ହାଟଡିହୀ/ଛେନାପଦି,୨୯l୬(ଶୁଭକାନ୍ତ ନାୟକ/ନିରାକାର ପରିଡ଼ା):କେନ୍ଦୁଝର ଜିଲା ହାଟଡିହୀ ଅଞ୍ଚଳରେ ସୋମବାର ଏକ ଫ୍ୟାମିଲି ଡ୍ରାମା ଦେଖିବାକୁ ମିଳିଛି l ଯାହାକି ମୁଖ୍ୟ ଆଲୋଚନାର ବିଷୟ ସାଜିଛି l ଜଗତସିଂହପୁର ଅଞ୍ଚଳର ଜଣେ ବିବାହିତା ମହିଳା ନିଜ ସ୍ବାମୀକୁ ଛାଡି ହାଟଡିହୀ ଅଞ୍ଚଳର ଜଣେ ବିବାହିତ ପୁରୁଷ ସହ ପଳାଇ ଆସିଛନ୍ତି l ମହିଳାଙ୍କ ସ୍ବାମୀ ନିଜ ସ୍ତ୍ରୀକୁ ଘରକୁ ଫେରାଇ ନେବା ପାଇଁ ଖୋଜିଖୋଜି ହାଟଡିହୀ ଅଞ୍ଚଳରେ ଆସି ପହଞ୍ଚିଛନ୍ତି l
ସୂଚନା ଅନୁସାରେ, ନନ୍ଦିପଦା ଥାନା ଅଧିନ ଅଣା ଗ୍ରାମର ଗୋବିନ୍ଦ ମଲ୍ଲିକ ଏକ ଯାତ୍ରା ପାର୍ଟିରେ କାମ କରୁଥିଲେ l ସେ ସୋସୋ ଥାନା ନାହା ଗ୍ରାମର ରଞ୍ଜିତା ରାଣୀ ବେହେରାଙ୍କୁ ପ୍ରାୟ ୧୦ ବର୍ଷ ପୂର୍ବେ ବିବାହ କରିଥିଲେ। ତାଙ୍କର ଦୁଇଟି ଛୁଆ ଅଛନ୍ତି। ଗତ ଦୁଇମାସ ତଳେ ଗୋବିନ୍ଦ ନିଜ ସ୍ତ୍ରୀକୁ ମୁଁ ଯାତ୍ରାରୁ ଫେରିଲେ ତୁମକୁ ଆଣିବି କହି ନିଜ ଘରକୁ ପଠାଇ ଦେଇଥିଲେ। ରଞ୍ଜିତା ଶ୍ୱଶୁରଙ୍କ ସେବାଶୁଶ୍ରୁଷା କରିବା ପାଇଁ ଶ୍ୱଶୁରଙ୍କ ପୈତୃକ ଘରକୁ ପଳାଇଥିଲେ। ଗୋବିନ୍ଦ ଯାତ୍ରା ପାର୍ଟିରୁ ଘରକୁ ଫେରିବା ପରେ ନିଜ ସ୍ତ୍ରୀକୁ ଆଣି ନ ଥିଲେ l ମାତ୍ର ଜଗତସିଂହପୁରରୁ ଜଣେ ବିବାହିତା ମହିଳାଙ୍କୁ ଘରକୁ ଆଣି ତାଙ୍କ ସହିତ ରହୁଥିଲେ। ଖବର ପାଇ ପତ୍ନୀ ରଞ୍ଜିତା ନିଜର ଦୁଇ ଭାଇଙ୍କୁ ସାଥିରେ ଧରି ସ୍ବାମୀ ରହୁଥିବା ଘରେ ପହଞ୍ଚିଥିଲେ l ସ୍ବାମୀ ଗୋବିନ୍ଦ ଅନ୍ୟ ଜଣେ ମହିଳାଙ୍କୁ ଧରି ରହିଥିବା ରଞ୍ଜିତା ଦେଖିବାକୁ ପାଇଥିଲେ l ଯାହାକୁ ନେଇ କିଛି ସମୟ ପର୍ଯ୍ୟନ୍ତ ସ୍ତ୍ରୀ,ସ୍ବାମୀ ଏବଂ ଅନ୍ୟ ମହିଳାଙ୍କ ମଧ୍ୟରେ ହାଇଡ୍ରାମା ଚାଲିଥିଲା l ଦୁଇ ମହିଳାଙ୍କ ମଧ୍ୟରେ ହାତାହାତି ପରିସ୍ଥିତି ସୃଷ୍ଟି ହୋଇଥିଲା l ଏପରିକି ଗୋବିନ୍ଦ ଏହି ଘରେ ବାହାର ଅଞ୍ଚଳର ମହିଳାଙ୍କୁ ଆଣି ସେକ୍ସ ର଼୍ୟାକେଟ ଚଳାଉଛି ବୋଲି ସ୍ତ୍ରୀ ରଞ୍ଜିତା କହିଥିଲେ l ନନ୍ଦିପଦା ପୋଲିସ ଘଟଣାସ୍ଥଳରେ ପହଞ୍ଚି ଗୋବିନ୍ଦ ଏବଂ ଅନ୍ୟ ମାନଙ୍କୁ ଧରି ଥାନାକୁ ଆଣିଥିଲେ। ନିଜର ସ୍ତ୍ରୀ ଓ ଦୁଇ ଦୁଇଟି ଛୁଆଥିବା ବେଳେ ଅନ୍ୟ ଜଣେ ମହିଳାଙ୍କୁ ପାଖରେ ରଖିବାକୁ ଗ୍ରାମବାସୀ ନାପସନ୍ଦ କରିଛନ୍ତି l
ଅପରପକ୍ଷେ ଜଗତସିଂହପୁରର ଏହି ମହିଳାଙ୍କ ସ୍ବାମୀ ନନ୍ଦିପଦା ଥାନାରେ ପହଞ୍ଚି ନିଜ ସ୍ତ୍ରୀଙ୍କୁ ଘରକୁ ଫେରାଇ ନେବାକୁ ଚାହିଁଛନ୍ତି l ଏପରି ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ରଞ୍ଜିତାଙ୍କ ପ୍ରତି ଅନ୍ୟାୟ ଏବଂ ଅତ୍ୟାଚାର କରାଯାଇଥିବା ନେଇ ଲିଖିତ ଅଭିଯୋଗ ହେବା ପରେ ପୋଲିସ ୨୭୯/୨୦୨୬ ରେ ଏକ ମାମଲା ପଞ୍ଜିକରଣ କରି ତଦନ୍ତ ଆରମ୍ଭ କରିଛି l