ବିଜେପୁର,୨୩।୮ (ଡି.ଏନ.ଏ.)-ବରଗଡ଼ ଜିଲା ବିଜେପୁର ଥାନା ଅନ୍ତର୍ଗତ ବେନିଆଁଚାଲ ଗାଁରେ ନୂଆଁଖାଇର ଗୋଟିଏ ଦିନ ପୂର୍ବରୁ ଏକ ଅଭାବନୀୟ ଘଟଣା ଘଟିଛି ା ପାରିବାରିକ କଳହକୁ କେନ୍ଦ୍ର କରି ଜଣେ ବ୍ୟକ୍ତି ସ୍ତ୍ରୀ ଓ ୧୨ବର୍ଷର ଝିଅକୁ ଜୋରଜବରଦସ୍ତ ବିଷ ପିଆଇବା ପରେ ନିଜେ ବିଷ ପିଇ ଆତ୍ମହତ୍ୟା କରିଛନ୍ତି ା ଫଳରେ ୩ ଜଣଙ୍କ ମୃତ୍ୟୁ ଘଟିଛି ା ମୃତକ ହେଲେ ରଥ ମହାନନ୍ଦ (୪୫), ସ୍ତ୍ରୀ କୁମୁଦିନୀ (୪୦) ଓ ଝିଅ କବିତା (୧୨) । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ କରାଇବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି ା ଗୋଟଏ ଜୁଇରେ ୩ ମୃତଦେହକୁ ଦାହ କରାଯାଇଛି ା ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି ା
ପୋଲିସର ସୂଚନା ଅନୁଯାୟୀ, ଶନିବାର ରଥ ମହାନନ୍ଦଙ୍କ ପରିବାରରେ କୌଣସି କଥାକୁ ନେଇ ପାଟିତୁଣ୍ଡ ହୋଇଥିଲା ା ଧୀରେ ଧୀରେ ସେହି କଳି ଉଗ୍ରରୂପ ଧାରଣ କରିଥିଲା ା ଫଳରେ ରଥ ନିଜ ମାନସିକ ଭାରସାମ୍ୟ ହରାଇ କୁମୁଦିନୀଙ୍କୁ ବିଷ ପିଆଇ ଦେଇଥିଲେ । ଏପରି ଘଟଣା ଦେଖି ଝିଅ କବିତା ବାପାଙ୍କୁ ବାରଣ କରିଥିଲେ ା ହେଲେ ରଥ ଏତେ ଉତ୍ତେଜିତ ହୋଇପଡିଥିଲେ ଯେ, କବିତାଙ୍କୁ ବି ବିଷ ପିଆଇ ଦେଇଥିଲେ । ଏହାର କିଛି ସମୟ ପରେ ବିଷକ୍ରିୟାରେ ମା’ ଝିଅ ଛଟପଟ ହୋଇଥିଲେ ା ନିଜ ଆଖି ସାମ୍ନାରେ ଏହି ଦୃଶ୍ୟ ଦେଖି ରଥ କ’ଣ କରିବେ କିଛି ଚିନ୍ତା କରି ପାରି ନ ଥିଲେ ା ଶେଷରେ ସେ କୌଣସି ଉପାୟ ନ ପାଇ ନିଜେ ବିଷ ପିଇ ଦେଇଥିଲେ । ଏହି ଖବର ପାଇବା ପରେ ଆତ୍ମୀୟସ୍ବଜନ ସେମାନଙ୍କୁ ବିଜେପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ । ଡାକ୍ତର ଝିଅ କବିତାଙ୍କୁ ମୃତ ଘୋଷଣା କରିଥିଲେ । ଗୁରୁତର ଅବସ୍ଥାରେ ରଥ ଓ କୁମୁଦିନୀଙ୍କୁ ଜିଲା ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ପରେ ଉଭୟଙ୍କୁ ବୁର୍ଲା ଭିମ୍ସାର ପଠାଯାଇଥିଲା । ହେଲେ ଚିକିତ୍ସାଧୀନ ଅବସ୍ଥାରେ ଶନିବାର ବିଳମ୍ବିତ ରାତିରେ ଉଭୟଙ୍କ ମୃତ୍ୟୁ ଘଟିଥିଲା । ଦିଲୀପ ମହାନନ୍ଦଙ୍କ ଏତଲା ଆଧାରରେ ପୋଲିସ ଏକ ହତ୍ୟା ମାମଲା(ନଂ.୧୭୪/୨୦) ରୁଜୁ କରିଛି । ଏ ନେଇ ତଦନ୍ତ ଚାଲିଥିବା ଆଇଆଇସି ରାଜେନ୍ଦ୍ର ସିଆଲ କହିଛନ୍ତି ।
