ମୁମ୍ବାଇ: ବଲିଉଡ୍ର ଓ୍ବାଣ୍ଡର ଓମ୍ୟାନ୍ ସୁସ୍ମିତା ସେନ୍ ଓ ୫୬ ବର୍ଷୀୟ ଲଳିତ ମୋଦିଙ୍କ ପ୍ରେମ ସମ୍ପର୍କକୁ ନେଇ ଏବେ ଚାରିଆଡ଼େ ଚର୍ଚ୍ଚା। ଇଣ୍ଡିଆନ୍ ପ୍ରିମିୟର ଲିଗ୍ର ପୂର୍ବତନ ଅଧ୍ୟକ୍ଷ ଲଳିତ ମୋଦି ସୁସ୍ମିତାଙ୍କୁ ଡେଟ୍ କରୁଥିବାର ଖବର ପ୍ରକାଶ ପାଇବା ପରେ ସୋସିଆଲ ମିଡିଆରେ ସୁସ୍ମିତା ଦୁଇ ଝିଅଙ୍କ ସହ ଏକ ଫଟୋ ପୋଷ୍ଟ କରିଛନ୍ତି। କିଛିଦିନ ହେବ ଦୁହେଁ ପରସ୍ପରକୁ ଡେଟ୍ କରିବା ଆରମ୍ଭ କରିଥିବାବେଳେ ଆଗାମୀ ଦିନରେ ସେମାନେ ବିବାହ ପାଇଁ ଯୋଜନା ରଖିଥିବା ଲଳିତ କହିଛନ୍ତି। ଲଳିତଙ୍କ ସୋସିଆଲ ମିଡିଆ ପୋଷ୍ଟର ଗୋଟିଏ ଦିନ ପରେ ସୁସ୍ମିତା ଟୁଇଟରରେ ଏକ ପୋଷ୍ଟ ଶେୟାର କରିଛନ୍ତି। କ୍ୟାପ୍ସନ୍ରେ ସେ ଲେଖିଛନ୍ତି ଯେ, ମୁଁ ଖୁସିରେ ଅଛି। ‘ବାହା ହୋଇନାହିଁ କି ମୁଦି ନାହିଁ। ନିସର୍ତ୍ତ ପ୍ରେମରେ ଆବଦ୍ଧ। ଏହା ଯଥେଷ୍ଟ ସ୍ପଷ୍ଟୀକରଣ।’ ତେବେ ସୁସ୍ମିତା ଯେଉଁ ଫଟୋ ପୋଷ୍ଟ କରିଛନ୍ତି ସେଥିରେ ଲଳିତ ନ ଥିବା ପ୍ରକାଶି ଖବର ଉପରେ ଏକ ପ୍ରଶ୍ନବାଚୀ ସୃଷ୍ଟି କରିଛି।
ଲଳିତ ଏକାଧିକ ଫଟୋ ଶେୟାର କରିଛନ୍ତି, ଯେଉଁଥିରେ ସୁସ୍ମିତା ଲଳିତଙ୍କର ଅତି ନିକଟରେ ବସିଛନ୍ତି। ଫଟୋରେ ସୁସ୍ମିତା ଏକ ମୁଦି ପିନ୍ଧିଥିବାର ଦେଖାଯାଇଥିବାବେଳେ ମୁଦିଟି ଲଳିତ ଗିଫ୍ଟ କରିଥିବା ଏବଂ ଦୁହିଁଙ୍କର ନିର୍ବନ୍ଧ ସରିଯାଇଥିବା ଗୁଜବ ସୃଷ୍ଟି ହୋଇଛି।
ତାଙ୍କ ଲାଇଫ୍,
ତାଙ୍କ ଡିସିଶନ: ଲଳିତଙ୍କ ପୁଅ
