ଭୁବନେଶ୍ୱର, ୨୫।୧୦(ସୁନିତ୍ ମିଶ୍ର): ବିଜେଡି ଗତ ଅକ୍ଟୋବର ୯ ରୁ ତା’ର ସଦସ୍ୟତା ଅଭିଯାନ ଆରମ୍ଭ କରିଛି। ହେଲେ ଗତ ୨୪ ବର୍ଷ ଭିତରେ ଯେପରି ଦଳର ନେତା ଓ କର୍ମୀମାନେ ଏହି କାର୍ଯ୍ୟକୁ ଉତ୍ସାହ ସହକାରେ କରିଆସୁଥିଲେ ବର୍ତ୍ତମାନ କିନ୍ତୁ ସେହି କ୍ରମରେ ବ୍ୟତିକ୍ରମ ଦେଖାଦେଇଥିବା ଚର୍ଚ୍ଚା ହେଉଛି। ରାଜ୍ୟରେ ଲଗାତର ୨୪ ବର୍ଷ ଶାସନ କରିଆସିଥିବା ବିଜେଡି ପ୍ରଥମ ଥର ଲାଗି ବିରୋଧୀ ଦଳ ଭୂମିକାକୁ ଆସି ଏହି କାର୍ଯ୍ୟ ଆରମ୍ଭ କରିଛି। ହେଲେ ବିଜେଡିର ସଦସ୍ୟତା ଅଭିଯାନ କାର୍ଯ୍ୟକ୍ରମକୁ ଆଗକୁ ବଢ଼ାଇବା ସକାଶେ ଦଳୀୟ ନେତାମାନେ ଆଉ ସେତେଟା ଆଗ୍ରହ ପୂର୍ବଭଳି ଦେଖାଉନାହାନ୍ତି। ଯେଉଁମାନେ ଆଗ ଥର ପର୍ଯ୍ୟନ୍ତ ଅଧିକ ସଦସ୍ୟଙ୍କୁ ଦଳରେ ଯୋଡ଼ିବା ଲାଗି ପ୍ରତିଯୋଗିତା କରିବାକୁ ପଛାଉ ନ ଥିଲେ ସେମାନେ ଏବେ ଦେଖା ବି ଦେଉନାହାନ୍ତି। ବିଜେଡିର ସଦସ୍ୟ ହେବା ଏବଂ କରେଇବା ଲାଗି ଲୋକମାନଙ୍କ ଭିତରେ ଆଉ ସେଇ ପୁରୁଣା ଆଗ୍ରହ ନ ଥିବା କେତେଜଣ ବରିଷ୍ଠ ନେତା ଖୋଲାଖୋଲି ମତ ଦେବା ଆରମ୍ଭ କରିଦେଇଛନ୍ତି। ଏହି ଅଭିଯାନକୁ ସଫଳ କରାଇବା ଲାଗି ଶଙ୍ଖ ଭବନରୁ ଟଙ୍କା ବଣ୍ଟା ପର୍ବ ଆରମ୍ଭ ହୋଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ୨୦୨୪ ନିର୍ବାଚନ ଫଳାଫଳ ବାହାରିବା ପର୍ଯ୍ୟନ୍ତ ବିଜେଡିର ସବୁଠାରୁ କ୍ଷମତାଶାଳୀ ବୋଲାଉଥିବା ନେତା ଜଣକ କୁଆଡ଼େ ପ୍ରତ୍ୟେକ ବିଧାନସଭା କ୍ଷେତ୍ରରେ ସଦସ୍ୟତା ଅଭିଯାନକୁ ସଫଳ କରାଇବା ଲାଗି ବିଧାୟକ ଏବଂ ବିଧାୟକ ପ୍ରାର୍ଥୀଙ୍କୁ ଡାକି ୫ ଲକ୍ଷ ଲେଖାଏଁ ଟଙ୍କା ଦେଉଥିବା ଶୁଣିବାକୁ ମିଳୁଛି। ପୂର୍ବରୁ କେବେ ଏ ସ୍ଥିତି ସୃଷ୍ଟିହୋଇ ନ ଥିବା ବେଳେ ଦୁର୍ଦ୍ଦିନ ବି କେଡ଼େ ଦୁଃଖଦାୟକ ଏକଥା ତାଙ୍କ ଦଳ ଭିତରୁ କୁହାକୁହି ହେଉଛନ୍ତି।
