ବେଜିଂ, ୨୭।୪(ପି.ଟି.): ଚାଇନାର ଶାନସି ପ୍ରଦେଶର ଏକ ବିଶ୍ୱବିଦ୍ୟାଳୟରେ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଏକ ହ୍ୟୁମାନଏଡ୍ ରୋବୋ (ଯନ୍ତ୍ରମଣିଷ) ନାଚୁଥିବା ସମୟରେ ହଠାତ୍ ଜଣେ ଛାତ୍ରୀଙ୍କ ଆଡ଼କୁ ମାଡ଼ିଆସି ତାଙ୍କୁ କୁଣ୍ଢାଇ ପକାଇଥିଲା। ଏହି ଦୃଶ୍ୟ ଦେଖି ସେଠାରେ ଉପସ୍ଥିତ ଲୋକେ ସ୍ତବ୍ଧ ହୋଇଯାଇଥିଲେ ଏବଂ କର୍ମଚାରୀମାନେ ତୁରନ୍ତ ଦୌଡ଼ିଆସି ରୋବୋକୁ ଟାଣି ନେଇଥିଲେ। ଏହି ଘଟଣାର ଭିଡିଓ ଭାଇରାଲ ହେବା ପରେ ଚାଇନାର ସୋସିଆଲ ମିଡିଆରେ ବଡ଼ ବିତର୍କ ଆରମ୍ଭ ହୋଇଛି।
ରୋବୋଟିର ନିଜସ୍ବ ଚେତନା ବିକଶିତ ହୋଇଗଲାଣି କି ବୋଲି କେତେଜଣ ପ୍ରଶ୍ନ କରିଛନ୍ତି। ଅନ୍ୟପକ୍ଷରେ କେତେଜଣ ଏହାକୁ ଜଣେ ଅପରେଟରଙ୍କ ଦ୍ୱାରା ନିୟନ୍ତ୍ରିତ ବୋଲି ସନ୍ଦେହ କରିଥିଲେ। ବିଶ୍ୱବିଦ୍ୟାଳୟ ପକ୍ଷରୁ ଏହାକୁ ଖଣ୍ଡନ କରାଯାଇଛି। ଜଣେ କର୍ମଚାରୀ କହିଛନ୍ତି, ଏହା କୌଣସି ପୂର୍ବ ନିର୍ଦ୍ଧାରିତ ପଦକ୍ଷେପ ନ ଥିଲା। ଏହା ରୋବୋର ଏକ ଏଆଇ ପ୍ରୋଗ୍ରାମିଂ ତ୍ରୁଟି। ରୋବାଟିକୁ ପ୍ରଦାନ କରିଥିବା କମ୍ପାନୀର କହିବାନୁଯାୟୀ, କାର୍ଯ୍ୟକ୍ରମ ସ୍ଥଳରେ ସେହି ସମୟରେ ଏକାଧିକ ଡ୍ରୋନ୍ ଉଡ଼ୁଥିଲା।
ଏହି ଡ୍ରୋନ୍ଗୁଡ଼ିକରୁ ନିର୍ଗତ ସିଗ୍ନାଲ ଯୋଗୁ ରୋବୋର ସିଗନାଲ୍ରେ ବାଧା ସୃଷ୍ଟି ହୋଇଥିଲା, ଫଳରେ ରୋବୋ ଅସ୍ବାଭାବିକ ଆଚରଣ କରିଥିଲା। ଚାଇନା ଏବେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) କ୍ଷେତ୍ରରେ ବିଶ୍ୱରେ ନିଜର ପ୍ରଭାବ ବିସ୍ତାର କରୁଛି। ନିକଟରେ ଏକ ହ୍ୟୁମାନଏଡ୍ ରୋବୋ ହାଫ୍ ମାରାଥନ୍କୁ ମାତ୍ର ୫୦ ମିନିଟ ୨୬ ସେକେଣ୍ଡରେ ଶେଷ କରି ମଣିଷର ବିଶ୍ୱ ରେକର୍ଡକୁ ମଧ୍ୟ ପଛରେ ପକାଇ ଦେଇଛି। ବର୍ତ୍ତମାନ ଚାଇନାର ପ୍ରାୟ ସମସ୍ତ ବଡ଼ ହୋଟେଲ ଓ ଡାକ୍ତରଖାନାରେ ରୋବୋଗୁଡ଼ିକ ସେବା ଯୋଗାଇ ଦେଉଛନ୍ତି। ତେବେ ଉପରୋକ୍ତ ଘଟଣାଟି ରୋବୋର ଭଲ ପାଇବା ନ ଥିଲା, ବରଂ ତାହା ଏକ ବୈଷୟିକ ତ୍ରୁଟି ଥିଲା। ଏହି ଘଟଣା ସତର୍କ କରାଉଛି ଯେ ମଣିଷ ଏବଂ ମେଶିନ ଏକାଠି କାମ କରିବାବେଳେ ସୁରକ୍ଷା ନିୟମକୁ ଅଧିକ ପ୍ରାଧାନ୍ୟ ଦେବାକୁ ପଡ଼ିବ। ରୋବୋ ବିଶେଷଜ୍ଞ ଗାଓ ହୁଆନ୍ କହିଛନ୍ତି, ସାଧାରଣ ସ୍ଥାନରେ ରୋବୋ ବ୍ୟବହାର ବେଳେ ଅଧିକ ସତର୍କତା ଅବଲମ୍ବନ ଜରୁରୀ। ରୋବୋକୁ କେବଳ ଏକ ଖେଳଣା ଭାବେ ନ ଦେଖି ଏକ ଶକ୍ତିଶାଳୀ ଯନ୍ତ୍ର ଭାବେ ଦେଖିବା ଉଚିତ। ଜରୁରିକାଳୀନ ପରିସ୍ଥିତି ପାଇଁ ‘ଏମରଜେନ୍ସି ଷ୍ଟପ୍’ ବ୍ୟବସ୍ଥା ଏବଂ ମଣିଷ ପର୍ଯ୍ୟବେକ୍ଷକ ରହିବା ଆବଶ୍ୟକ ବୋଲି ହୁଆନ୍ କହିଛନ୍ତି।
