ଚେନ୍ନାଇ,୩।୬: ତାମିଲ-କନ୍ନଡ ଭାଷା ବିବାଦ ସମ୍ପର୍କରେ ସାଉଥ୍ ଷ୍ଟାର୍ କମଲ ହାସନ କ୍ଷମା ମାଗିବାକୁ ମନା କରିଦେଇଛନ୍ତି। ତାଙ୍କ ଫିଲ୍ମ ଠଗ ଲାଇଫ ଆଉ କର୍ନାଟକରେ ରିଲିଜ ହେବ ନାହିଁ। କମଲ ହାସନଙ୍କ ପ୍ରଯୋଜନା କମ୍ପାନୀ ମଙ୍ଗଳବାର କର୍ନାଟକ ହାଇକୋର୍ଟକୁ କହିଛି ଯେ, କ୍ଷମା ମାଗିବା ପାଇଁ କିଛି ନାହିଁ।
କମଲ ହାସନ ଏକ ଲିଖିତ ବିବୃତ୍ତି ଜାରି କରିଛନ୍ତି ଏବଂ କର୍ନାଟକ ଫିଲ୍ମ ଚାମ୍ବର ଅଫ କମର୍ସ (KFCC) ଦ୍ୱାରା କ୍ଷମା ମାଗିବାର ଦାବିର ଜବାବ ଦେଇଛନ୍ତି। ଅଭିନେତା ବିବୃତ୍ତିରେ ଲେଖିଛନ୍ତି – ବର୍ତ୍ତମାନ ଆମକୁ ପୋଲିସ ସୁରକ୍ଷାର ଆବଶ୍ୟକତା ନାହିଁ କାରଣ ଫିଲ୍ମଟି ଏଠାରେ ରିଲିଜ ହେବ ନାହିଁ। ଆମେ ଫିଲ୍ମ ଚାମ୍ବର ସହିତ କଥା ହେବୁ।
କମଲ ହାସନ କହିଛନ୍ତି,ମୋର କଥାର ଉଦ୍ଦେଶ୍ୟ କେବଳ ଏହା କହିବା ଥିଲା ଯେ ଆମେ ସମସ୍ତେ ଏକ ଏବଂ ଗୋଟିଏ ପରିବାରର ଏବଂ କୌଣସି ପ୍ରକାରେ କନ୍ନଡକୁ କମ ଆକଳନ କରିବା ନାହିଁ। କନ୍ନଡ ଭାଷାର ସମୃଦ୍ଧ ଐତିହ୍ୟ ଉପରେ କୌଣସି ବିବାଦ କିମ୍ବା ବିତର୍କ ନାହିଁ। ତାମିଲ ପରି, କନ୍ନଡରେ ମଧ୍ୟ ଏକ ଗୌରବଶାଳୀ ସାହିତି୍ୟକ ଏବଂ ସାଂସ୍କୃତିକ ପରମ୍ପରା ଅଛି ଯାହା ମୁଁ ଦୀର୍ଘ ସମୟ ଧରି ପ୍ରଶଂସା କରିଆସୁଛି।
ଅଭିନେତା ଆହୁରି କହିଛନ୍ତି- ମୋ କ୍ୟାରିୟରରେ, ମୁଁ କନ୍ନଡ ଭାଷାଭାଷୀ ସମ୍ପ୍ରଦାୟ ଦ୍ୱାରା ମୋତେ ଦିଆଯାଇଥିବା ସ୍ନେହକୁ ଆଦର କରିଛି ଏବଂ ମୁଁ ଆତ୍ମବିଶ୍ୱାସର ସହିତ କହୁଛି ଯେ ଭାଷା ପ୍ରତି ମୋର ପ୍ରେମ ସତ୍ୟ, ଏବଂ କନ୍ନଡ ଲୋକଙ୍କ ମାତୃଭାଷା ପ୍ରତି ମୋର ବହୁତ ସମ୍ମାନ ଅଛି। ମୁଁ ସର୍ବଦା ସମସ୍ତ ଭାରତୀୟ ଭାଷା ପ୍ରତି ସମାନ ସମ୍ମାନର ପକ୍ଷରେ ରହିଆସିଛି ଏବଂ ଅନ୍ୟ କୌଣସି ଭାଷା ଉପରେ ଅନ୍ୟ ଏକ ଭାଷାର ପ୍ରାଧାନ୍ୟ ବିପକ୍ଷରେ ଅଛି, କାରଣ ଏପରି ଅସନ୍ତୁଳନ ଭାରତୀୟ ସଂଘର ଭାଷାଗତ ଗଠନକୁ ଦୁର୍ବଳ କରିଥାଏ। ମୁଁ ସିନେମାର ଭାଷା ଜାଣେ ଏବଂ କହିଥାଏ। ସିନେମା ଏକ ବିଶ୍ୱବ୍ୟାପୀ ଭାଷା ଯାହା କେବଳ ଏବଂ କେବଳ ବନ୍ଧନ ଜାଣେ। ମୋର ବକ୍ତବ୍ୟ ମଧ୍ୟ ଆମ ସମସ୍ତଙ୍କ ମଧ୍ୟରେ ସେହି ବନ୍ଧନ ଏବଂ ଏକତା ସ୍ଥାପନ କରିବା ଥିଲା।
