ଭୁବନେଶ୍ୱର,୧୭।୧୧: ଓଡ଼ିଆ ସଙ୍ଗୀତ ଜଗତର ଅନ୍ୟତମ ଲୋକପ୍ରିୟ କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ଅକାଳ ବିୟୋଗ ପରେ ଏକ ସକ୍ରିୟ ସ୍ୱର ନିରବି ଯାଇଛି। ଖୁବ୍ କମ୍ ବୟସରେ ଘରେ ଘରେ ପରିଚିତ ହୋଇଥିବା ଏହି ତାରକା କଣ୍ଠଶିଳ୍ପୀଙ୍କୁ ହରାଇ ତାଙ୍କ ପ୍ରଶଂସକମାନେ ଭାଙ୍ଗି ପଡ଼ିଛନ୍ତି। ଭୁବନେଶ୍ୱର ଏମ୍ସ (AIIMS)କୁ ତାଙ୍କୁ ଶେଷ ଦର୍ଶନ ପାଇଁ ପ୍ରଶଂସକ ଓ ସଙ୍ଗୀତ ପ୍ରେମୀଙ୍କ ସୁଅ ଛୁଟିଛି ଏବଂ ସମଗ୍ର ସଙ୍ଗୀତ ଜଗତ ଶୋକରେ ବୁଡ଼ିଯାଇଛି।
ସଙ୍ଗୀତରେ ହ୍ୟୁମାନଙ୍କ ଅବଦାନ: ହ୍ୟୁମାନ ସାଗର କେବଳ ଚଳଚ୍ଚିତ୍ର ନୁହେଁ, ଆଲବମ୍ ଜଗତରେ ମଧ୍ୟ ଅନେକ ହିଟ୍ ଗୀତ ଦେଇଥିଲେ। ବାହାଘର ବରଯାତ୍ରୀ ଠାରୁ ଆରମ୍ଭ କରି ପୂଜା ଭସାଣି, ମେଲୋଡିରୁ ପିକନିକ୍ ପାର୍ଟି ପର୍ଯ୍ୟନ୍ତ ସବୁଠି ତାଙ୍କ ଗୀତ ବାଜୁଥିଲା। ପ୍ରେମ, ବିରହ, ଡ୍ୟାନ୍ସ ଏବଂ ଭଜନ—ସବୁ ପ୍ରକାର ଗୀତ ଗାଇବାରେ ସେ ସିଦ୍ଧହସ୍ତ ଥିଲେ।
ପ୍ରାରମ୍ଭିକ କ୍ୟାରିୟର: ସଙ୍ଗୀତ ପରିବାରରୁ ଆସିଥିବା ହ୍ୟୁମାନଙ୍କ ବାପା-ମା’ ଗାୟକ ଥିବାବେଳେ ଜେଜେବାପା ଜଣେ କମ୍ପୋଜର ଥିଲେ। ୨୦୧୪ରେ ଚଳଚ୍ଚିତ୍ର ‘ସମଥିଙ୍ଗ ସମଥିଙ୍ଗ-୨’ର ‘ପ୍ରେମ ହେଇଯାଏରେ’ ଗୀତରେ ସେ ପ୍ରଥମେ କଣ୍ଠଦାନ କରିଥିଲେ। ଏହାପରେ ସେ ଆଉ ପଛକୁ ଫେରି ଚାହିଁ ନଥିଲେ।
ହିଟ୍ ଚଳଚ୍ଚିତ୍ର ଓ ଆଲବମ୍ ଗୀତ: ‘ଇସ୍କ ତୁ ହି ତୁ’, ‘ଅଗସ୍ତ୍ୟା’, ‘ବେବି’, ‘ଅଭୟ’, ‘ହାପି ଲକି’, ‘ଲଭ ଏକ୍ସପ୍ରେସ’, ‘ତୋ ପ୍ରେମରେ ପଡିଲା ପରେ’, ‘ଶ୍ରୀମାନ ସୁରଦାସ’ ଆଦି ଅନେକ ସିନେମାରେ ସେ କଣ୍ଠଦାନ କରିଛନ୍ତି। ତାଙ୍କର କିଛି ଅଭୁଲା ଲୋକପ୍ରିୟ ଗୀତ ମଧ୍ୟରେ ‘କେମିତି ଭୁଲିବି ସେ ଅଭୁଲା ଦିନ’, ‘କୁଆଡେ ଗଲୁ ପାଗେଳୀ’, ‘ମରିଯିବି ଧନ ତୋ ବିନା’, ‘ମନେ ତୁ ପଡୁଛୁ ଆଲୋ ପାଗେଳୀ’, ‘ବେବି ଓ ବେବି’, ‘ଇସ୍କ ତୁ ହି ତୁ’, ‘ମଲକା ମଲକା’, ‘ମା ତୋ ବିନା’ ଏବଂ ‘ବାପା’ ଆଦି ରହିଛି।
