କୋଲକାତା, ୧୮ା୯ (ପି.ଟି.)-ବିଳମ୍ବରେ ହେଲେ ମଧ୍ୟ ଶେଷରେ ଆସନ୍ତା ମାସରେ ଏଠାରେ ଆଇ-ଲିଗ୍ କ୍ୱାଲିଫାୟର୍ସ ସହ ଫୁଟବଲ୍ ସିଜନ ଆରମ୍ଭ ହେବ। ଇଭେଣ୍ଟ ବେଳେ କୋଭିଡ୍-୧୯ ପ୍ରୋଟୋକଲକୁ କଡ଼ାକଡ଼ି ଭାବେ ପାଳନ କରାଯିବ ବୋଲି ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ପ୍ରକାଶ କରିଛି। ଆଇ-ଲିଗ୍ କ୍ୱାଲିଫାୟର୍ସ ପଶ୍ଚିମବଙ୍ଗର ଦୁଇଟି ଭେନ୍ୟୁରେ ଅକ୍ଟୋବର ୮ରୁ ୧୯ ପର୍ଯ୍ୟନ୍ତ ହେବ। ଏଥିରେ ୫ଟି ଦଳ ପରସ୍ପର ସହିତ ରାଉଣ୍ଡ ରବିନ ଫର୍ମାଟରେ ଖେଳିବେ। ସମସ୍ତ ଟିମ୍ ଏବଂ ଅଫିସିଆଲଙ୍କ ରହଣୀ ଲାଗି କୋଲକାତାସ୍ଥିତ ଏକ ୫ ତାରକା ହୋଟେଲରେ ଜୈବ-ସୁରକ୍ଷିତ ବବଲ ବ୍ୟବସ୍ଥା କରାଯାଇଛି। କୋଭିଡ୍-୧୯ ମହାମାରୀ ପରିସ୍ଥିତି ଯୋଗୁ ବହୁ ଦିନ ହେଲା କ୍ରୀଡ଼ା କାର୍ଯ୍ୟକଳାପ ସ୍ଥଗିତ ରହିଥିଲା। ହିରୋ ଆଇ-ଲିଗ୍ କ୍ୱାଲିଫାୟର୍ସ ଜରିଆରେ ଆମେ ଭାରତରେ ଫୁଟ୍ବଲ ଆରମ୍ଭ କରିବାକୁ ଯାଉଛୁ। ଖେଳାଳି, ଅଫିସିଆଲ, କ୍ଲବ ମ୍ୟାନେଜମେଣ୍ଟ ଏପରିକି ଆମ ପାଇଁ ଏକ ଆଶ୍ୱସ୍ତିର ବିଷୟ ବୋଲି ଲିଗ୍ର ସିଇଓ ସୁନନ୍ଦୋ ଧର ପ୍ରକାଶ କରିଛନ୍ତି। କିନ୍ତୁ ଏହା ସତ୍ତ୍ୱେ ଆମେ ଖେଳାଳି ଓ ଅଫିସିଆଲଙ୍କ ସ୍ବାସ୍ଥ୍ୟ ସୁରକ୍ଷା ନେଇ କୌଣସି କ୍ଷେତ୍ରରେ ସାଲିସ କରାଯିବ ନାହିଁ। ସରକାରଙ୍କ ଗାଇଡ୍ଲାଇନ୍କୁ ଭିତ୍ତି କରି ଏଆଇଏଫ୍ଏଫ୍ ତରଫରୁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି) ପ୍ରସ୍ତୁତ କରାଯାଇଛି। ସମ୍ପୃକ୍ତ ଟିମ୍ଗୁଡ଼ିକୁ ଏ ବିଷୟରେ ଅବଗତ କରାଇ ଦିଆଯାଇଛି। ଖେଳାଳି ଓ ଅଫିସିଆଲମାନଙ୍କ ନିୟମିତ କୋଭିଡ୍ ଟେଷ୍ଟ ହେବ। ହୋଟେଲରେ ରିପୋର୍ଟିଂ ପୂର୍ବରୁ ୫ଟି ଦଳର ଖେଳାଳିମାନଙ୍କୁ ଆରଟି-ପିସିଆର ଟେଷ୍ଟ ଦେବାକୁ ହେବ। ଉଭୟ ଟେଷ୍ଟରେ ନେଗେଟିଭ ଆସିଲେ ସେମାନଙ୍କୁ ଟିମ୍ ହୋଟେଲରେ ପ୍ରବେଶ ପାଇଁ ଅନୁମତି ମିଳିବ। ହୋଟେଲରେ ପହଞ୍ଚତ୍ବା ପରେ ସମସ୍ତ ଟିମ୍ର ସଦସ୍ୟମାନଙ୍କୁ ପରବର୍ତ୍ତୀ ୩ ଦିନ ଆଇସୋଲେଶନରେ ରହିବାକୁ ପଡ଼ିବ। ପ୍ରଥମ ଆରଟି-ପିସିଆର ଟେଷ୍ଟ ସେପ୍ଟେମ୍ବର ୨୮ରେ ହେବ। ପୁନଶ୍ଚ ଏହି ଟେଷ୍ଟ ଅକ୍ଟୋବର ୪, ୯ ଓ ୧୯ରେ ହେବ। ଟେଷ୍ଟ ସମୟରେ ଯଦି କୌଣସି ସଦସ୍ୟ ପଜିଟିଭ୍ ହୁଅନ୍ତି ତେବେ ତାଙ୍କୁ ତୁରନ୍ତ ଆଇସୋଲେଶନରେ ରହିବାକୁୁ ହେବ। ଅନ୍ୟମାନଙ୍କୁ ଟ୍ରେନିଂ ପାଇଁ ଅନୁମତି ମିଳିବ। ନୂଆ ଖେଳାଳିଙ୍କ ସହିତ ଚୁକ୍ତିର ସମୟସୀମା ସେପ୍ଟେମ୍ବର ୩୦କୁ ବୃଦ୍ଧି କରାଯାଇଥିବାରୁ ମଝିରେ ଖେଳାଳି ବଦଳ କରିବାକୁ ଅନୁମତି ମିଳିବ ନାହିଁ।
