ନୂଆଦିଲ୍ଲୀ,୧୮।୨ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାଲୋଚନା କରୁଥିବା ଆମେରିକୀୟ ବିଲିୟନେୟାର ଜର୍ଜ ସୋରେସଙ୍କ ଉପରେ କଂଗ୍ରେସର ବରିଷ୍ଠ ନେତା ପି ଚିଦାମ୍ବରମ ମଧ୍ୟ ନିଜର ମତ ଦେଇଛନ୍ତି। ଚିଦାମ୍ବରମ ଟୁଇଟ କରି କହିଛନ୍ତି ଯେ ଜର୍ଜ ସୋରୋସ ଅତୀତରେ ଯାହା କହିଥିଲେ ମୁଁ ତାଙ୍କର ଅଧିକାଂଶ ମନ୍ତବ୍ୟ ନେଇ ସହମତ ନ ଥିଲି। ବର୍ତ୍ତମାନ ସେ ଯାହା କହିଛନ୍ତି ତାହା ଉପରେ ମଧ୍ୟ ମୁଁ ସହମତ ନୁହଁ। ମାତ୍ର ତାଙ୍କର ଟିପ୍ପଣୀକୁ ଭାରତର ଗଣତାନ୍ତ୍ରିକ ଭାବେ ଚୟନ କରାଯାଇଥିବା ସରକାରଙ୍କୁ କ୍ଷମତା ଚ୍ୟୁତ କରିବାର ଏକ ପ୍ରୟାସ ବୋଲି କୁହାଯିବା ଏକ ପିଲାଳିଆମି ମନୋଭାବ।
ଶନିବାର ତାଙ୍କ ଅଫିସିଆଲ ଆକାଉଣ୍ଟରୁ ଏକ ଟୁଇଟ ଜରିଆରେ ଚିଦାମ୍ବରମ କହିଛନ୍ତି, ଭାରତ ଜନସାଧାରଣ ତାହା ସ୍ଥିର କରିବେ କିଏ ଭାରତ ସରକାରରେ ରହିବେ ଏବଂ କିଏ ବାହାରକୁ ଯିବେ। ମୁଁ ଜାଣି ନ ଥିଲି ମୋଦି ସରକାର ଏତେ ଦୁର୍ବଳ ଯେ ଜଣେ ୯୨ ବର୍ଷ ବୟସ୍କ ଧନୀ ବିଦେଶୀ ନାଗରିକଙ୍କ ବିବୃତ୍ତି ନେଇ ଏଭଳି ଭୟଭୀତ ହୋଇ ଯାଇଛନ୍ତି।
ଅନ୍ୟ ଏକ ଟୁଇଟରେ ସେ ଜର୍ଜ ସୋରୋସଙ୍କୁ ଅଣଦେଖା କରିବା ଏବଂ ନୁରିଲ ରୁବିନିଙ୍କ କଥା ଶୁଣିବାକୁ ପରାମର୍ଶ ଦେଇଛନ୍ତି। ଚିଦାମ୍ବରମଙ୍କ ଟୁଇଟ ଅନୁଯାୟୀ ରୁବିନି ଚେତାବନୀ ଦେଇଛନ୍ତି, ଭାରତ ବୃହତ ଘରୋଇ କମ୍ପାନୀ ଦ୍ୱାରା ପରିଚାଳିତ ହେଉଛି। ଯାହା ଦ୍ୱାରା ପ୍ରତିଯୋଗିତା ବନ୍ଦ ହେବାର ସମ୍ଭାବନା ରହିଛି। ଏଭଳି ପ୍ରର୍କିୟା ନୂତନ ପ୍ରବେଶକାରୀଙ୍କୁ ଶେଷ କରିପାରିବାର କ୍ଷମତା ରଖିଛି।
