ନୂଆଦିଲ୍ଲୀ,୩।୪: ସାଧାରଣତଃ ହାଟ୍ସଆପରେ କାହା ସହିତ କଥା ହେବାକୁ ହେଲେ ଆମକୁ ପ୍ରଥମେ ସେହି ବ୍ୟକ୍ତିଙ୍କ ନମ୍ବର ନିଜ ଫୋନରେ ସେଭ କରିବାକୁ ପଡ଼ିଥାଏ। କିନ୍ତୁ ଅନେକ ସମୟରେ ଆମକୁ କେବଳ କିଛି ସମୟ ପାଇଁ କାହା ସହ ଚାଟିଂ କରିବାକୁ ପଡ଼େ କିମ୍ବା କିଛି ଡକ୍ୟୁମେଣ୍ଟ ପଠାଇବାକୁ ପଡ଼େ, ଯେଉଁଥିପାଇଁ ନମ୍ବର ସେଭ କରିବା ବିରକ୍ତିକର ମନେହୁଏ। ଏବେ ଏହାର ଏକ ସହଜ ସମାଧାନ ଆସିଛି। ଏଣିକି ଆପଣ କୌଣସି ଥାର୍ଡ ପାର୍ଟି ଆପ ବିନା ମଧ୍ୟ ଅଜଣା ନମ୍ବରରେ ମେସେଜ କରିପାରିବେ।
କୌଣସି ଆପ ବିନା କରନ୍ତୁ ଚାଟିଂ:
ଏହି ସୁବିଧା ପାଇଁ ଆପଣଙ୍କୁ ଅଲଗା କୌଣସି ଆପ୍ ଇନଷ୍ଟଲ କରିବାକୁ ପଡ଼ିବ ନାହିଁ। ମେଟା (Meta) ନିଜେ ହାଟ୍ସଆପ ୟୁଜର୍ସଙ୍କୁ ଏହି ଅପ୍ସନ ପ୍ରଦାନ କରୁଛି।
ନମ୍ବର ସେଭ ନକରି କିପରି କରିବେ WhatsApp ଚାଟିଂ?
ନିମ୍ନରେ ଦିଆଯାଇଥିବା ଷ୍ଟେପ୍ସ ଅନୁସରଣ କରନ୍ତୁ:
୧. ନିଜକୁ କରନ୍ତୁ ମେସେଜ: ସର୍ବପ୍ରଥମେ ଆପଣ ଯେଉଁ ନମ୍ବର ସହ ଚାଟ କରିବାକୁ ଚାହୁଁଛନ୍ତି, ସେହି ନମ୍ବରକୁ କପି କରନ୍ତୁ ଏବଂ ହାଟ୍ସଆପରେ ନିଜ ଚାଟ ବକ୍ସ (You) କିମ୍ବା କୌଣସି ବନ୍ଧୁଙ୍କ ଚାଟ ବକ୍ସରେ ପଠାଇ ଦିଅନ୍ତୁ।
୨. ଲିଙ୍କ ଉପରେ କ୍ଲିକ କରନ୍ତୁ: ମେସେଜ ସେଣ୍ଡ ହେବା ପରେ ନମ୍ବରଟି ନୀଳ ରଙ୍ଗ (Blue Link)ରେ ଦେଖାଯିବ। ସେହି ନମ୍ବର ଉପରେ ଟ୍ୟାପ କରନ୍ତୁ।
୩. ଅପ୍ସନ ବାଛନ୍ତୁ:ନମ୍ବର ଉପରେ କ୍ଲିକ କରିବା ମାତ୍ରେ ଆପଣଙ୍କୁ ’Message’, ’Audio’, ’Video’ ପରି କିଛି ଅପ୍ସନ ମିଳିବ।
୪. ଚାଟିଂ ଆରମ୍ଭ କରନ୍ତୁ: ଯଦି ଆପଣ ମେସେଜ କରିବାକୁ ଚାହୁଁଛନ୍ତି, ତେବେ ’Message’ ଉପରେ ଟ୍ୟାପ କରନ୍ତୁ। ଏହା ସହିତ ସେହି ବ୍ୟକ୍ତିଙ୍କ ଚାଟ ପେଜ ଓପନ ହୋଇଯିବ ଏବଂ ଆପଣ ସିଧାସଳଖ କଥା ହୋଇପାରିବେ।
ଏହି ଉପାୟରେ ଆପଣ କେବଳ ମେସେଜ ନୁହେଁ, ବରଂ ଭଏସ କଲ ଏବଂ ଭିଡିଓ କଲ ମଧ୍ୟ କରିପାରିବେ। ଯଦି ଆପଣ ହାଟ୍ସଆପ ପେମେଣ୍ଟ ବ୍ୟବହାର କରୁଛନ୍ତି, ତେବେ ପଇସା ମଧ୍ୟ ପଠାଇ ପାରିବେ।
ଅନ୍ୟ ଏକ ସହଜ ଉପାୟ: ୱେବ୍ ଲିଙ୍କ ମାଧ୍ୟମରେ
ଆପଣ ଚାହିଁଲେ ନିଜ ମୋବାଇଲ କିମ୍ବା ଲାପଟପ୍ ବ୍ରାଉଜରରେ ଏକ ଲିଙ୍କ ବ୍ୟବହାର କରି ମଧ୍ୟ ଚାଟିଂ କରିପାରିବେ।
-ବ୍ରାଉଜରରେ https://wa.me/୯୧XXXXXXXXXX ଟାଇପ କରନ୍ତୁ। (ଏଠାରେ ୯୧ ହେଉଛି ଭାରତର କୋଡ ଏବଂ X ଜାଗାରେ ମୋବାଇଲ ନମ୍ବର ଦିଅନ୍ତୁ)।
-ଏହାପରେ ’Continue to Chat’ ଉପରେ କ୍ଲିକ କରନ୍ତୁ। ଏହା ଆପଣଙ୍କୁ ସିଧା ହାଟ୍ସଆପ ଚାଟ୍ ବକ୍ସକୁ ନେଇଯିବ।
ଏଣିକି ଛୋଟ ଛୋଟ କାମ ପାଇଁ ଅଜଣା ଲୋକଙ୍କ ନମ୍ବର ଫୋନରେ ସେଭ କରି କଣ୍ଟାକ୍ଟ ଲିଷ୍ଟ ଭିଡ଼ କରିବାର ଆଉ ଆବଶ୍ୟକତା ନାହିଁ।
