ବେଳେବେଳେ ଦେଖାଯାଏ କେମିକାଲ୍ଯୁକ୍ତ ରଙ୍ଗରେ ହୋଲି ଖେଳିଲେ କାହାର ତ୍ୱଚାରେ ଇନ୍ଫେକ୍ସନ୍ ହୁଏ ତ କାହାର ଆଖି ଜଳାପୋଡ଼ା କରିଥାଏ। ତା’ଛଡ଼ା ଏହି ରଙ୍ଗ ସହଜରେ ଦେହରୁ ଛାଡ଼ି ବି ନ ଥାଏ। ସେଥିପାଇଁ ଏବେ ଲୋକଙ୍କ ଭିତରେ ହର୍ବାଲ୍ ରଙ୍ଗର ଚାହିଦା ବଢୁଥିବା ଦେଖିବାକୁ ମିଳୁଛି, କାରଣ ଏହାର କୌଣସି ପାର୍ଶ୍ୱ ପ୍ରତିକ୍ରିୟା ନଥାଏ। ମାର୍କେଟ୍ରେ ତ ହର୍ବାଲ୍ ରଙ୍ଗ ଅନେକ ମିଳୁଛି; କିନ୍ତୁ ଆପଣ ଚାହିଁଲେ ବିଭିନ୍ନ ପ୍ରକାର ଫୁଲ, ଫଳ, ପତ୍ର ତଥା ରୋଷେଇ ସାମଗ୍ରୀରୁ ବି ଘରେ ବସି ସହଜରେ ଏହାକୁ ତିଆରି କରିପାରିବେ। ଯେମିତିକି: ହଳଦୀରେ ବେସନ, ଚନ୍ଦନ ପାଉଡର ମିଶାଇ ଏହାକୁ ସୁବାସଯୁକ୍ତ ହଳଦିଆ ରଙ୍ଗ ଭାବେ ବ୍ୟବହାର କରିପାରିବେ। ଗେଣ୍ଡୁଫୁଲ, କମଳା ଚୋପାରୁ କମଳା ରଙ୍ଗ ହୋଇପାରିବ। ସେହିପରି ମେହେନ୍ଦି ପାଉଡର, ନିମ୍ବ ପତ୍ର, ପାଳଙ୍ଗ, ମେଥି ତଥା ପୁଦିନା ପତ୍ରକୁ ବାଟି ସବୁଜ ରଙ୍ଗ, ଡାଳିମ୍ବ, ବିଟ୍ ରସ ତଥା ନାଲି ଗୋଲାପ ପାଖୁଡାକୁ ବାଟି ନାଲି ରଙ୍ଗ, ଶୁଖିଲା ଲାଲ୍ ଚନ୍ଦନ ପାଉଡରକୁ ନାଲି ରଙ୍ଗର ଅବିର, ମଇଦା କିମ୍ବା ଚାଉଳ ଗୁଣ୍ଡକୁ ଧଳାରଙ୍ଗର ଅବିର ଭାବେ ମଧ୍ୟ ବ୍ୟବହାର କରିହେବ। ଏହା ତ୍ୱଚା ପାଇଁ ଉପକାରୀ ଯେମିତି ସୁରକ୍ଷିତ ବି ସେମିତି ହୋଇଥାଏ।