କନ୍ନଡ-ତାମିଲ ଭାଷାକୁ ନେଇ ଚାଲିଥିବା ବିବାଦରେ ଅଭିନେତା କମଲ ହାସନଙ୍କୁ କର୍ନାଟକ ହାଇକୋର୍ଟ ଭର୍ତ୍ସନା କରିଛନ୍ତି। ହାଇକୋର୍ଟ କହିଛନ୍ତି,ଅଭିବ୍ୟକ୍ତିର ସ୍ବାଧୀନତା ନାମରେ ଲୋକଙ୍କ ଭାବନାକୁ ଆଘାତ ଦିଆଯାଇପାରିବ ନାହିଁ। କମଲ ହାସନ କନ୍ନଡ ଏବଂ ତାମିଲ ଭାଷାକୁ ନେଇ ଏକ ବୟାନ ଦେଇଥିଲେ। ଏହାକୁ ନେଇ ବହୁତ ବିବାଦ ହୋଇଥିଲା, ଯାହା ଏପର୍ଯ୍ୟନ୍ତ ଥମିନାହିଁ। କମଲ ହାସନଙ୍କ ଫିଲ୍ମ ଠଗ ଲାଇଫ ଜୁନ ୫ରେ ରିଲିଜ ହେବାକୁ ଯାଉଛି। ଏହା ମଧ୍ୟ ବିବାଦରେ ଘେରି ରହିଛି।
କମଲ ହାସନ ତାଙ୍କ ଆଗାମୀ ଫିଲ୍ମ ‘ଠଗ ଲାଇଫ’ର ଅଡିଓ ଲଞ୍ଚ ସମୟରେ କହିଥିଲେ, କନ୍ନଡ ଭାଷା ତାମିଲରୁ ଜନ୍ମ ହୋଇଛି। ଏହାକୁ ନେଇ ବିବାଦ ସୃଷ୍ଟି ହୋଇଥିଲା ଏବଂ ମାମଲା ଏତେ ବଢି ଯାଇଥିଲା ଯେ ଏହା କୋର୍ଟ ପର୍ଯ୍ୟନ୍ତ ପହଞ୍ଚିଥିଲା। କର୍ନାଟକ ହାଇକୋର୍ଟରେ ଜଷ୍ଟିସ ଏମ. ନାଗପ୍ରସନ୍ନାଙ୍କ ଖଣ୍ଡପୀଠ ଅଭିନେତାଙ୍କୁ ଭର୍ତ୍ସନା କରିଥିଲେ। ହାଇକୋର୍ଟ କହିଛନ୍ତି, ଆପଣ କମଲ ହାସନ ହୁଅନ୍ତୁ କିମ୍ବା ଅନ୍ୟ କେହି, ଆପଣ ଜନସାଧାରଣଙ୍କ ଭାବନାକୁ ଆଘାତ ଦେଇପାରିବେ ନାହିଁ। ଆପଣ ନିଜେ ଏହି ପରିସ୍ଥିତିର କାରଣ। ଅଭିନେତା କମଲ ହାସନ ମଧ୍ୟ ଏହି ମାମଲାରେ କ୍ଷମା ମାଗିବାକୁ ମନା କରିଦେଇଛନ୍ତି।
କୋର୍ଟ କହିଛନ୍ତି, ଆପଣଙ୍କର କହିବାର ଅଧିକାର ଅଛି, କିନ୍ତୁ ଭାବନାକୁ ଆଘାତ ଦେବାର ନୁହେଁ। ଅଭିବ୍ୟକ୍ତିର ସ୍ବାଧୀନତା ନାମରେ ଜନସାଧାରଣଙ୍କ ଭାବନାକୁ ଆଘାତ ଦିଆଯାଇପାରିବ ନାହିଁ। ଆମେ ଏବେ ଏହା ଆପଣଙ୍କ ଉପରେ ଛାଡି ଦେଉଛୁ। ଯଦି ଆପଣ କାହାକୁ ଆଘାତ ଦେଇଛନ୍ତି, ତେବେ କ୍ଷମା ମାଗନ୍ତୁ। କର୍ନାଟକରୁ କୋଟି କୋଟି ଟଙ୍କା ରୋଜଗାର କରାଯାଇପାରିବ। ଯଦି ଆପଣଙ୍କୁ କନ୍ନଡ ଲୋକଙ୍କ ଆବଶ୍ୟକତା ନାହିଁ, ତେବେ ଏଠାରୁ ରୋଜଗାର କରିବା ବନ୍ଦ କରନ୍ତୁ।