ସୂଚନାଯୋଗ୍ୟ, ବିଜେଡି ସଦସ୍ୟତା ଅଭିଯାନ ଆରମ୍ଭକରି କୋଟିଏରୁ ଅଧିକ ପ୍ରାଇମେରି ମେମ୍ବର ଏବଂ ୩ ଲକ୍ଷରୁ ଅଧିକ ଆକ୍ଟିଭ ମେମ୍ବରଙ୍କୁ ଯୋଡ଼ିବାକୁ ଲକ୍ଷ୍ୟ ରଖିଛି। ଆଗରୁ ନିର୍ବାଚନମଣ୍ଡଳୀ ସ୍ତରରେ ବିଧାୟକ ଏବଂ ମନ୍ତ୍ରୀମାନେ ପଞ୍ଚାୟତସ୍ତର ନେତାମାନଙ୍କୁ ମେମ୍ବରଶିପ୍ ଡ୍ରାଇଭ ପାଇଁ ବହି ଯୋଗାଇ ଦେଉଥିଲେ। ଜଣେ ୨୫ ଜଣଙ୍କୁ ପ୍ରାଇମେରି ମେମ୍ବର କଲେ ସେ ଆକ୍ଟିଭ ମେମ୍ବର ହୋଇପାରୁଥିଲେ। ପଞ୍ଚାୟତସ୍ତରର ନେତାମାନେ ଯେହେତୁ ସରକାରୀ ଦଳରେ ଥିଲେ ତେଣୁ ବାମ, ଡାହାଣ ଦସ୍ତଖତକରି ଲୋକଙ୍କ ନାଁ ପକାଇ ଆକ୍ଟିଭ ମେମ୍ବର ସହଜରେ ହୋଇଯାଉଥିଲେ। ଜଣେ ପ୍ରାଇମେରି ମେମ୍ବର ପାଇଁ ମାତ୍ର ୫ ଟଙ୍କା ଲେଖାଏଁ ଦେବାକୁ ପଡୁଥିବାରୁ ଏହା କିଛି ବଡ଼ ସଦସ୍ୟା ନ ଥିଲା। କ୍ଷମତାର ଉପଯୋଗରେ ସବୁକିଛି ସହଜରେ ତୃଣମୂଳସ୍ତରରୁ ସମ୍ଭବ ହୋଇପାରୁଥିଲା। ସଦସ୍ୟତା ଅଭିଯାନ ନେଇ ପୂର୍ବତନ ମନ୍ତ୍ରୀ ଅତନୁ ସବ୍ୟସଚୀ ନାୟକ କହିଛନ୍ତି, ଅକ୍ଟୋବର ୯ରୁ ଆରମ୍ଭହୋଇ ଜାନୁଆରୀ ପର୍ଯ୍ୟନ୍ତ ମେମ୍ବରଶିପ ଡ୍ରାଇଭ ଚାଲିବ। ଦଳର ସାଙ୍ଗଠନିକ ନିର୍ବାଚନ ହେବା ପର୍ଯ୍ୟନ୍ତ ଏହି କାର୍ଯ୍ୟକ୍ରମ ଜାରି ରହିବ। ଯେଉଁମାନେ ପୂର୍ବରୁ ସଦସ୍ୟ ରହିଛନ୍ତି ସେମାନେ ଆଉ ଥରେ ରିନ୍ୟୁ କରିପାରିବେ। ଏହି କାର୍ଯ୍ୟକ୍ରମ କରିବା ଲାଗି ଦଳ ପକ୍ଷରୁ କିଛି ଟଙ୍କା ଦିଆଯାଏ ନାହିଁ। ତୃଣମୂଳସ୍ତରରେ ସମସ୍ତଙ୍କ ଆଗ୍ରହ ଏଥିପ୍ରତି ରହୁଛି ବୋଲି ସେ କହିଛନ୍ତି।
