ଦିଗପହଣ୍ଡି,୯।୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଚୁଡୁଙ୍ଗପୁର ଗ୍ରାମରେ ରହୁଥିବା ଏ.ଅନ୍ତରା ପାତ୍ର ତାଙ୍କ ସ୍ତ୍ରୀ ଏ.ଶଶି ପାତ୍ରଙ୍କୁ ମରଣାନ୍ତକ ଆକ୍ରମଣ କରି ହତ୍ୟା ଉଦ୍ୟମ କରିଥିବା ଅଭିଯୋଗ ହୋଇଛି। ପୋଲିସ ଅଭିଯୋଗକୁ ଭିତ୍ତି କରି ଘଟଣାରେ ସମ୍ପୃକ୍ତ ସ୍ବାମୀ ଅନ୍ତରାଙ୍କୁ ତଦନ୍ତକାରୀ ଅଧିକାରୀ ଏଏସ୍ଆଇ ଦିଲ୍ଲୀପ ଗୋରଡ଼ା ରବିବାର ଗିରଫ କରି ଅପରାହ୍ନରେ କୋର୍ଟ ଚାଲାଣ କରିଛନ୍ତି। ଏନେଇ ଥାନାରେ ଏକ ମାମଲା(ନଂ.୩୨୧/୨୬) ରୁଜୁ ହୋଇଛି। ଜାମିନ ଖାରଜ ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି।
ମିଳିଥିବା ସୂଚନା ମୁତାବକ, ଗୁରୁବାର ବିଳମ୍ବିତ ରାତିରେ ଶଶି ଘରେ ଶୋଇଥିବା ବେଳେ ସ୍ବାମୀ ଅନ୍ତରା ନିଶାସକ୍ତ ଅବସ୍ଥାରେ ଘରକୁ ଆସି ତାଙ୍କୁ ଆପତ୍ତିଜନକ ଭାଷାରେ ଗାଳି କରିଥିଲେ। ପ୍ରତିବାଦ କରିବାରୁ ତାଙ୍କୁ ମୁଥ, ଲାତ, ଗୋଇଠା ମାରି ତଳେ ପକାଇ ତଣ୍ଟି ଚିପି ମାରିଦେବାକୁ ଉଦ୍ୟମ କରିଥିଲେ। ବୃଦ୍ଧା ମା’ ମଙ୍ଗୁଳି ପାତ୍ର ଛଡ଼ାଇବାକୁ ଯିବାରୁ ଅନ୍ତରା ତାଙ୍କୁ ମଧ୍ୟ ଗାଳି କରି ମାରିବାକୁ ପଛାଇ ନ ଥିଲେ।
ପରେ ଅନ୍ତରା ତାଙ୍କ ସ୍ତ୍ରୀ ଶଶିଙ୍କ ଚୁଟି ଧରି ଘୋଷାଡି ନେଇ ଘରେ ଥିବା ଏକ ପେଷଣା ପଥରରେ ମୁଣ୍ଡକୁ ଛେଚି ହତ୍ୟା ଉଦ୍ୟମ କରିଥିଲେ। ଖବରପାଇ ଗ୍ରାମର ବଡ଼ ସାହିରେ ରହୁଥିବା ଶଶିଙ୍କ ବାପା କାଶୀ ପାତ୍ର, ଭାଇ ଶଙ୍କର ପାତ୍ର ଏବଂ ସାହି, ପଡୋଶୀ ପହଞ୍ଚି ଶଶିଙ୍କୁ ଉଦ୍ଧାର କରି ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେ ସୁସ୍ଥ ହେବା ପରେ ଶନିବାର ଦିଗପହଣ୍ଡି ଥାନାରେ ଏତଲା ଦେଇଥିଲେ।
ଏତଲାକୁ ଭିତ୍ତିକରି ଆଇଆଇସି କିଶୋର କୁମାର ସାମଲ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଥିଲେ। ଚୁଡୁଙ୍ଗପୁର ଗ୍ରାମର ବୃଦ୍ଧା ମଙ୍ଗୁଳି ନିଃସନ୍ତାନ ଥିବାରୁ ଚିକିଟି କେ.ନୂଆଗାଁ ରେ ରହୁଥିବା ନାତି ଅନ୍ତରାଙ୍କୁ ପୋଷ୍ୟ ପୁଅ ଭାବେ ଆଣି ଘରେ ରଖିଥିଲେ। ଅନ୍ତରା ନିଶାସକ୍ତ ଅବସ୍ଥାରେ ସ୍ତ୍ରୀ ଶଶିଙ୍କୁ ବିଭିନ୍ନ ସମୟରେ ମାରପିଟ୍ କରୁଥିଲେ। କେହି ପ୍ରତିବାଦ କଲେ ତାଙ୍କୁ ମଧ୍ୟ ଧମକ ମଧ୍ୟ ଦେଉଥିଲେ।
ଏପରିକି ଶଶି ଚାଷ ଜମିରେ କାମ କରୁଥିବା ବେଳେ ସ୍ବାମୀ ଅନ୍ତରା ତାଙ୍କୁ ଅନେକ ଥର ଗୋଡ଼ାଇ ଗୋଡ଼ାଇ ମାଡ଼ ମାରିଥିବା ତଦନ୍ତକାରୀ ଅଧିକାରୀଙ୍କ ନିକଟରେ ବୟାନ ଦେଇଛନ୍ତି। ତଦନ୍ତକାରୀ ଅଧିକାରୀ ହତ୍ୟା ଉଦ୍ୟମରେ ବ୍ୟବହୃତ ପଥରକୁ ଅଭିଯୁକ୍ତଙ୍କ ନିକଟରୁ ଜବତ କରିଛନ୍ତି।