ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ଅନ୍ତର୍ଗତ କଣ୍ଟାମାଳ ଗ୍ରାମରେ ମୋର ଜନ୍ମ। ଜାତିରେ ଜନଜାତି ନହେଲେ ମଧ୍ୟ ସଂସ୍କୃତିରେ ସମ୍ପୁର୍ଣ୍ଣ ଆଦିବାସୀ ଜୀବନଶୈଳୀ ପ୍ରତିଭାତ। ସେମାନଙ୍କ ସହିତ ଏକାକାର ହେବାର ସୌଭାଗ୍ୟ ମିଳିଛି। ବାଲ୍ୟଜୀବନ ସେମାନଙ୍କ ସହିତ ବିତିବା ପରେ ପ୍ରାଥମିକରୁ ଦଶମ ଯାଏଁ ସରକାରୀ ଉଚ୍ଚ ବିଦ୍ୟାଳୟ କଣ୍ଟାମାଳଠାରେ ଶିକ୍ଷାଲାଭ କରିଥିଲି। ଏଠାରେ ଶିକ୍ଷକ ବବୃବାହନ ନାୟକ ଓ ବିଦ୍ୟାଧର ସାହୁଙ୍କ ପ୍ରତ୍ୟେକ୍ଷ ତତ୍ତ୍ୱାବଧାନରେ ବିଦ୍ୟାଳୟର ପ୍ରଥମ ଛାତ୍ର ଭାବେ ଦଶମରେ ଉର୍ତ୍ତିଣ୍ଣ ହୋଇଥିଲି। ଭୈରବ ମହାବିଦ୍ୟାଳୟ ଡାବୁଗାଁରେ ଯୁକ୍ତଦୁଇ ଓ ନବରଙ୍ଗପୁର ମହାବିଦ୍ୟାଳୟରେ ଯୁକ୍ତତିନି ପଢିବା ପରେ ମୁଣ୍ଡେଇବାକୁ ପଡିଥିଲା ପାରିବାରିକ ଜଞ୍ଜାଳ। ଯୁକ୍ତତିନି ପରେ ୨୦୧୮ ମସିହାରେ ଗୋଟିଏ ଏନ୍ଜିଓ ସଂସ୍ଥାରେ ଯୋଗଦେଇ ପ୍ରଥମ ରୋଜଗାର କରିଥିଲି।
ପ୍ରଥମ ରୋଜଗାର ଖୁବ କମ ଥିଲେ ମଧ୍ୟ ଜମି ପାଇଁ କିଣିଥିଲି ଧାନ ବିହନ। ସେହି ବର୍ଷଠାରୁ ନିଜେ ଚାଷକାମ କରିବା ଆରମ୍ଭ କଲି। ମୋର ପ୍ରଥମ ରୋଜଗାର ମତେ ଚାଷକାମ କରିବା ପାଇଁ ବାଟ ଦେଖାଇଥିଲା। ତେଣୁ ଏନ୍ଜିଓ ସଂସ୍ଥା ଛାଡି ଚାଷ କରିବା ଶିଖିଲି। ଏବେ ଚାଷକୁ ଜୀବିକା କହିବାରେ କୌଣସି ଦ୍ବିଧା ନାହିଁ। ଏହାବ୍ୟତୀତ ସୃଜନଶୀଳତା ପ୍ରତି ରହିଛି ଅହେତୁକ ଦୂର୍ବଳତା। ଆଦିବାସୀ ଭାଷା, ସାହିତ୍ୟ, ସଂସ୍କୃତି, ପରମ୍ପରା ଓ ସାମାଜିକ ଜୀବନଶୈଳୀ ପ୍ରତି ଆକୃଷ୍ଟ ହୋଇ କ୍ରମେ ଅବିଭକ୍ତ କୋରାପୁଟ ଓ ଅବିଭକ୍ତ ବସ୍ତର ଜିଲାର ଲୋକ ସଂସ୍କୃତି ଉପରେ ଲେଖାଲେଖି କରେ। ମୋ ଲେଖାରେ ଗବେଷଣା’ ତ ନୁହେଁ ମୁଁ ଭୋଗୁଥିବା ଆଦିବାସୀ ଜନସମାଜର ସଂସ୍କୃତିକୁ ହିଁ ଛାଞ୍ଚୁଛି। ଗୀତକୁଡିଆ ଗୀତର ଆଲୋଚନା ପୁସ୍ତକ ‘ଗୀତମାରା’, ନ୍ୟାସନାଲ ବୁକ୍ ଟ୍ରଷ୍ଟ ଦ୍ୱାରା ପ୍ରକାଶିତ ଦେଶିଆ ଭାଷାର ଅନୁବାଦ ପୁସ୍ତକ ‘କାଏ ହେଲା’, ଦେଶିଆ ଭାଷାର କବିତା ସଙ୍କଳନ ‘ବାଲିଫୁଲ’ ଓ ଓଡିଆ କବିତା ପୁସ୍ତକ ‘ପ୍ରେମିକା’ ପ୍ରକାଶିତ ହୋଇଛି । ଲୋକ ଦେବୀ ଦେବତାମାନଙ୍କ ଉପରେ ଆଗକୁ ଗୋଟିଏ ପ୍ରବନ୍ଧ ପୁସ୍ତକ ମଧ୍ୟ ଆସୁଛି। ଆକାଶବାଣୀ ଓ ଦୂରଦର୍ଶନରେ ଲେଖା ବିଭିନ୍ନ ସମୟରେ ବାଜୁଛି। ଏ ସବୁ ହିଁ ମୁଁ ସଞ୍ଚୟ କରୁଥିବା ସମ୍ପଦ।
ଅବିଭକ୍ତ କୋରାପୁଟ ତଥା ଓଡିଶାର ସାହିତ୍ୟ ଓ ସଂସ୍କୃତିର ପ୍ରଚାର ପ୍ରସାର କରିବା ଉଦ୍ଦେଶ୍ୟରେ ବର୍ତ୍ତମାନ ଆରମ୍ଭ କରିଛି ‘ହର୍ଷିତା’ ନାମରେ ଗୋଟିଏ ପ୍ରକାଶନୀ ସଂସ୍ଥା। ବଡ଼ମାନଙ୍କ ଆଶୀର୍ବାଦ, ସାନମାନଙ୍କ ଭଲପାଇବା ଓ ପରିବାରବର୍ଗଙ୍କ ସହଯୋଗ ହିଁ ଆଗାମୀ ଜୀବନକୁ ସରସ ସୁନ୍ଦର କରିବ। ସେତିକି ମମତ୍ୱ ମତେ ସବୁବେଳେ ମିଳିଛି ତେଣୁ ସମସ୍ତଙ୍କୁ ମୋର ଆନ୍ତରିକ କୃତଜ୍ଞତା ।
