କାନବେରା,୧୦।୮: ପୂର୍ବତନ ନ୍ୟୁଜିଲାଣ୍ଡ ଅଲରାଉଣ୍ଡର କ୍ରିସ କେର୍ନସଙ୍କ ଅବସ୍ଥା ଗୁରୁତର ରହିଛି। ତାଙ୍କୁ ଅଷ୍ଟ୍ରେଲିଆର ଏକ ଡାକ୍ତରଖାନାରେ ଲାଇଫ ସପୋର୍ଟ ସିଷ୍ଟମରେ ରଖାଯାଇଛି। ୫୧ ବର୍ଷିୟ କେର୍ନସଙ୍କ ମୁଖ୍ୟ ଧମନୀର ଭିତର ପରସ୍ତ କଟିଯାଇଥିଲା। ଏହା ପରେ ତାଙ୍କୁ ଗତ ସପ୍ତାହରେ କାନବେରା ଏକ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଏବଂ ତାଙ୍କର ଅନେକ ଗୁଡିଏ ଅସ୍ତ୍ରୋପଚାର କରାଯାଇଥିଲା। କିନ୍ତୁ ତାଙ୍କ ସ୍ବାସ୍ଥ୍ୟରେ କୌଣସି ଉନ୍ନତି ହୋଇ ନ ଥିଲା। ଏହା ପରେ ତାଙ୍କୁ ଲାଇଫ ସପୋର୍ଟ ସିଷ୍ଟମରେ ରଖାଯାଇଛି। କିନ୍ତୁ ତାଙ୍କୁ ଖୁବଶୀଘ୍ର ସିଡନୀକୁ ସ୍ଥାନାନ୍ତର କରାଯିବ।
୧୯୮୯ରେ ଅନ୍ତର୍ଜାତୀୟ ଡେବ୍ୟୁ କରିଥିବା କେର୍ନସ ନ୍ୟୁଜିଲାଣ୍ଡ ପାଇଁ ୬୨ ଟେଷ୍ଟରେ ୩୩୨୦ ରନ ସ୍କୋର କରିଥିଲେ। ୨୧୫ଟି ଦିନିକିଆ ମ୍ୟାଚରେ ତାଙ୍କ ନାମରେ ୪୯୫୦ ରନ କରିଛନ୍ତି। ସେ ଅନ୍ତର୍ଜାତୀୟ କ୍ରିକେଟରେ ୯ ଶତକ ଏବଂ ୪୮ ଅର୍ଦ୍ଧଶତକ ହାସଲ କରିଥିଲେ। ୨୦୦୦ରେ ତାଙ୍କୁ ୱିସଡେନର ୫ ପ୍ଲେୟାର ଅଫ ଦି ଇୟର ଭାବରେ ସମ୍ମାନିତ କରାଯାଇଥିଲା। ସେ ଦୁନିଆର ଶ୍ରେଷ୍ଠ ଅଲରାଉଣ୍ଡରଙ୍କ ମଧ୍ୟରେ ଗଣିତ ହୋଇଥିଲେ। ୨୦୦୪ରେ, ସେ ଅଲରାଉଣ୍ଡର ଭାବରେ ୨୦୦ ଉଇକେଟ ଏବଂ ୩୦୦୦ ରନ ସ୍କୋର କରିବାରେ ଷଷ୍ଠ ଖେଳାଳି ହୋଇଥିଲେ। ଟେଷ୍ଟରେ ୨୧୮ ଉଇକେଟ ଏବଂ ଦିନିକିଆରେ ୨୦୧ ୱିକେଟ ନେଇଥିଲେ। ଟେଷ୍ଟରେ ସେ ୧୩ ଥର ପାଞ୍ଚଟି ଉଇକେଟ ନେଇଥିଲେ ଏବଂ ଥରେ ମ୍ୟାଚରେ ୧୦ ଉଇକେଟ ନେଇଥିଲେ। ଘରୋଇ କ୍ରିକେଟରେ ୨୧ ହଜାରରୁ ଅଧିକ ରନ ସଂଗ୍ରହ କରି ୧୧୧୦ରୁ ଅଧିକ ଉଇକେଟ ନେଇଥିଲେ। ବଲ ସହିତ କେର୍ନସଙ୍କ ପ୍ରଦର୍ଶନ ମଧ୍ୟ ଉତ୍କୃଷ୍ଟ ଥିଲା। ତାଙ୍କ ନାଁରେ ମ୍ୟାଚ ଫିକ୍ସିଂ ଭଳି ଗୁରୁତର ଅଭିଯୋଗ ହୋଇଥିଲା। ତେବେ ଏହି ଅଭିଯୋଗ କେବେ ପ୍ରମାଣିତ ହୋଇ ନ ଥିଲା। ମ୍ୟାଚ ଫିକ୍ସିଂ ଅଭିଯୋଗ ହେତୁ ତାଙ୍କର ଆର୍ଥିକ ଅବସ୍ଥା ବିଗିଡି ଯାଇଥିଲା ଏବଂ ସେ ଅକଲାଣ୍ଡ ପୌରପାଳିକା ପାଇଁ ଟ୍ରକ ମଧ୍ୟ ଚଳାଇଥିଲେ, ବସ୍ ଧୋଇଥିଲେ ଏବଂ ଘରର ଦାୟତ୍ୱ ତୁଲାଇବା ପାଇଁ ବାରରେ ମଧ୍ୟ କାମ କରିଥିଲେ।
