ଦୁବାଇ, ୯ା୭ (ପି.ଟି.)-ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ମୁଖ୍ୟ କାର୍ଯ୍ୟନିର୍ବାହୀ (ସିଇଓ) ମନୁ ସାହାନେ ଗୁରୁବାର ତାଙ୍କ ପଦବୀରୁ ଇସ୍ତଫା ଦେଇଛନ୍ତି। ସେ ତାଙ୍କ ସହକର୍ମୀମାନଙ୍କୁ ଖରାପ ବ୍ୟବହାର କରୁଥିବା ଅଭିଯୋଗ ହୋଇଥିଲା। ଅଭିଯୋଗର ତଦନ୍ତ ଚାଲିଥିବାରୁ ତାଙ୍କୁ ମାର୍ଚ୍ଚ ମାସରେ ଛୁଟିରେ ଯିବା ଲାଗି କୁହାଯାଇଥିଲା। ସାହାନେଙ୍କ ସ୍ଥାନରେ ଜେଫ୍ ଆଲାରଡିସ୍ ପୂର୍ବଭଳି କାମଚଳା ସିଇଓ ଭାବେ ତାଙ୍କ ଦାୟିତ୍ୱ ତୁଲାଇବେ। ସୂଚନାଯୋଗ୍ୟ, ୨୦୧୯ ଆଇସିସି ବିଶ୍ୱକପ୍ ପରେ ଡେଭ୍ ରିଚାର୍ଡସନଙ୍କ ସ୍ଥାନରେ ସାହାନେ ନିଯୁକ୍ତି ପାଇଥିଲେ। ତାଙ୍କ କାର୍ଯ୍ୟକାଳ ୨୦୨୨ ପର୍ଯ୍ୟନ୍ତ ରହିଥିଲା। ମାତ୍ର ବିଭିନ୍ନ ନୀତି ନିର୍ଦ୍ଧାରଣ ବେଳେ ସେ କେତେକ ପ୍ରଭାବଶାଳୀ କ୍ରିକେଟ ବୋର୍ଡର ମତାମତକୁ ଗୁରୁତ୍ୱ ଦେଉ ନ ଥିଲେ। ୫୬ବର୍ଷୀୟ ସାହାନେ ଗତବର୍ଷ ନୂଆ ଚେୟାରମ୍ୟାନ ପାଇଁ ନିର୍ବାଚନ ପ୍ରକ୍ରିୟା ଚାଲିଥିବାବେଳେ ଖୁବ୍ ଚାପରେ ରହିଥିଲେ। ନଭେମ୍ବରରେ ଗ୍ରେଗ୍ ବାର୍କଲେ ଏହି ପଦବୀ ଅଳଙ୍କୃତ କରିଥିଲେ। ସାହାନେଙ୍କ ଏକଚ୍ଛତ୍ରବାଦ କାର୍ଯ୍ୟଶୈଳୀ ଯୋଗୁ ସହକର୍ମୀମାନଙ୍କ ସହ ତାଙ୍କର ସମ୍ପର୍କ ଭଲ ସମ୍ପର୍କ ନ ଥିଲା।
