ଅଗରତାଲା,୮ା୭:
ବିଧାନସଭା ଅଧିବେଶନ ଚାଲିଥିବାବେଳେ ଗୃହରେ ମୋବାଇଲ ବ୍ୟବହାର ମନା। ଏହା ଜାଣି ସୁଦ୍ଧା ତ୍ରିପୁରାର ବାଗ୍ବାସା ଭାଜପା ବିଧାୟକ ଯାଦବଲାଲ ନାଥ ବିଧାନସଭାରେ ବସି ଅଶ୍ଳୀଳ ଭିଡିଓ ଦେଖୁଥିଲେ। ଗତ ମାର୍ଚ୍ଚ ୩୦ର ଏହି ଦୃଶ୍ୟ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହେବା ପରେ ଭାଜପା ପାଇଁ ଲଜ୍ଜାଜନକ ସ୍ଥିତି ଉପୁଜିଥିଲା। କିନ୍ତୁ ଗୈରିକ ଦଳ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଇ ନ ଥିଲା। ଜୁଲାଇ ୭ (ଶୁକ୍ରବାର) ଥିଲା ତ୍ରିପୁରା ମୌସୁମୀ ଅଧିବେଶନର ପ୍ରଥମ ଦିନ। ଅର୍ଥମନ୍ତ୍ରୀ ପ୍ରାଣଜିତ୍ ସିଂହ ରୟ ଗୃହରେ ୨୦୨୩-୨୪ ଆର୍ଥିକ ବର୍ଷ ପାଇଁ ୨୭,୬୫୪ କୋଟି ଟଙ୍କାର ନିଅଣ୍ଟିଆ ବଜେଟ ଉପସ୍ଥାପନ କରି କହିଥିଲେ, ରାଜ୍ୟ ଅର୍ଥନୀତିରେ ୮% ଅଭିବୃଦ୍ଧି ଦେଖିବାକୁ ମିଳିପାରେ। ବିରୋଧୀ ଦଳ ନେତା ଅନିମେଶ ଦେବବର୍ମା ଭାଜପା ନେତାଙ୍କ ପର୍ନ ଭିଡିଓ ପ୍ରସଙ୍ଗ ଉଠାଇ ତାଙ୍କ ବିରୋଧରେ କି କାର୍ଯ୍ୟାନୁଷ୍ଠାନ ନିଆଯାଇଛି ବୋଲି ପ୍ରଶ୍ନ କରିଥିଲେ। ଏଥିସହ ଏହି ପ୍ରସଙ୍ଗରେ ବିତର୍କ ପାଇଁ ମୁଲତବୀ ପ୍ରସ୍ତାବ ଆଗତ କରିଥିଲେ। ବାଚସ୍ପତି ବିଶ୍ୱବନ୍ଧ ସେନ ଉକ୍ତ ପ୍ରସ୍ତାବକୁ ପ୍ରତ୍ୟାଖ୍ୟାନ କରି କହିଥିଲେ, ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଆଲୋଚନା ଶେଷ ହେବା ପରେ ବିରୋଧୀଙ୍କ କଥା ବୁଝାଯିବ। ଏତିକିରେ ସମସ୍ତ ୨୭ ବିରୋଧୀ ବିଧାୟକ ଗୃହର ମଧ୍ୟଭାଗକୁ ଯାଇ ସ୍ଲୋଗାନ ଦେଇଥିଲେ। ଜଣେ ବିଧାୟକ ଏକ ଟେବୁଲ ଉପରେ ଚଢ଼ି ଯାଦବଲାଲଙ୍କ ବିରୋଧରେ ସ୍ଲୋଗାନ ଦେବାରେ ଲାଗିଲେ। ଫଳରେ ଉଭୟ ଶାସକ ଓ ବିରୋଧୀ ବିଧାୟକଙ୍କ ହୋହଲ୍ଲା କରି ପରସ୍ପରକୁ ଟାର୍ଗେଟ କରିଥିଲେ। ୪୦ ମିନିଟ୍ ଧରି ହାଇଡ୍ରାମା ଚାଲିବା ପରେ ବାଚସ୍ପତି ଅସନ୍ତୋଷ ବ୍ୟକ୍ତ କରିବା ସହ ସିପିଆଇଏମ୍ ବିଧାୟକ ନୟନ ସର୍କାର, କଂଗ୍ରେସର ସୁଦୀପ ରୟ ବର୍ମନଙ୍କ ସହ ତିପ୍ରା ମୋଥା ପାର୍ଟି (ଟିଏମ୍ପି)ର ୩ ବିଧାୟକ ବିଶ୍ୱକେତୁ ଦେବବର୍ମା, ନନ୍ଦିତା ରେଆଙ୍ଗ ଓ ରଞ୍ଜିତ ଦେବବର୍ମାଙ୍କୁ ଗୃହକାର୍ଯ୍ୟରେ ବାଧା ସୃଷ୍ଟି ଅଭିଯୋଗରେ ନିଲମ୍ବନ କରିଛନ୍ତି। ବାଚସ୍ପତିଙ୍କ ଏହି କାର୍ଯ୍ୟାନୁଷ୍ଠାନ ବିରୋଧରେ ବିରୋଧୀ ଦଳଗୁଡ଼ିକ କକ୍ଷତ୍ୟାଗ କରିଛନ୍ତି। ମୁଖ୍ୟମନ୍ତ୍ରୀ ମାଣିକ ଶାହା କହିଛନ୍ତି, ବିଧାନସଭା ହେଉଛି ପବିତ୍ର ସ୍ଥାନ ଓ ଗଣତନ୍ତ୍ରର ମନ୍ଦିର। ବଜେଟ ଅଧିବେଶନର ପ୍ରଥମ ଦିନରେ ଯାହାସବୁ ଘଟିଗଲା, ତାହା ଅବିଶ୍ୱସନୀୟ ଓ ଅନୁପଯୁକ୍ତ। ସେମାନଙ୍କ ବିକ୍ଷୋଭ ଏକ ପାପ।
