ କରାଯାଇଛି। ପୂର୍ବ ସଂସ୍କରଣରେ ICC ମଧ୍ୟ କୌଣସି ପୁରସ୍କାର ରାଶି ପ୍ରଦାନ କରିନଥିଲା।
ତଥାପି, ଭାରତୀୟ ଦଳର ଖେଳାଳିମାନଙ୍କୁ ନିରାଶ ହେବା ଆବଶ୍ୟକ ନାହିଁ। BCCI ପ୍ରାୟତଃ ଏପରି ପ୍ରମୁଖ ସଫଳତା ପାଇଁ ଏହାର ଖେଳାଳିମାନଙ୍କୁ ଗୁରୁତ୍ୱପୂର୍ଣ୍ଣ ନଗଦ ପୁରସ୍କାର ପ୍ରଦାନ କରେ। ଉଦାହରଣ ସ୍ବରୂପ, ୨୦୨୪ U୧୯ ବିଶ୍ୱକପରେ ଭାରତର ବିଜୟ ପାଇଁ, BCCI ପ୍ରତ୍ୟେକ ଖେଳାଳିଙ୍କୁ ୩୦ ଲକ୍ଷ ପୁରସ୍କାର ପ୍ରଦାନ କରିଥିଲା। ସେହିପରି, ୨୦୨୫ ମହିଳା U୧୯ T୨୦ ବିଶ୍ୱକପ ଜିତିବା ପରେ, ସମଗ୍ର ଦଳକୁ ୫ କୋଟି ପୁରସ୍କାର ମିଳିଥିଲା। ଏଣୁ ଏଥର ମଧ୍ୟ, BCCI ଖେଳାଳି, ସହାୟକ କର୍ମଚାରୀ ଏବଂ ପ୍ରଶିକ୍ଷକ ଦଳ ପାଇଁ ଗୁରୁତ୍ୱପୂର୍ଣ୍ଣ ଘୋଷଣା କରିବ ବୋଲି ଆଶା କରାଯାଉଛି।
