କେସିଙ୍ଗା,୨୦ା୪(ଡି.ଏନ.ଏ.): ଗତ କିଛି ଦିନ ହେବ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଯୋଗୁ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଟାଣ ଖରା ଯୋଗୁ କଳାହାଣ୍ଡି ଜିଲା କେସିଙ୍ଗା ବ୍ଲକରେ ଏବେ ଠାରୁ ଅଧିକାଂଶ କୂଅ, ପୋଖରୀ, ନାଳ ଶୁଖିବାରେ ଲାଗିଛି। ଅସହ୍ୟ ଗରମ ଅନୁଭୂତ ହେଉଥିବା ବେଳେ ପାନୀୟ ଜଳ ଅଭାବ ଲୋକଙ୍କ ସମସ୍ୟାକୁ ଦ୍ୱିଗୁଣିତ କରିଛି। ଏହି ବ୍ଲକର ୨୬ଟି ଗ୍ରାମ ପଞ୍ଚାୟତରେ ଥିବା ୩୫୦ରୁ ଊଦ୍ଧର୍ବ ପୋଖରୀରୁ ପ୍ରାୟ ୧୫୦ଟି ପୋଖରୀ ସମ୍ପୂର୍ଣ୍ଣ ଶୁଖିଗଲାଣି। ଲୋକମାନେ ଗୃହପାଳିତ ଗାଈ, ବଳଦ, ଛେଳି, ମେଣ୍ଢାଙ୍କ ପାଇଁ ବହୁତ ହଇରାଣ ହେଉଛନ୍ତି। ସମଗ୍ର ବ୍ଲକରେ ୩୦ ହଜାରରୁ ଊଦ୍ଧର୍ବ ବଳଦ, ଗାଈ ଥିବା ବେଳେ ୬ ହଜାରରୁ ଉଦ୍ଧର୍ବ ମଇଁଷି ଅଛନ୍ତି। ଏହି ଗୃହପାଳିତ ପଶୁଙ୍କ ପାଇଁ ପାନୀୟ ଜଳ ସମସ୍ୟା ଦେଖାଦେଇଛି। ଗ୍ରାମ ନିକଟରେ ଥିବା ନାଳ, କୂଅ, ପୋଖରୀ ପାଣି ଶୁଖି ଆସିଥିବାରୁ ଲୋକେ ନଳକୂପରୁ ପାଣି ଆଣି ଗୃହପାଳିତ ପ୍ରାଣୀଙ୍କୁ ପିଇବାକୁ ଦେଉଛନ୍ତି। ପାନୀୟ ଜଳ ସମସ୍ୟା ଦୂର ପାଇଁ ୨୬ଟି ଗ୍ରାମ ପଞ୍ଚାୟତରେ ଆର.ଡବ୍ଲୁ.ଏସ.ଏସ.ବିଭାଗ ପକ୍ଷରୁ ପ୍ରାୟ ୩୫ଟି ପ୍ରୋଜେକ୍ଟ ହାତକୁ ନିଆଯାଇଛି। ୯୮କୋଟି ଟଙ୍କା ବ୍ୟୟ ଅଟକଳରେ ପ୍ରତି ଗ୍ରାମରେ ଗୋଟିଏ ଦୁଇଟି ଲେଖାଏ କରି ଓଭରହେଡ ପାଣି ଟାଙ୍କି କାମ ଚାଲିଛି। ଆସନ୍ତା ଜୁନ ମାସ ପୂର୍ବରୁ ଏହି ପ୍ରୋଜେକ୍ଟ ଶେଷ ହେବ ବୋଲି ବିଭାଗ ପକ୍ଷରୁ ଜଣାପଡିଛି। କେସିଙ୍ଗା ବ୍ଲକରେ ୧୭୧୦ଟି ନଳକୂପ ରହିଛି। ଉକ୍ତ ବିଭାଗ ପକ୍ଷରୁ ପ୍ରତ୍ୟେକ ଘରକୁ ପାନୀୟ ଜଳ ଯୋଗାଇ ଦେବା ପାଇଁ ପାଇପ ସଂଯୋଗ କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲିଛି। ସେହିପରି କେସିଙ୍ଗା ସହରରେ ମଧ୍ୟ ପି.ଏଚ.ଡ଼ି.ବିଭାଗ ପକ୍ଷରୁ ସ୍ଥାନୀୟ ତେଲ ନଦୀ ତଟରୁ ପି.ଏଚ. ଡ଼ି. ମୁଖ୍ୟ କାର୍ଯ୍ୟାଳୟ କୁ ୩.୫ କିମି ଯାଏ ୩ କୋଟି ବ୍ୟୟ ଅଟକଳରେ ପାଇପ ଲାଇନ କାମ ଚାଲିଛି।
କେସିଙ୍ଗା ଏନ.ଏ.ସି.ର ୱାର୍ଡ ନମ୍ବର ୧ରେ ଏକ ଓଭରହେଡ ପାଣି ଟାଙ୍କି ନିର୍ମାଣାଧୀନ ରହିଛି। ଏହା ଅଳ୍ପ ଦିନ ମଧ୍ୟରେ ଶେଷ ହୋଇ ସହରବାସୀଙ୍କୁ ସକାଳେ ଓ ସନ୍ଧ୍ୟାରେ ପାଣି ଯୋଗାଇ ଦିଆଯିବ ବୋଲି ବିଭାଗ ପକ୍ଷରୁ କୁହାଯାଇଛି। ଏ ସଂକ୍ରାନ୍ତରେ ଆର.ଡବ୍ଲୁ.ଏସ.ଏସ. ବିଭାଗର ଯନ୍ତ୍ରୀ ଧର୍ମେନ୍ଦ୍ର ସେଠୀଙ୍କୁ ପଚାରିବାରେ ଗ୍ରୀଷ୍ମପ୍ରବାହ ଯୋଗୁ ଜଳସ୍ତର ହ୍ରାସ ପାଉଛି। ଗାଁ ଗାଁରେ ନଳକୂପ ଖନନ ପାଇଁ ପ୍ରତ୍ୟେକ ଗ୍ରାମ ପଞ୍ଚାୟତକୁ କ୍ଷମତା ଦିଆଯାଇଛି। ଦୁଇଟି ଭ୍ରାମ୍ୟମାନ ଗାଡି ରହିଛି। ଯେଉଁ ଗ୍ରାମରୁ ଅଭିଯୋଗ ଆସୁଛି ତୁରନ୍ତ ଯାଇ ନଳକୂପ ମରାମତି କରାଯାଉଛି। କେସିଙ୍ଗା ବ୍ଲକରେ ୩୫ଟି ପ୍ରୋଜେକ୍ଟରୁ ୨୮ଟି ନିର୍ମାଣ କାମ ଶେଷ ହୋଇଛି। ଖୁବଶୀଘ୍ର ଅନ୍ୟଗୁଡିକର ନିର୍ମାଣ କାର୍ଯ୍ୟ ଶେଷ ହେବ ା ଫଳରେ ପାନୀୟ ଜଳ ସମସ୍ୟା ଦୂର ହୋଇପାରିବ ବୋଲି ସେ ପ୍ରକାଶ କରିଥିଲେ।