ଲଳିତ ସୁସ୍ମିତାଙ୍କୁ ଡେଟ୍ କରିଥିବା ଖବର ଉପରେ ନିଜ ପ୍ରତିକ୍ରିୟା ରଖିଛନ୍ତି ଲଳିତଙ୍କ ପୁଅ ରୁଚିର। ୨୮ ବର୍ଷୀୟ ରୁଚିର ମୋଦି କହିଛନ୍ତି ଯେ, ଦୁହିଁଙ୍କ ସମ୍ପର୍କକୁ ନେଇ ପରିବାର ଆଗରୁ ଅବଗତ ଥିଲେ। କିନ୍ତୁ ଏହା ଉପରେ ପରିବାରର ଅନ୍ୟ ସଦସ୍ୟଙ୍କ ସହ କୌଣସି ଆଲୋଚନା କରାଯାଇ ନାହିଁ। ତାଙ୍କ ଜୀବନର ନିଷ୍ପତ୍ତି ସେ ନେବାର ଅଧିକାର ଅଛି। ଆମ ଫ୍ୟାମିଲି ପଲିସି ଅନୁସାରେ କୌଣସି ବ୍ୟକ୍ତି କାହାରି ବ୍ୟକ୍ତିଗତ ଜୀବନରେ ହସ୍ତକ୍ଷେପ କରନ୍ତି ନାହିଁ।
ଦୁହିଁଙ୍କ ସମ୍ପର୍କ ବାବଦରେ ସୁସ୍ମିତାଙ୍କ ବାପା ସୁବୀର ସେନ ଓ ଭାଇ ରାଜୀବ କିଛି ଜାଣି ନ ଥିବା କହିଛନ୍ତି। ଅନ୍ୟପଟେ ସୁସ୍ମିତାଙ୍କ ଏକ୍ସ ବୟଫ୍ରେଣ୍ଡ ରୋହମନ ଶାଓ୍ବଲ ନିଜ ପ୍ରତିକ୍ରିୟାରେ କହିଛନ୍ତି ଯେ, ସୁସ୍ମିତା ଯଦି ଲଳିତଙ୍କୁ ନିଜ ଜୀବନସାଥୀ ଭାବେ ବାଛିଛନ୍ତି ତେବେ ନିହାତିଭାବେ ସେ ଭାବିଚିନ୍ତି ଏହି ନିଷ୍ପତ୍ତି ନେଇଥିବେ। ଲଳିତଙ୍କ ପରିବାର ସହ ସୁସ୍ମିତାଙ୍କ ସମ୍ପର୍କ ଖୁବ୍ ପୁରୁଣା।
ତେବେ ସୁସ୍ମିତା ଓ ଲଳିତଙ୍କ ସମ୍ପର୍କ ଖୁବ୍ ପୁରୁଣା। ଏକାଧିକ ପାର୍ଟି, ଫଙ୍କଶନ୍ରେ ସୁସ୍ମିତା ଲଳିତ ଓ ସ୍ତ୍ରୀ ମିନଲ ଏକାଠି ନଜରକୁ ଆସିଥିବାବେଳେ ତିନିଜଣ ମିଶି ଆଇପିଏଲ୍ ମ୍ୟାଚ୍ ଉପଭୋଗ କରୁଥିବାର ଦେଖିବାକୁ ମିଳିଛି। ପ୍ରେମ ସମ୍ପର୍କକୁ ନେଇ ସୁସ୍ମିତାଙ୍କ ନାମ ଅନେକ ସେଲିବ୍ରିଟି ଏବଂ ନାମୀ ବ୍ୟବସାୟୀଙ୍କ ନାମ ସହ ଯୋଡ଼ା ଯାଇଛି। ସେମାନେ ହେଲେ ଫିଲ୍ମ ନିର୍ଦ୍ଦେଶକ ବିକ୍ରମ ଭଟ୍ଟ, ପାକିସ୍ତାନୀ କ୍ରିକେଟର ଓ୍ବାସିମ ଆକ୍ରମ, ରଣଦୀପ ହୁଡ଼ା, ଟ୍ୟାଲେଣ୍ଟ କମ୍ପାନୀ ମାଲି ବଣ୍ଟି ସଚଦେବ, ଚେନ୍ ହୋଟେଲ ମାଲିକ ସଞ୍ଜୟ ନାରଙ୍ଗ ଓ ମଡେଲ ରୋହମନ ଶାଓ୍ବଲ। ରୋହମନ ସୁସ୍ମିତାଙ୍କଠାରୁ ୧୫ ବର୍ଷ ସାନ ହୋଇଥିବାବେଳେ ଗତବର୍ଷ ଡିସେମ୍ବରରେ ଦୁହିଁଙ୍କ ବ୍ରେକ୍ଅପ୍ ହୋଇଛି।
