ପ୍ରତ୍ୟେକ ବ୍ୟକ୍ତିଙ୍କର କିଛି ନା କିଛି ପସନ୍ଦ,ନାପସନ୍ଦ ରହିଛି। ଅନେକ ଲୋକ ସବୁବେଳେ ଭିନ୍ନ କିଛି କରିବାକୁ ଚାହିଁଥାନ୍ତି। କେହି କେହି ପୁରୁଣା ଟଙ୍କା ସଂଗ୍ରହ କରି ରଖିଥାନ୍ତି ତ କେହି କେହି ଟିକେଟ। ସେହିପରି କାନାଡାରେ ରହୁଥିବା ଜଣେ ମହିଳାଙ୍କର ଏକ ଅଜବ ସୌକ୍ ରହିଛି। ସେ ଭଳି କି ଭଳି ଜୋତା କିଣିବାକୁ ଭଲପାଆନ୍ତି। ଜୋତାକୁ ଏତେ ଭଲ ପାଆନ୍ତି ଯେ, ସେ ତାଙ୍କ ବେଡ୍ରୁମ୍କୁ ଖାଲି ଜୋତାରେ ସଜାଇଛନ୍ତି।
ରିୟାନ ନାମକ ଏହି ମହିଳା ଜଣକ ବଜାରରେ ଯେଉଁ ଜୋତା ତାଙ୍କର ପସନ୍ଦ ହୁଏ ସେ ସଙ୍ଗେ ସଙ୍ଗେ କିଣି ଆଣନ୍ତି। ଏବେ ସେ ତାଙ୍କର ଶୋଇବା ଘର କାନ୍ଥକୁ କେବଳ ଜୋତାରେ ସଜାଇଛନ୍ତି। ତାଙ୍କର ଏହି ଅଭ୍ୟାସ ଯୋଗୁ ଲୋକେ ତାଙ୍କୁ ‘କ୍ରୋକ୍ କୁଇନ୍’ ବୋଲି ଡାକିଥାନ୍ତି।
ଏକଥା ନିଜେ ରିୟାନ ସୋସିଆଲ ମିଡିଆରେ ଏକ ଭିଡିଓ ଶେୟାର କରି କହିଛନ୍ତି। ସେ ଏକ ଛୋଟ ଭିଡିଓରେ ନିଜର କ୍ରୋକ୍ସ କଲେକ୍ସନ ମଧ୍ୟ ପ୍ରଦର୍ଶନ କରିଛନ୍ତି, ଯାହା ଅତ୍ୟନ୍ତ ଆକର୍ଷଣୀୟ। ରିୟାନ ତାଙ୍କ ଶୋଇବା ଘରର ଏକ ଫଟୋ ଦେଖାଇଛନ୍ତି। ସେ କିପରି ଭଳି କି ଭଳି ରଙ୍ଗୀନ ଜୋତାକୁ ପୂରା କାନ୍ଥରେ ଟାଙ୍ଗିଛନ୍ତି। ୧୧୪ ହଳ ଜୋତା ସେ ତାଙ୍କ ବେଡ୍ରୁମ୍ରେ ରଖିଛନ୍ତି। ରିୟାନଙ୍କର ୩ ଲକ୍ଷ ଫଲୋଅର୍ସ ଅଛନ୍ତି ଏବଂ ସେ କ୍ରୋକ୍ସ ଆମ୍ବାସାଡର ହେବାକୁ ଯୋଗ୍ୟ ବୋଲି ଅନେକ ୟୁଜର ଦାବି କରିଛନ୍ତି।
ରିୟାନଙ୍କ ଏହି ପୋଷ୍ଟରେ ଅନେକ ୟୁଜର କହିଥିଲେ, ଜୋତା ପ୍ରତି କ’ଣ ଏବେ ବି ଦୁର୍ବଳତା ରହିଛି। କିଛି ଲୋକ ନିଜ ନିଜ ପାଖରେ ଥିବା ଜୋତାର ସଂଖ୍ୟା ମଧ୍ୟ କହିଥିଲେ। ରିୟାନ କହିଛନ୍ତି, ତାଙ୍କ ପାଖରେ କେବଳ ଶହ ଶହ କ୍ରୋକ ନାହିଁ, ସେ ପିନ୍ଧିବା ପାଇଁ ୭୭୦ଟି ଆସେସରିଜ ମଧ୍ୟ କିଣିଛନ୍ତି, ଯାହା ତାଙ୍କ ଲୁକ୍ ମଧ୍ୟ ବଦଳାଇ ଦିଏ।
