ନୂଆଦିଲ୍ଲୀ, ୨୭।୯ : ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନ (ଆଇସିଏଓ) ଏବଂ ଅନ୍ତର୍ଜାତୀୟ ସୌର ଆଲାଇନ୍ସ (ଆଇଏସଏ) ସହିତ ଏକ ବୁଝାମଣାପତ୍ର (ଏମଓୟୁ) ସ୍ବାକ୍ଷରିତ ହୋଇଛି। ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ମଙ୍ଗଳବାର ଏହି ସୂଚନା ଦେଇଛନ୍ତି। ଉଲ୍ଲେଖନୀୟ କଥା ହେଉଛି, ଅନ୍ତର୍ଜାତୀୟ ବିମାନ ଚଳାଚଳ କ୍ଷେତ୍ରରେ କାର୍ବନ ଡାଇଅକ୍ସାଇଡ ନିର୍ଗମନ ବୃଦ୍ଧି ଯାଞ୍ଚ କରିବା ଏହି ଚୁକ୍ତିନାମାର ଉଦ୍ଦେଶ୍ୟ।
ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ଏହି ବିଷୟରେ ଟୁଇଟ କରିଛନ୍ତି। ସେ ଲେଖିଛନ୍ତି ଯେ ଭାରତ ପାଇଁ ଏହା ଏକ ଗର୍ବର ମୁହୂର୍ତ୍ତ। ଅନ୍ତର୍ଜାତୀୟ ବିମାନ ଚଳାଚଳ ଗୋଷ୍ଠୀ ଅନ୍ତର୍ଜାତୀୟ ସୌର ଆଲାଇନ୍ସ ସହିତ ମିଳିତ ହେବା ଖୁସିୀର କଥା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ପ୍ରସ୍ତାବିତ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଭାରତ ଏବଂ ଫ୍ରାନ୍ସ ମିଳିତ ଭାବେ ଆୟୋଜିତ ଏହି କାର୍ଯ୍ୟକ୍ରମରେ ବିଶ୍ୱ ବେସାମରିକ ବିମାନ ଚଳାଚଳ କ୍ଷେତ୍ରରେ ସୌର ଶକ୍ତି ବ୍ୟବହାର ପାଇଁ ଏକ ମାଇଲଖୁଣ୍ଟ ସାବ୍ୟସ୍ତ ହେବ।
ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନ ଚୁକ୍ତି ସ୍ବାକ୍ଷର ପରେ ଟୁଇଟ କରିଛି। ଏଥିରେ ଉଲ୍ଲେଖ୍ କରାଯାଇଛି ଯେ ବେସାମରିକ ବିମାନ ଚଳାଚଳ ପ୍ରସଙ୍ଗରେ ସହଯୋଗକୁ ମଜବୁତ କରିବା ପାଇଁ ଆଇସିଏଓ ପରିଷଦକୁ ୬ଟି ଦକ୍ଷିଣ ପୂର୍ବ ଏସୀୟ ଦେଶର ପ୍ରତିନିଧୀ ମୁଖ୍ୟମାନେ ଏହି ସମ୍ମିଳନୀରେ ଅଂଶଗ୍ରହଣ କରିଥିଲେ। ଏହି ସମୟରେ ସମସ୍ତଙ୍କୁ ଆସନ୍ତା ବର୍ଷ ଆରମ୍ଭରେ ଭାରତ ଦ୍ୱାରା ଆୟୋଜିତ ହେବାକୁ ଥିବା ଆପେକ(ଏପିଏସି) ମନ୍ତ୍ରୀ ସମ୍ମିଳନୀକୁ ନିମନ୍ତ୍ରଣ କରାଯାଇଥିଲା।
ସୂଚନାଯୋଗ୍ୟ ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନ ହେଉଛି ମିଳିତ ଜାତିସଂଘର ଏକ ବିଶେଷ ଏଜେନ୍ସି। ଅନ୍ତର୍ଜାତୀୟ ବିମାନ ଚଳାଚଳ ପାଇଁ ଏହା ନିରାପତ୍ତା, ନିର୍ଗମନ, ନାଭିଗେଶନ ଏବଂ ସୁବିଧା ମାନ ସ୍ଥିର ତଥା ଅଡିଟ କରିବା ଲାଗି ଏହା ଏହାର ୧୯୩ ସଦସ୍ୟ ରାଷ୍ଟ୍ରଙ୍କ ସହିତ କାର୍ଯ୍ୟ କରିଥାଏ।
