ନୂଆଦିଲ୍ଲୀ,୨୬।୨: ୮୫ତମ କଂଗ୍ରେସ ସମ୍ମିଳନୀର ଶେଷ ଦିନ ଅର୍ଥାତ୍ ରବିବାର ରାହୁଲ ଗାନ୍ଧୀ ଦଳର ନେତା ଓ କର୍ମୀଙ୍କୁ ସମ୍ବୋଧିତ କରିଛନ୍ତି। କନ୍ୟାକୁମାରୀଠାରୁ କଶ୍ମୀର ପର୍ଯ୍ୟନ୍ତ ୪ ମାସର ‘ଭାରତ ଯୋଡୋ ଯାତ୍ରା’ ବିଷୟରେ ବର୍ଣ୍ଣନା କରି ରାହୁଲ କହିଥିଲେ, ଲକ୍ଷ ଲକ୍ଷ ଲୋକ ଆମର ଭାରତ ଯୋଡୋ ଯାତ୍ରା ସହିତ ଜଡିତ ଥିଲେ ଏବଂ ଆମେ ସମସ୍ତଙ୍କ ଯନ୍ତ୍ରଣାକୁ ଆଲିଙ୍ଗନ କରି ଅନୁଭବ କରିଛୁ।
ରାହୁଲ ଗାନ୍ଧୀ ମଧ୍ୟ ତାଙ୍କ ପିଲାଦିନର କାହାଣୀ ମନେପକାଇ କହିଛନ୍ତି, ୧୯୭୭ରେ ମୋତେ ୭ ବର୍ଷ ହୋଇଥିବାବେଳେ ମା’ ତାଙ୍କୁ କହିଥିଲେ ଆମେ ଘର ଛାଡୁଛେ। କାରଣ ଏହା ଆମ ନିଜ ଘର ନୁହେଁ। ମୁଁ ଯେତେବେଳେ କୁଆଡେ ଯିବି ପଚାରିଲି, ସେ କହିଲେ ‘ଜାଣିନି’। ଦୀର୍ଘ ୫୨ ବର୍ଷ ବିତିଗଲାଣି, ଆଜି ପର୍ଯ୍ୟନ୍ତ ମୋର ପାଖେ ଘର ନାହିଁ। ଆମ ପରିବାରର ଯେଉଁ ଘର ଆଲ୍ଲାହାବାଦରେ ଅଛି, ତାହା ମଧ୍ୟ ଆମ ଘର ନୁହେଁ। ମୁଁ ରହୁଥିବା ସ୍ଥାନ ମୋ ପାଇଁ ଘର ନୁହେଁ, ତେଣୁ ଯେତେବେଳେ ମୁଁ କନ୍ୟାକୁମାରୀରୁ ଯାତ୍ରା ଆରମ୍ଭ କରିଥିଲି, ସେତେବେଳେ ମୁଁ ନିଜକୁ ପଚାରିଲି ମୋର ଦାୟିତ୍ୱ କ’ଣ? ମୁଁ ଭାରତକୁ ବୁଝିବାକୁ ବାହାରିଥିଲି।
ରାହୁଲ ଗାନ୍ଧୀ ତାଙ୍କ ଅଭିଭାଷଣରେ ଆଦାନୀ ଏପିସୋଡ ବିଷୟରେ ମଧ୍ୟ ଉଲ୍ଲେଖ କରିଛନ୍ତି। ସେ କହିଛନ୍ତି, ମୁଁ କେବଳ ମୋଦିଜୀଙ୍କୁ ପଚାରିଥିଲି ଆଦାନୀ ଜୀ ସହିତ ତୁମର ସମ୍ପର୍କ କ’ଣ? … ସମସ୍ତ ମନ୍ତ୍ରୀ ଆଦାନୀ ଜୀଙ୍କୁ ସୁରକ୍ଷା ଦେବା ଆରମ୍ଭ କଲେ। ଆଦାନୀ ଜୀଙ୍କୁ ସୁରକ୍ଷା ଦେବା ପାଇଁ ଭାଜପା ଏବଂ ଆରଏସଏସ କାହିଁକି ଆଗେଇ ଆସୁଛନ୍ତି ବୋଲି ରାହୁଲ ପ୍ରଶ୍ନ କରୁଛନ୍ତି।
